ലാവ അഗ്നി 4 വരുന്നു: വിപണി പിടിക്കാൻ പുതിയ തന്ത്രം?

ലാവ അഗ്നി 4 നവംബറിൽ ഇന്ത്യയിൽ പുറത്തിറങ്ങുമെന്ന് റിപ്പോർട്ട്. ബിഐഎസ് സർട്ടിഫിക്കേഷൻ വെബ്സൈറ്റിൽ കണ്ടെത്തിയ ഈ ഫോണിന് 7,000mAh-ൽ അധികം ബാറ്ററിയും 50 മെഗാപിക്സലിന്റെ ഡ്യുവൽ ക്യാമറയും ഉണ്ടാകുമെന്ന് പ്രതീക്ഷിക്കുന്നു.  

ലാവ അഗ്നി 4 നവംബറിൽ ഇന്ത്യയിൽ പുറത്തിറങ്ങുമെന്ന് റിപ്പോർട്ട്. ഇക്കാര്യം കമ്പനി ഔദ്യോഗികമായി സ്ഥിരീകരിച്ചിട്ടില്ലെങ്കിലും ബ്യൂറോ ഓഫ് ഇന്ത്യൻ സ്റ്റാൻഡേർഡ്‌സ് (ബിഐഎസ്) സർട്ടിഫിക്കേഷൻ വെബ്‌സൈറ്റിൽ ഹാൻഡ്‌സെറ്റിന്‍റെ ഒരു ലിസ്റ്റിംഗ് കണ്ടെത്തിയിട്ടുണ്ട്. ഇത് ഈ ഫോണിന്‍റെ ഉടൻ നടക്കാനിരിക്കുന്ന ലോഞ്ചിനെ സൂചിപ്പിക്കുന്നു. ജൂലൈയിൽ ആദ്യമായി ഓൺലൈനിൽ പ്രത്യക്ഷപ്പെട്ട അഗ്നി സീരീസ് ഹാൻഡ്‌സെറ്റ്, കഴിഞ്ഞ വർഷത്തെ ലാവ അഗ്നി 3 മോഡലിന്റെ പിൻഗാമിയായി അരങ്ങേറുമെന്ന് പ്രതീക്ഷിക്കുന്നു.

വരാനിരിക്കുന്ന ലാവ അഗ്നി 4 5G യുടെ ബിഐഎസ് ലിസ്റ്റിംഗ് LXX525 എന്ന മോഡൽ നമ്പറിൽ ഹാൻഡ്‌സെറ്റ് ഉടൻ ഇന്ത്യയിൽ ലോഞ്ച് ചെയ്യുമെന്ന് വെളിപ്പെടുത്തുന്നു. സെപ്റ്റംബർ 15 ന് ഈ ഹാൻഡ്‌സെറ്റ് ബിഐഎസ് ഡാറ്റാബേസിൽ ലിസ്റ്റ് ചെയ്തതായിട്ടാണ് റിപ്പോർട്ടുകൾ. കമ്പനി അടുത്തിടെ ഫോണിന്റെ കറുത്ത നിറത്തിലുള്ള ഒരു ടീസർ പുറത്തിറക്കിയിരുന്നു. ഇത് ലാവ അഗ്നി 4 നെക്കുറിച്ചുള്ള നിരവധി പ്രധാന വിവരങ്ങൾ വെളിപ്പെടുത്തുന്നു.

ലാവ അഗ്നി 4 ന് ഇന്ത്യയിൽ ഏകദേശം 25,000 രൂപ വില വരുമെന്നാണ് റിപ്പോർട്ടുകൾ. 120Hz റിഫ്രഷ് റേറ്റുള്ള 6.78 ഇഞ്ച് ഫുൾ-എച്ച്ഡി+ ഡിസ്‌പ്ലേ ഇതിൽ ഉണ്ടായിരിക്കാം. 4nm മീഡിയടെക് ഡൈമെൻസിറ്റി 8350 ചിപ്‌സെറ്റും UFS 4.0 സ്റ്റോറേജും ഈ ഹാൻഡ്‌സെറ്റിൽ ഉണ്ടായിരിക്കാൻ സാധ്യതയുണ്ട്. ഫോണിന്‍റെ ബാറ്ററി ശേഷി 7,000mAh-ൽ കൂടുതൽ ആയിരിക്കും എന്നാണ് റിപ്പോർട്ടുകൾ. ലാവ അഗ്നി 4 ന് 50 മെഗാപിക്സലിന്റെ രണ്ട് ക്യാമറകൾ ഉൾപ്പെടുന്ന ഡ്യുവൽ റിയർ ക്യാമറ സജ്ജീകരണമുണ്ടാകുമെന്നും റിപ്പോർട്ടുകൾ പറയുന്നു. ഈ ഹാൻഡ്‌സെറ്റിന്റെ സെൽഫി ക്യാമറയുടെയും ആൻഡ്രോയിഡ് പതിപ്പിന്റെയും വിശദാംശങ്ങൾ നിലവിൽ വെളിപ്പെടുത്തിയിട്ടില്ല.