ലോഞ്ചിന് മുമ്പേ ഗൂഗിൾ പിക്സൽ 11 പ്രോ ഫോൾഡിന്‍റെ വിവരങ്ങൾ ചോർന്നു; പുതിയ ഡിസൈൻ കണ്ട് ഞെട്ടി ടെക് ലോകം

ഗൂഗിളിന്റെ അടുത്ത തലമുറ ഫോൾഡബിൾ ഫോണായ പിക്സൽ 11 പ്രോ ഫോൾഡിന്റെ പുതിയ ചിത്രങ്ങൾ ചോർന്നു. 'പിക്സൽ ഗ്ലോ' എന്ന പുതിയ ആർജിബി ലൈറ്റിങ് സംവിധാനവും മാറ്റങ്ങൾ വരുത്തിയ ക്യാമറ മൊഡ്യൂളുമാണ് പ്രധാന ആകർഷണങ്ങൾ. മെമ്മറി ചിപ്പുകളുടെ വില വർധിച്ചതിനാൽ ഫോണിന്റെ വില ഉയരാൻ സാധ്യതയുണ്ടെന്നും റിപ്പോർട്ടുകളുണ്ട്.

ഗൂഗിളിന്റെ അടുത്ത തലമുറ ഫ്ലാഗ്ഷിപ്പ് സ്‍മാർട്ട്ഫോൺ നിരയായ പിക്സൽ 11 സീരീസ് അടുത്ത മാസം നടക്കുന്ന 'മെയിഡ് ബൈ ഗൂഗിൾ' പരിപാടിയിൽ അവതരിപ്പിക്കാനിരിക്കെ, പിക്സൽ 11 പ്രോ ഫോൾഡ് സ്മാർട്ട്ഫോണിന്റെ പുതിയ ചിത്രങ്ങൾ ചോർന്നു. പ്രശസ്‍ത ടിപ്സ്റ്റർ ഇവാൻ ബ്ലാസ് പുറത്തുവിട്ട ചിത്രങ്ങളിൽ പുതിയ ഫോൾഡബിൾ ഫോണിന്റെ ഡിസൈനും നിറങ്ങളും വ്യക്തമാണ്.

'പിക്സൽ ഗ്ലോ' ലൈറ്റിങ് പ്രധാന ആകർഷണം

എക്സിൽ പങ്കുവെച്ച ഔദ്യോഗിക ചിത്രങ്ങൾക്ക് സമാനമായ റെൻഡറുകൾ പ്രകാരം, മോസ് നിറത്തിനും കറുപ്പ് നിറത്തിനുമൊപ്പം പിക്സൽ 11 പ്രോ ഫോൾഡ് എത്തും. ഫോണിലെ ഏറ്റവും വലിയ മാറ്റമായി വിലയിരുത്തപ്പെടുന്നത് 'പിക്സൽ ഗ്ലോ' എന്ന പുതിയ ആർജിബി ലൈറ്റിങ് സംവിധാനമാണ്. പിന്നിലെ ക്യാമറ മൊഡ്യൂളിനുള്ളിലാണ് ഈ ആർജിബി ലൈറ്റിങ് നൽകിയിരിക്കുന്നത്. ട്രിപ്പിൾ ക്യാമറ സംവിധാനത്തിനൊപ്പം ഈ ലൈറ്റിങ് ഉൾപ്പെടുത്തിയിരിക്കുന്നത് ചിത്രങ്ങളിൽ വ്യക്തമാണ്. പിക്സൽ 11 സീരീസിലെ എല്ലാ മോഡലുകളിലും ഈ പുതിയ ലൈറ്റിങ് സംവിധാനം ലഭിക്കുമെന്നാണ് റിപ്പോർട്ടുകൾ. അടുത്തിടെ ഗൂഗിൾ പങ്കുവെച്ച പിക്സൽ 11 പ്രോ ടീസറിലും സമാനമായ ലൈറ്റിങ് സംവിധാനം കണ്ടിരുന്നു.

ക്യാമറ ഡിസൈനിൽ ചെറിയ മാറ്റം

പിക്സൽ 10 പ്രോ ഫോൾഡുമായി താരതമ്യം ചെയ്യുമ്പോൾ ക്യാമറ മൊഡ്യൂളിന്റെ രൂപകൽപ്പനയിൽ ചെറിയ മാറ്റങ്ങൾ വരുത്തിയിട്ടുണ്ട്. മുമ്പുണ്ടായിരുന്ന ഒറ്റ ക്യാമറ ഐലൻഡിന് പകരം, രണ്ട് വ്യത്യസ്‍ത നിരകളിലായാണ് ക്യാമറ സെൻസറുകൾ ക്രമീകരിച്ചിരിക്കുന്നത്. ഇതൊഴിച്ചാൽ, ഫോണിന്റെ മൊത്തത്തിലുള്ള രൂപകൽപ്പന മുൻ മോഡലിനോട് ഏറെ സാമ്യമുള്ളതാണ്. ചോർന്ന ചിത്രങ്ങൾ പ്രകാരം 8 ഇഞ്ച് ഫോൾഡിങ് ഇൻനർ ഡിസ്പ്ലേയാണ് ഫോണിലുള്ളത്. അകത്തെ സ്ക്രീനിന്റെ മുകളിലെ വലതുവശ കോണിലാണ് സെൽഫി ക്യാമറ നൽകിയിരിക്കുന്നത്.

വില കൂടാൻ സാധ്യത

മെമ്മറി ചിപ്പുകളുടെ വില വർധിച്ചതിനെ തുടർന്ന് പിക്സൽ 11 പ്രോ എക്സ്എൽ, പിക്സൽ 11 പ്രോ ഫോൾഡ് എന്നീ മോഡലുകളുടെ വില ഗൂഗിൾ വർധിപ്പിച്ചേക്കുമെന്നാണ് റിപ്പോർട്ടുകൾ. വിതരണ ശൃംഖലയുമായി ബന്ധപ്പെട്ട റാം ക്ഷാമമാണ് ഹാർഡ്‌വെയർ വിഭാഗത്തെ ബാധിച്ചതെന്ന് കമ്പനി അധികൃതരെ ഉദ്ധരിച്ച് റിപ്പോർട്ടുകൾ പറയുന്നു. യൂറോപ്യൻ വിപണിയിൽ 256 ജിബി, 512 ജിബി, 1 ടെറാബൈറ്റ് സ്റ്റോറേജ് പതിപ്പുകൾക്ക് യഥാക്രമം 1,999 യൂറോ, 2,129 യൂറോ, 2,389 യൂറോ എന്നിങ്ങനെയായിരിക്കും വിലയെന്നാണ് റിപ്പോർട്ട്. യുകെയിൽ ഇതേ മോഡലുകൾക്ക് 1,799 പൗണ്ട്, 1,919 പൗണ്ട്, 2,149 പൗണ്ട് എന്നിങ്ങനെയായിരിക്കും വില.

ഓഗസ്റ്റ് 12-ന് അവതരണം

ഓഗസ്റ്റ് 12-ന് നടക്കുന്ന 'മെയിഡ് ബൈ ഗൂഗിൾ' പരിപാടിയിലാണ് പിക്സൽ 11 സീരീസ് ഔദ്യോഗികമായി അവതരിപ്പിക്കുക. പരിപാടി അടുത്തെത്തുന്നതിനനുസരിച്ച് പുതിയ സവിശേഷതകളും വില സംബന്ധിച്ച വിവരങ്ങളും പുറത്തുവരുമെന്നാണ് പ്രതീക്ഷിക്കുന്നത്.