ലോഞ്ചിന് മുമ്പ് ഐഫോൺ 17ഇ സവിശേഷതകൾ ചോർന്നു; വില എത്രയാകും?

ആപ്പിളിന്‍റെ ബജറ്റ്-ഫ്രണ്ട്‌ലി എന്ന വിശേഷണത്തോടെ ഐഫോൺ 17ഇ (iPhone 17e) സ്‌മാര്‍ട്ട്‌ഫോണ്‍ ഉടൻ പുറത്തിറങ്ങും. ഐഫോൺ 17ഇയുടെ സവിശേഷതകള്‍ സംബന്ധിച്ച നിരവധി ലീക്കേജുകളും പുറത്തുവന്നു. ലോഞ്ചിന് മുമ്പ് ഐഫോൺ 17ഇയെ കുറിച്ച് ഇതുവരെ അറിവായ സവിശേഷതകള്‍ അറിയാം. 

ഡിസ്പ്ലേ

ഐഫോൺ 17ഇ ഫോണിൽ 6.1 ഇഞ്ച് ഡിസ്‌പ്ലേ ഉണ്ടാകുമെന്നാണ് റിപ്പോർട്ടുകൾ. ഫോണിൽ ഒരു ഡൈനാമിക് ഐലൻഡ് ഉണ്ടാകുമെന്നും പ്രതീക്ഷിക്കുന്നു. ടൈമറുകൾ, ആപ്പ് അലേർട്ടുകൾ തുടങ്ങിയ വിവിധ അറിയിപ്പുകൾ ഇതിലുണ്ടാകാം. ഐഫോണ്‍ 17ഇയുടെ ഡിസ്‌പ്ലേ ഡിസൈൻ ഐഫോൺ 15ന് സമാനമായിരിക്കാമെന്ന് പറയപ്പെടുന്നു. ഫോണിന് 60 ഹെര്‍ട്‌സ് റിഫ്രഷ് റേറ്റ് ലഭിച്ചേക്കും.

പ്രോസസർ

ഐഫോൺ 17ഇയിൽ ആപ്പിളിന്‍റെ എ19 ചിപ്‌സെറ്റ് ഉണ്ടാകും. രണ്ട് പെർഫോമൻസ് കോറുകളും നാല് എഫിഷ്യൻസി കോറുകളും ഉള്ള ഒരു ഹെക്‌സാ-കോർ ചിപ്‌സെറ്റ് ഈ ഫോണിലുണ്ടാവുക എന്നുമാണ് സൂചന. ക്വാഡ്-കോർ ജിപിയുവും ഇതിൽ ഉണ്ടാകാം. നൂതന എഐ സവിശേഷതകൾ അനുവദിക്കുന്ന ഒരു ന്യൂറൽ എഞ്ചിൻ, ന്യൂറൽ ആക്‌സിലറേറ്റർ പിന്തുണ എന്നിവയും പ്രതീക്ഷിക്കുന്നു. മെച്ചപ്പെട്ട പവർ കാര്യക്ഷമതയും പ്രകടനവും വാഗ്ദാനം ചെയ്യുമെന്ന് അവകാശപ്പെടുന്ന കമ്പനിയുടെ അപ്‌ഡേറ്റ് ചെയ്ത N3P 3nm പ്രോസസിലാണ് ഇത് നിർമ്മിച്ചിരിക്കുന്നതെന്ന് റിപ്പോർട്ടുണ്ട്. ഐഫോൺ 17ഇയില്‍ 8ജിബി റാമും ഉണ്ടാവാനിടയുണ്ട്.

ക്യാമറ

ഐഫോൺ 17ഇയിൽ ഒരൊറ്റ റിയര്‍ ക്യാമറ പ്രതീക്ഷിച്ചാല്‍ മതിയെന്നും ലീക്കുകള്‍ പറയുന്നു. ഫോണിന് പിന്നിൽ 48-മെഗാപിക്സൽ പ്രധാന ക്യാമറ ഉണ്ടാകുമെന്നാണ് സൂചന. എൽഇഡി ഫ്ലാഷിനൊപ്പം പിന്നിലുള്ള ഒരേയൊരു ക്യാമറ ഇതായിരിക്കും. സെൽഫികൾക്കും വീഡിയോ കോളിംഗിനും സെന്‍റർ സ്റ്റേജ് പിന്തുണയുള്ള 18 മെഗാപിക്സൽ മുൻ ക്യാമറ ഫോണിൽ ഉണ്ടായിരിക്കാം. ഐഫോൺ 17ഇയിലെ എ19 ചിപ്‌സെറ്റ് ഫോട്ടോഗ്രാഫി മെച്ചപ്പെടുത്താൻ സഹായിക്കുമെന്ന് റിപ്പോർട്ട്.

ബാറ്ററി

ഐഫോൺ 17ഇയുടെ ബാറ്ററിയെക്കുറിച്ച് കൂടുതൽ വിവരങ്ങൾ ലഭ്യമല്ല. ആപ്പിൾ ബാറ്ററി ശേഷി വെളിപ്പെടുത്തിയിട്ടില്ല. എങ്കിലും ഫോണിന് ഒരു ദിവസം മുഴുവൻ ബാറ്ററി ലൈഫ് ഉണ്ടെന്ന് പൊതുവെ അവകാശപ്പെടുന്നു. റിപ്പോർട്ടുകൾ സൂചിപ്പിക്കുന്നത് ഫോണിന് 4000 എംഎഎച്ച് അല്ലെങ്കിൽ അൽപ്പം വലിയ 4061 എംഎഎച്ച് ബാറ്ററി പായ്ക്ക് ഉണ്ടായിരിക്കുമെന്നാണ്. ഫോൺ 20 വാട്‌സ് വയർഡ് ചാർജിംഗിനെ പിന്തുണയ്ക്കും. വയർലെസ് ചാർജിംഗിന് അനുവദിക്കുന്ന മാഗ്‍സേഫ് സപ്പോർട്ട് ഐഫോൺ 17ഇയിൽ ഉൾപ്പെടുത്തുമെന്നും റിപ്പോര്‍ട്ടുകളുണ്ട്. ഇത് 20 വാട്‌സ് ചാർജിംഗ് വേഗതയെ പിന്തുണയ്ക്കും.

വില

ഐഫോൺ 17ഇയുടെ വില അറിയാൻ എല്ലാവരും ആകാംക്ഷയോടെ കാത്തിരിക്കുകയാണ്. മുമ്പത്തെ ഐഫോൺ 16ഇയുടെ 128 ജിബി വേരിയന്‍റിന് ഇന്ത്യയിൽ 59,900 രൂപ ആയിരുന്നു വില. 256 ജിബി വേരിയന്‍റിന് 69,900 ഉം 512 ജിബി വേരിയന്‍റിന് 89,900 രൂപയും ആണ് വില. ഐഫോൺ 17ഇയുടെ വില 60,000 രൂപയ്‌ക്കും 70,000 രൂപയ്‌ക്കും ഇടയിലാകാനാണ് സാധ്യത.