വൺപ്ലസ് എൻ സീരീസ് ഇന്ത്യയിലേക്ക്; വില 20,000-ൽ താഴെയെന്ന് റിപ്പോർട്ടുകൾ

പ്രമുഖ സ്മാർട്ട്ഫോൺ നിർമ്മാതാക്കളായ വൺപ്ലസ്, "വൺപ്ലസ് N സീരീസ്" എന്ന പേരിൽ പുതിയ എൻട്രി-ലെവൽ സ്മാർട്ട്ഫോൺ ശ്രേണി ഇന്ത്യയിൽ അവതരിപ്പിക്കാൻ ഒരുങ്ങുന്നതായി റിപ്പോർട്ട്. 20,000 രൂപയിൽ താഴെ വില പ്രതീക്ഷിക്കുന്ന ഈ സീരീസിലെ ആദ്യ ഫോൺ അടുത്ത മാസം വിപണിയിലെത്തുമെന്നാണ് സൂചന.  

പ്രമുഖ സ്‍മാർട്ട്ഫോൺ നിർമ്മാതാക്കളായ വൺപ്ലസ് ഇന്ത്യയിൽ പുതിയ എൻട്രി-ലെവൽ സ്മാർട്ട്ഫോൺ ശ്രേണി അവതരിപ്പിക്കാൻ ഒരുങ്ങുന്നതായി റിപ്പോർട്ട്. ടിപ്പ്സ്റ്റർ യോഗേഷ് ബ്രാർ സോഷ്യൽ മീഡിയ പ്ലാറ്റ്ഫോമായ എക്സിൽ പങ്കുവെച്ച വിവരങ്ങൾ പ്രകാരം, “വൺപ്ലസ് N സീരീസ്” എന്ന പേരിലായിരിക്കും ഈ പുതിയ സ്‍മാർട്ട്ഫോണുകൾ വിപണിയിലെത്തുക. ഈ സീരീസിലെ ആദ്യ സ്മാർട്ട്ഫോൺ അടുത്ത മാസം, അതായത് ജൂലൈയിൽ തന്നെ ഇന്ത്യയിൽ അവതരിപ്പിക്കുമെന്നാണ് സൂചന.

പുതിയ N സീരീസ് മോഡലുകളുടെ ചില വകഭേദങ്ങൾക്ക് 20,000 രൂപയിൽ താഴെയായിരിക്കും വില എന്നാണ് റിപ്പോർട്ടുകൾ. ഇത് സംഭവിച്ചാൽ, നിലവിൽ വൺപ്ലസിന്റെ ഏറ്റവും കുറഞ്ഞ വിലയുള്ള സ്മാർട്ട്ഫോണായി കണക്കാക്കപ്പെടുന്ന വൺപ്ലസ് നോർഡ് CE 6 ലൈറ്റിനെക്കാൾ കുറഞ്ഞ വിലയിൽ പുതിയ മോഡലുകൾ ലഭ്യമാകും. എന്നാൽ, ഈ വിവരങ്ങൾ സംബന്ധിച്ച് വൺപ്ലസ് ഇതുവരെ ഔദ്യോഗിക സ്ഥിരീകരണം നൽകിയിട്ടില്ല.

മെയ് 7-ന് ഇന്ത്യയിൽ അവതരിപ്പിച്ച വൺപ്ലസ് നോർഡ് CE 6 ലൈറ്റിന്റെ അടിസ്ഥാന മോഡലിന് 20,999 രൂപയാണ് പ്രാരംഭ വില. 6 ജിബി റാം, 128 ജിബി സ്റ്റോറേജ് എന്നിവയുള്ള ഈ മോഡലിനൊപ്പം, 8 ജിബി റാം, 128 ജിബി സ്റ്റോറേജ് വേരിയന്റിന് 22,999 രൂപയാണ് വില നിശ്ചയിച്ചിരിക്കുന്നത്. സവിശേഷതകളിലേക്ക് നോക്കുമ്പോൾ, വൺപ്ലസ് നോർഡ് CE 6 ലൈറ്റിൽ 6.72 ഇഞ്ച് ഫുൾ HD+ LCD ഡിസ്പ്ലേയാണ് നൽകിയിരിക്കുന്നത്. 144Hz വരെ റിഫ്രഷ് റേറ്റ്, 1,000 നിറ്റ്സ് വരെ പീക്ക് ബ്രൈറ്റ്നസ്, 240Hz ടച്ച് സാംപ്ലിംഗ് റേറ്റ് എന്നിവയും ഇതിലുണ്ട്. പൊടി, വെള്ളം എന്നിവയിൽ നിന്ന് സംരക്ഷണം നൽകുന്ന IP64 റേറ്റിംഗും MIL-STD-810H സർട്ടിഫിക്കേഷനും ഫോണിന് ലഭിച്ചിട്ടുണ്ട്.

പെർഫോമൻസിനായി മീഡിയടെക് ഡൈമെൻസിറ്റി 7400 ഏപെക്സ് പ്രോസസറും ARM Mali-G615 GPUവുമാണ് ഫോണിൽ ഉൾപ്പെടുത്തിയിരിക്കുന്നത്. ക്യാമറ വിഭാഗത്തിൽ 50 മെഗാപിക്സൽ പ്രധാന സെൻസറിനൊപ്പം 2 മെഗാപിക്സൽ സെക്കൻഡറി ക്യാമറയും നൽകിയിട്ടുണ്ട്. സെൽഫികൾക്കും വീഡിയോ കോളുകൾക്കുമായി 8 മെഗാപിക്സൽ ഫ്രണ്ട് ക്യാമറയും സജ്ജീകരിച്ചിട്ടുണ്ട്. 7,000mAh ശേഷിയുള്ള വലിയ ബാറ്ററിയാണ് ഫോണിന്റെ മറ്റൊരു പ്രധാന ആകർഷണം. 45W ഫാസ്റ്റ് ചാർജിംഗിനും 10W റിവേഴ്സ് വയർഡ് ചാർജിംഗിനും ഇത് പിന്തുണ നൽകുന്നു.

ഇന്ത്യൻ ബജറ്റ് സ്മാർട്ട്ഫോൺ വിപണിയിൽ മത്സരം ശക്തമാകുന്ന സാഹചര്യത്തിൽ, വൺപ്ലസിന്റെ പുതിയ N സീരീസ് അവതരിപ്പിക്കപ്പെടുകയാണെങ്കിൽ ഉപഭോക്താക്കൾക്ക് കൂടുതൽ വിലക്കുറവിൽ മികച്ച സവിശേഷതകളുള്ള സ്മാർട്ട്ഫോണുകൾ ലഭിക്കാനുള്ള സാധ്യത വർധിക്കുമെന്നാണ് ടെക്ക് വിപണി നിരീക്ഷകരുടെ വിലയിരുത്തൽ.