200 മെഗാപിക്‌സൽ ടെലിഫോട്ടോ ക്യാമറയുമായി ഹോണർ മാജിക് 8 പ്രോ; ലോഞ്ച് അടുത്ത ആഴ്‌ച

ഈ സ്‌മാർട്ട്‌ഫോൺ സീരീസിൽ ഹോണർ മാജിക് 8, മാജിക് 8 പ്രോ, മാജിക് 8 മിനി, മാജിക് 8 മാക്‌സ് എന്നീ നാല് മോഡലുകൾ ഉൾപ്പെടുമെന്ന് പ്രതീക്ഷിക്കുന്നു. ഫോണുകളുടെ ഫീച്ചറുകള്‍ പുറത്തുവന്നു.

ചൈനീസ് സ്‍മാർട്ട്‌ഫോൺ നിർമ്മാതാക്കളായ ഹോണർ ഉടൻ തന്നെ ഹോണർ മാജിക് 8 സീരീസ് പുറത്തിറക്കും. ലോഞ്ചിന് മുന്നോടിയായി ഈ ഫോണ്‍ ശ്രേണിയിലെ പ്രോ വേരിയന്‍റിന്‍റെ പ്രധാന സവിശേഷതകൾ കമ്പനി വെളിപ്പെടുത്തി. ഈ സ്‍മാർട്ട്‌ഫോണിൽ 200 മെഗാപിക്‌സൽ ടെലിഫോട്ടോ ക്യാമറയും ചില ആർട്ടിഫിഷ്യൽ ഇന്‍റലിജൻസ് (എഐ) സവിശേഷതകളും ഉണ്ടായിരിക്കും. ഹോണർ മാജിക് 8 പ്രോയുടെ വിലവിവരം ഇതുവരെ പുറത്തുവന്നിട്ടില്ല.

ഹോണർ മാജിക് 8 പ്രോ: സവിശേഷതകള്‍

ഹോണർ മാജിക് 8 പ്രോയിൽ f/2.6 അപ്പേർച്ചറുള്ള 200-മെഗാപിക്‌സൽ ടെലിഫോട്ടോ ക്യാമറ ഉണ്ടായിരിക്കുമെന്ന് ഹോണർ വെളിപ്പെടുത്തി മൈ‌ക്രോബ്ലോഗിംഗ് പ്ലാറ്റ്‌ഫോമായ വെയ്‌ബോയിലെ ഒരു പോസ്റ്റിൽ വെളിപ്പെടുത്തി. ക്യാമറ ആൻഡ് ഇമേജിംഗ് പ്രൊഡക്‌ട്‌സ് അസോസിയേഷൻ (CIPA) മാനദണ്ഡങ്ങൾ പാലിക്കുന്ന അഡ്വാൻസ്‌സ് ഇമേജ് സ്റ്റെബിലൈസേഷനോടൊപ്പം, AIMAGE ഹോണർ നോക്‌സ് എഞ്ചിനാണ് ഇമേജ് പ്രോസസിംഗ് നൽകുന്നത്. സ്‌നാപ്ഡ്രാഗൺ 8 എലൈറ്റ് ജെൻ 5 ഫ്ലാഗ്‌ഷിപ്പ് ചിപ്പ് ഹോണർ മാജിക് 8 പ്രോ സ്‌മാർട്ട്‌ഫോണിന് കരുത്തുപകരുന്നു.

ഹോണർ മാജിക് 8 പ്രോയിൽ ക്വാഡ്-കർവ്ഡ് ഡിസ്‌പ്ലേയും വളഞ്ഞ പിൻ പാനലും ഉണ്ടാകുമെന്ന് നേരത്തെ റിപ്പോര്‍ട്ടുകള്‍ സൂചിപ്പിച്ചിരുന്നു. ഹോണർ മാജിക് 7 പ്രോയിലേതിന് സമാനമായി സ്‌ക്രീനിൽ ഒരു പിൽ ആകൃതിയിലുള്ള കട്ടൗട്ടും സ്‍മാർട്ട്‌ഫോണിൽ ഉണ്ടായിരിക്കാം. ഹോണർ മാജിക് 8 പ്രോയിൽ 16 ജിബി വരെ റാമും 1 ടിബി വരെ സ്റ്റോറേജും ഉണ്ടായിരിക്കും. ഇത് മാജിക് ഒഎസ് 10 ഔട്ട്-ഓഫ്-ദി-ബോക്‌സിൽ പ്രവർത്തിക്കും. ഹോണർ മാജിക് 8 സീരീസ് ഒക്ടോബർ 16ന് ചൈനയിൽ ലോഞ്ച് ചെയ്യും. ഈ സ്‌മാർട്ട്‌ഫോൺ സീരീസിൽ ഹോണർ മാജിക് 8, മാജിക് 8 പ്രോ, മാജിക് 8 മിനി, മാജിക് 8 മാക്‌സ് എന്നീ നാല് മോഡലുകൾ ഉൾപ്പെടുമെന്ന് പ്രതീക്ഷിക്കുന്നു. മാജിക് 8, മാജിക് 8 പ്രോ എന്നിവ ആദ്യം ലോഞ്ച് ചെയ്‌തേക്കാം, തുടർന്ന് സ്റ്റാൻഡേർഡ്, പ്രോ വേരിയന്‍റുകൾ ലോഞ്ച് ചെയ്‌തേക്കാം.

ഹോണർ മാജിക് 8 സീരീസില്‍ പുത്തന്‍ കളര്‍ ഓപ്ഷനുകള്‍ 

ഹോണർ മാജിക് 7 സീരീസുമായി താരതമ്യപ്പെടുത്തുമ്പോൾ, വരാനിരിക്കുന്ന സ്‌മാർട്ട്‌ഫോൺ സീരീസിൽ രണ്ട് പുതിയ കളർ ഓപ്ഷനുകൾ ഉണ്ടാകാമെന്ന് ടിപ്‌സ്റ്ററായ ഡിജിറ്റൽ ചാറ്റ് സ്റ്റേഷൻ അടുത്തിടെ റിപ്പോർട്ട് ചെയ്‍തിരുന്നു. ഹോണർ മാജിക് 8 സീരീസ് വെള്ള, ടൈറ്റാനിയം ഗോൾഡ്, സിയാൻ, കറുപ്പ് നിറങ്ങളിൽ ലോഞ്ച് ചെയ്യാം. സുരക്ഷയ്ക്കായി ഈ സ്‌മാർട്ട്‌ഫോണുകളിൽ അൾട്രാസോണിക് ഇൻ-ഡിസ്‌പ്ലേ ഫിംഗർപ്രിന്‍റ് സെൻസർ നൽകാം. ഇവയുടെ ബാറ്ററിക്ക് വയർലെസ് ചാർജിംഗിനെ പിന്തുണയ്ക്കാൻ കഴിയും. ഹോണർ എക്‌സ്7ഡി 5ജി പുറത്തിറക്കിയിരുന്നു. ഈ സ്‌മാർട്ട്‌ഫോണിന് 6.77 ഇഞ്ച് ഡിസ്‌പ്ലേയുണ്ട്. സ്‌നാപ്‌ഡ്രാഗണ്‍ 6എസ് ജെൻ 3 പ്രോസസറാണ് ഇതിലുള്ളത്. ഹോണർ എക്‌സ്7ഡി 5ജി-യിൽ 35 വാട്‌സ് ചാർജിംഗിനുള്ള പിന്തുണയുള്ള 6,500 എംഎഎച്ച് ബാറ്ററിയും ലഭിക്കുന്നു. 6 ജിബി റാമിലും 128 ജിബി സ്റ്റോറേജിലും ഈ സ്‌മാർട്ട്‌ഫോൺ അവതരിപ്പിച്ചിരിക്കുന്നു.