'എനിക്ക് ഇംഗ്ലീഷ് അറിയില്ല, നിങ്ങള്‍ക്ക് കളിയാക്കാനുള്ള ഫ്രീഡമുണ്ട്'; പരിഹസിക്കുന്നവരോട് സ്വാസിക

ഇംഗ്ലീഷ് മാധ്യമങ്ങളോട് സ്വാസിക സംസാരിക്കുന്ന വീഡിയോ സമൂഹമാധ്യമങ്ങളിൽ ചര്‍ച്ചയായിരുന്നു.

പശ്ചിമേഷ്യൻ സംഘര്‍ഷത്തെ തുടര്‍ന്ന് ഗൾഫിൽ നിന്നുള്ള വിമാന സർവീസുകൾ റദ്ദാക്കിയിരുന്നു. ഇതേത്തുടർന്ന് നടി സ്വാസിക വിജയ്‍യും അബുദാബിയിൽ നിന്നും നാട്ടിൽ തിരിച്ചെത്താനാകാതെ പ്രതിസന്ധിയിലായിരുന്നു. ഫെബ്രുവരി 28-ന് അബുദാബിയിൽനിന്ന് നാട്ടിൽ തിരിച്ചെത്തേണ്ട സ്വാസിക ഒരാഴ്ചയ്ക്കു ശേഷമാണ് തിരികെയെത്തിയത്. നാട്ടിൽ തിരിച്ചെത്തിയ ശേഷം ഇംഗ്ലീഷ് മാധ്യമങ്ങളോട് സ്വാസിക സംസാരിക്കുന്ന വീഡിയോ സമൂഹമാധ്യമങ്ങളിൽ ചര്‍ച്ചയായിരുന്നു.

വലിയതോതിലുള്ള ആശങ്ക ഉണ്ടായിരുന്നില്ലെങ്കിലും മറ്റൊരു രാജ്യത്ത് നിന്നുള്ള വ്യക്തി എന്ന നിലയിലുള്ള ചെറിയ ഭയം ഉണ്ടായിരുന്നെന്ന് സ്വാസിക പറഞ്ഞിരുന്നു. ഒറ്റയ്ക്കായിരുന്നു അബുദാബിയ്ക്ക് പോയത്. അതായിരുന്നു പ്രധാന കാരണം. ട്രാവൽ ഏജൻസി ഉൾപ്പെടെ എല്ലാവരും നന്നായി പിന്തുണച്ചു എന്നും സ്വാസിക പറഞ്ഞിരുന്നു. എന്നാൽ സ്വാസിക ഇഗ്ലീഷ് സംസാരിക്കുന്നതിനെ, വിഷയത്തിന്റെ ഗൗരവം പോലും കണക്കിലെടുക്കാതെ പലരും ട്രോൾ ആക്കുകയാണ് ഉണ്ടായത്. വീഡിയോയ്ക്കു താഴെ സ്വാസികയുടെ ഇംഗ്ലീഷിനെ പലരും പരിഹസിക്കുകയും ചെയ്തിരുന്നു. ഇതിനെല്ലാം മറുപടിയുമായി രംഗത്തെത്തിയിരിക്കുകയാണ് താരം. ഒരു ഇൻസ്റ്റഗ്രാം പേജിൽ പ്രത്യക്ഷപ്പെട്ട വീഡിയോയ്ക്കു താഴെയാണ് സ്വാസിക കമന്റ് ചെയ്തത്.

''എന്നോട് ഇംഗ്ലീഷിൽ പറയാൻ പറഞ്ഞു. എനിക്കു പറ്റുന്നതുപോലെ ഞാൻ പറഞ്ഞു. എനിക്കു ഇംഗ്ലീഷ് അറിയില്ല എന്നു ഞാൻ എല്ലാ അഭിമുഖങ്ങളിലും പറഞ്ഞിട്ടുണ്ട്. പിന്നെ നിങ്ങൾക്ക് കളിയാക്കാൻ ഉള്ള ഫ്രീഡം ഉണ്ട്. എനിക്കു പറ്റിയ തെറ്റുകൾ ഞാൻ അംഗീകരിക്കുന്നു'', എന്നാണ് സ്വാസിക കമന്റ് ചെയ്തത്. ഇതിനു താഴെ സ്വാസികയെ പിന്തുണച്ചും ചിലർ കമന്റ് ചെയ്തിട്ടുണ്ട്. ''ഇതിൽ എവിടെയാ കുറവ് പൊളിയല്ലേ'', എന്നാണ് ഒരാൾ കമന്റ് ചെയ്തിരിക്കുന്നത്. ''സ്വാസിക നന്നായി സംസാരിച്ചു, നെഗറ്റീവുകൾ കാര്യമാക്കണ്ട'', എന്നും ചിലർ‌ കമന്റ് ചെയ്തിട്ടുണ്ട്. ഭാഷ പ്രധാനമായും ആശയവിനിമയത്തിനാണ് ഉപയോഗിക്കുന്നതെന്നും അതിനപ്പുറമുള്ളതൊന്നും പ്രധാനമല്ലെന്നും ചിലർ പറയുന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക