മഴക്കാലത്ത് ഫുഡ് പോയിസണിംഗ് എങ്ങനെ തടയാം? അടുക്കളയിൽ ശ്രദ്ധിക്കേണ്ട കാര്യങ്ങൾ

മഴക്കാലത്ത് വായുവിലെ ഈർപ്പവും അന്തരീക്ഷ ഊഷ്മാവും കാരണം ഭക്ഷണപദാർത്ഥങ്ങളിൽ ബാക്ടീരിയകളും മറ്റ് രോഗാണുക്കളും വേഗത്തിൽ വളരാൻ സാധ്യതയുണ്ട്. ഭക്ഷണം പാകം ചെയ്യുമ്പോൾ ഈ അബദ്ധങ്ങൾ ഒഴിവാക്കാം.

പഴങ്ങളും പച്ചക്കറികളും നന്നായി കഴുകാം

പഴങ്ങളും പച്ചക്കറികളും കഴിക്കുന്നതിനോ പാകം ചെയ്യുന്നതിനോ മുൻപായി ഒഴുകുന്ന വെള്ളത്തിൽ നന്നായി കഴുകിയെടുക്കണം. ഭക്ഷണം തയ്യാറാക്കുന്നതിന് മുൻപും ശേഷവും, അതുപോലെ ഭക്ഷണം കഴിക്കുന്നതിന് മുൻപും കുറഞ്ഞത് 20 സെക്കൻഡ് സോപ്പ് ഉപയോഗിച്ച് കൈകൾ വൃത്തിയായി കഴുകാൻ ശ്രദ്ധിക്കണം.

ഭക്ഷണ സാധനങ്ങൾ വേർതിരിച്ച് സൂക്ഷിക്കാം

മാംസം, കോഴിയിറച്ചി, സീഫുഡ്, മുട്ട എന്നിവ പാകം ചെയ്തതോ കഴിക്കാൻ തയ്യാറായതോ ആയ മറ്റ് ഭക്ഷണസാധനങ്ങളുമായി കൂട്ടിക്കലർത്തരുത്. അസംസ്കൃത ഭക്ഷണങ്ങളിൽ നിന്നുള്ള ഹാനികരമായ ബാക്ടീരിയകൾ അടുക്കളയിലെ പ്രതലങ്ങളിലേക്കും മറ്റ് ചേരുവകളിലേക്കും പടരുന്നത് തടയാൻ ഇവ വേവ്വേറെ സൂക്ഷിക്കേണ്ടത് അത്യാവശ്യമാണ്.

ഭക്ഷണം നന്നായി വേവിച്ച് കഴിക്കാം

ഹാനികരമായ രോഗാണുക്കൾ നശിക്കുന്നതിനായി ഭക്ഷണം ശരിയായ താപനിലയിൽ നന്നായി വേവിച്ചെടുക്കണം. മാംസവും മറ്റും ശരിയായി വെന്തിട്ടുണ്ടോ എന്ന് സംശയമുണ്ടെങ്കിൽ ഫുഡ് തെർമോമീറ്റർ ഉപയോഗിച്ച് താപനില പരിശോധിക്കാവുന്നതാണ്.

ഭക്ഷണം സുരക്ഷിതമായി തണുപ്പിച്ച് സൂക്ഷിക്കാം

സാധാരണ അന്തരീക്ഷ താപനിലയിൽ ഭക്ഷണം കൂടുതൽ സമയം വെച്ചാൽ ബാക്ടീരിയകൾ വേഗത്തിൽ പെരുകും. പെട്ടെന്ന് കേടാകുന്ന ഭക്ഷണങ്ങൾ കുറഞ്ഞ താപനിലയിൽ റെഫ്രിജറേറ്ററിലും അല്ലെങ്കിൽ ഫ്രീസറിലും സൂക്ഷിക്കുക. പാകം ചെയ്ത ഭക്ഷണം തയ്യാറാക്കി 2 മണിക്കൂറിനുള്ളിൽ തന്നെ ഫ്രിഡ്ജിലേക്ക് മാറ്റുന്നതാണ് ഏറ്റവും ഉചിതം.