ക്യാമറയില്‍ തകര്‍ക്കാന്‍ റിയൽമി 15 പ്രോ 5ജി, 7000 എംഎഎച്ച് ബാറ്ററി ചരിത്രത്തിലെ ഏറ്റവും വലുത്; ഇന്ത്യന്‍ ലോഞ്ച് ജൂലൈ 24ന്

റിയൽമി 15 പ്രോ 5ജിയിൽ 50 മെഗാപിക്സൽ സോണി IMX896 പിൻ ക്യാമറ ലഭിക്കും

തിരുവനന്തപുരം: റിയൽമി 15 പ്രോ 5ജി ജൂലൈ 24-ന് ഇന്ത്യയിൽ റിയൽമി 15 5ജി-ക്കൊപ്പം അവതരിപ്പിക്കാനിരിക്കുകയാണ്. വരാനിരിക്കുന്ന ഹാൻഡ്‌സെറ്റിന്‍റെ നിരവധി പ്രധാന സവിശേഷതകൾ ഇതിനകം പുറത്തുവന്നു. ഇപ്പോൾ, പ്രോ വേരിയന്‍റിന്‍റെ ക്യാമറ വിശദാംശങ്ങൾ കമ്പനി വെളിപ്പെടുത്തി. റിയൽമി 15 പ്രോ-യുടെ പ്രധാന റിയര്‍ ക്യാമറ സെൻസറും വീഡിയോ റെക്കോർഡിംഗ് ശേഷിയും പുറത്തുവന്നു. റിയൽമി 15 5ജി ശ്രേണി ഫോണുകളില്‍ എഐ എഡിറ്റ് ജെനി, എഐ പാർട്ടി തുടങ്ങിയ ആര്‍ട്ടിഫിഷ്യല്‍ ഇന്‍റലിജന്‍സ് പിന്തുണയുള്ള എഡിറ്റിംഗ് സവിശേഷതകൾ ലഭിക്കും.

ട്രിപ്പിള്‍ റിയര്‍ ക്യാമറ

റിയൽമി 15 പ്രോ 5ജി-യിൽ ട്രിപ്പിൾ റിയർ ക്യാമറ യൂണിറ്റ് ഉണ്ടായിരിക്കും. അതിൽ 50 മെഗാപിക്സൽ സോണി ഐഎംഎക്സ്896 പ്രൈമറി സെൻസറും ഒപ്റ്റിക്കൽ ഇമേജ് സ്റ്റെബിലൈസേഷൻ (ഒഐഎസ്) പിന്തുണയും ഉൾപ്പെടുമെന്ന് കമ്പനി വെളിപ്പെടുത്തി. ഫ്രണ്ട്, റിയർ ക്യാമറകളിൽ 60fps-ൽ 4കെ നിലവാരത്തിലുള്ള വീഡിയോ റെക്കോർഡിംഗ് സാധ്യമാകുമെന്ന് കമ്പനി കൂട്ടിച്ചേർത്തു.

മുമ്പത്തെ റിയൽമി 14 പ്രോ 5ജി-യെ അപേക്ഷിച്ച് 15 പ്രോ 5ജി 4എക്സ് ക്ലിയറര്‍ സൂമും 2എക്സ് സ്‌മൂത്തര്‍ ട്രാന്‍സിഷനും വാഗ്ദാനം ചെയ്യുമെന്ന് റിയൽമി അവകാശപ്പെടുന്നു. വരാനിരിക്കുന്ന ഹാൻഡ്‌സെറ്റിലെ ക്യാമറ എഐ മാജിക്‌ഗ്ലോ 2.0 സവിശേഷതയെ പിന്തുണയ്ക്കും. ഇത് ചിത്രങ്ങള്‍ക്കും വീഡിയോകള്‍ക്കും കൂടുതൽ സ്വാഭാവിക നിറങ്ങൾ നൽകുമെന്നാണ് റിപ്പോർട്ടുകൾ.

കൂടുതല്‍ എഐ ഫീച്ചറുകള്‍

റിയൽമി 15 5ജി സീരീസ് ഫോണുകളിലെ എഐ പാർട്ടി മോഡ്, ഷട്ടർ സ്‌പീഡ്, കോൺട്രാസ്റ്റ്, സാച്ചുറേഷൻ എന്നിവ തത്സമയം ഓട്ടോമാറ്റിക്കായി ക്രമീകരിക്കുന്നതിന് സീൻ ഡിറ്റക്ഷൻ ഉപയോഗിക്കും. അതേസമയം, വോയ്‌സ് നിയന്ത്രിത എഐ എഡിറ്റ് ജെനി 20-ൽ അധികം ഭാഷകളെ പിന്തുണയ്ക്കും.

റിയൽമി 15 പ്രോ 5ജി-യിൽ 4ഡി കർവ്+ ഡിസ്‌പ്ലേ, 144 ഹെര്‍ട്സ് റിഫ്രഷ് റേറ്റ്, 6,500 നിറ്റ്സ് പീക്ക് ബ്രൈറ്റ്‌നസ് ലെവൽ, 94 ശതമാനം സ്‌ക്രീൻ-ടു-ബോഡി അനുപാതം, 2,500 ഹെര്‍ട്സ് ടച്ച് സാമ്പിൾ നിരക്ക്, കോർണിംഗ് ഗൊറില്ല ഗ്ലാസ് സംരക്ഷണം എന്നിവ ഉണ്ടായിരിക്കും. പൊടി, ജല പ്രതിരോധം എന്നിവയ്‌ക്കായി ഹാൻഡ്‌സെറ്റിന് ഐപി69 റേറ്റിംഗാണ് ഉള്ളത്.

റിയൽമി 15 പ്രോ 5ജി ഹാൻഡ്‌സെറ്റ് സ്‌നാപ്ഡ്രാഗൺ 7 ജെൻ 4 SoC-യുമായി വരുമെന്ന് സ്ഥിരീകരിച്ചു. ഇത് 20fps ഗെയിംപ്ലേയും ജിടി ബൂസ്റ്റ് 3.0, ഗെയിമിംഗ് കോച്ച് 2.0 സാങ്കേതികവിദ്യകളും പിന്തുണയ്ക്കും. 80 വാട്സ് വയർഡ് ഫാസ്റ്റ് ചാർജിംഗ് പിന്തുണയുള്ള 7,000 എംഎഎച്ച് ബാറ്ററിയാണ് ഈ ഫോണിനുള്ളത്. റിയല്‍മിയുടെ ഏതൊരു സ്മാര്‍ട്ട്‌ഫോണിലെയും ഏറ്റവും വലിയ ബാറ്ററിയാണിത്. ഫോണിന് 7.69 എംഎം കട്ടി ഉണ്ടാകും. വാനില റിയൽമി 15 5ജി-ക്കൊപ്പം പ്രോ വേരിയന്‍റും ജൂലൈ 24-ന് വൈകുന്നേരം 7 മണിക്ക് ഇന്ത്യയിൽ ലോഞ്ച് ചെയ്യും. ഫ്ലോയിംഗ് സിൽവർ, സിൽക്ക് പിങ്ക്, സിൽക്ക് പർപ്പിൾ, വെൽവെറ്റ് ഗ്രീൻ എന്നീ നിറങ്ങളിൽ ഫ്ലിപ്പ്കാർട്ട് വഴിയും റിയൽമി ഇന്ത്യ ഇ-സ്റ്റോർ വഴിയും ഹാൻഡ്‌സെറ്റുകൾ ലഭ്യമാകും.