നത്തിങ് ഫോൺ 4ബി: അപ്രതീക്ഷിത എഡിഷൻ എത്തുന്നു

ജൂലൈ 7-ന് ഇന്ത്യയിൽ അവതരിപ്പിക്കുന്ന നത്തിങ് ഫോൺ 4ബി-യുടെ പുതിയ സ്റ്റോറേജ് വേരിയന്റുകളും നിറങ്ങളും സംബന്ധിച്ച വിവരങ്ങൾ പുറത്തുവന്നു. ക്വാൽക്കം സ്‍നാപ്‍ഡ്രാഗൺ 6 ജെൻ4 പ്രോസസറുമായി എത്തുന്ന ഫോണിന് ഒരു പ്രത്യേക റോയൽ ചാലഞ്ചേഴ്സ് ബെംഗളൂരു (RCB) എഡിഷനും ഉണ്ടാകുമെന്നാണ് സൂചന.  

ഇന്ത്യയിലെ ബജറ്റ് സ്മാർട്ട്ഫോൺ വിപണിയിൽ പുതിയ ചുവടുവെപ്പിന് ഒരുങ്ങി നത്തിങ്. കമ്പനിയുടെ പുതിയ എൻട്രി-ലെവൽ സ്‍മാർട്ട്ഫോണായ നത്തിങ് ഫോൺ 4ബി ജൂലൈ 7-ന് ഇന്ത്യയിൽ അവതരിപ്പിക്കാനിരിക്കെ, ഫോണിന്റെ സ്റ്റോറേജ് വേരിയന്റുകൾ, നിറങ്ങൾ, പ്രത്യേക പതിപ്പ് എന്നിവ സംബന്ധിച്ച വിവരങ്ങൾ പുറത്തുവന്നു. ഇതോടൊപ്പം റോയൽ ചാലഞ്ചേഴ്സ് ബെംഗളൂരു (RCB) എഡിഷൻ അവതരിപ്പിക്കുമെന്ന സൂചനയും ശ്രദ്ധ നേടുകയാണ്.

ടിപ്സ്റ്റർ അഭിഷേക് യാദവിന്റെ റിപ്പോർട്ട് പ്രകാരം, നത്തിങ് ഫോൺ 4ബി നാല് റാം-സ്റ്റോറേജ് വേരിയന്റുകളിലായിരിക്കും ഇന്ത്യൻ വിപണിയിലെത്തുക. അടുത്തിടെ കമ്പനി ടീസ് ചെയ്ത ബ്ലൂ നിറത്തിന് പുറമെ മറ്റ് രണ്ട് കളർ ഓപ്ഷനുകളും ലഭ്യമാകുമെന്നാണ് സൂചന. ഇതിനൊപ്പം പ്രത്യേക RCB എഡിഷൻ മോഡലും കമ്പനി അവതരിപ്പിച്ചേക്കുമെന്നാണ് റിപ്പോർട്ടുകൾ. എന്നാൽ ഈ പ്രത്യേക പതിപ്പിന്റെ സവിശേഷതകളെക്കുറിച്ച് കൂടുതൽ വിവരങ്ങൾ പുറത്തുവന്നിട്ടില്ല. അതേസമയം, നേരത്തെ വന്ന റിപ്പോർട്ടുകളിൽ ഫോൺ 8 ജിബി റാം + 128 ജിബി, 8 ജിബി റാം + 256 ജിബി സ്റ്റോറേജ് വേരിയന്റുകളിൽ മാത്രമേ ലഭ്യമാകൂവെന്നായിരുന്നു സൂചന. പുതിയ ലീക്കുകൾ ഇതിൽ നിന്ന് വ്യത്യസ്തമായ വിവരങ്ങളാണ് നൽകുന്നത്.

സവിശേഷതകളിലേക്ക് വന്നാൽ, ക്വാൽക്കം സ്‍നാപ്‍ഡ്രാഗൺ 6 ജെൻ4 പ്രോസസറായിരിക്കും ഫോണിന് കരുത്തേകുകയെന്നാണ് റിപ്പോർട്ടുകൾ. 120Hz റിഫ്രഷ് റേറ്റുള്ള 6.7 ഇഞ്ച് അമോലെഡ് ഡിസ്പ്ലേ, 50 മെഗാപിക്സൽ പ്രധാന ക്യാമറ, 5,400mAh ബാറ്ററി എന്നിവയും ഫോണിൽ പ്രതീക്ഷിക്കപ്പെടുന്നു. ജൂലൈ 7-ന് വൈകിട്ട് 3.30-നാണ് നത്തിങ് ഫോൺ 4ബി ഇന്ത്യയിൽ ഔദ്യോഗികമായി അവതരിപ്പിക്കുക. ഫ്ലിപ്‍കാർട്ടിലൂടെ ഫോൺ വിൽപ്പനയ്‌ക്കെത്തുമെന്ന് കമ്പനി ഇതിനകം സ്ഥിരീകരിച്ചിട്ടുണ്ട്. കൂടാതെ ബ്ലൂ നിറത്തിലുള്ള മോഡൽ ഉറപ്പാക്കിയിട്ടുമുണ്ട്.

ഡിസൈനിന്റെ കാര്യത്തിൽ നത്തിങ് പിന്തുടരുന്ന വ്യത്യസ്ത ശൈലി ഈ മോഡലിലും തുടരുന്നു. പിന്നിൽ ഫ്ലാറ്റ് പാനലും മുകളിൽ ഇടത് വശത്തായി ഡ്യുവൽ റിയർ ക്യാമറ സംവിധാനവും നൽകിയിട്ടുണ്ട്. നത്തിങ്ങിന്റെ സവിശേഷമായ ഗ്ലിഫ് ബാർ ലൈറ്റിങ് ഇന്റർഫേസും പ്രത്യേക റെഡ് റെക്കോർഡിങ് LED ലൈറ്റും ഫോണിലുണ്ടാകും. മുൻവശത്ത് പഞ്ച്-ഹോൾ ഡിസ്പ്ലേയും വലത് വശത്ത് പവർ ബട്ടണും വോള്യം കൺട്രോളുകളും ഇടത് വശത്ത് മറ്റൊരു പ്രത്യേക ബട്ടണും ഉൾപ്പെടുത്തിയിട്ടുണ്ട്.

ഔദ്യോഗിക പ്രഖ്യാപനത്തിന് ദിവസങ്ങൾ മാത്രം ബാക്കിയിരിക്കെ, ആർസിബി സ്പെഷ്യൽ എഡിഷൻ ഉൾപ്പെടെ പുതിയ വേരിയന്റുകൾ അവതരിപ്പിക്കുമോ എന്നറിയാൻ ടെക് ലോകം ആകാംക്ഷയോടെയാണ് കാത്തിരിക്കുന്നത്.