ക്രെഡിറ്റ് കാർഡ് ഉപയോക്താക്കളുടെ ശ്രദ്ധയ്ക്ക്; പുതിയ നിയമങ്ങൾ വരുന്നു! ബിൽ പേയ്‌മെന്റ് മുതൽ റിവാർഡ് വരെ എല്ലാം മാറും

2026 ഏപ്രിൽ 1 മുതൽ പ്രാബല്യത്തിൽ വരുന്ന പുതിയ ആദായനികുതി നിയമങ്ങളുടെ കരട് രൂപത്തിൽ ക്രെഡിറ്റ് കാർഡുമായി ബന്ധപ്പെട്ട് നിരവധി സുപ്രധാന മാറ്റങ്ങൾ ആദായനികുതി വകുപ്പ് നിർദ്ദേശിച്ചിട്ടുണ്ട്.

ക്രെഡിറ്റ് കാർഡ്

നിങ്ങൾ ക്രെഡിറ്റ് കാർഡ് ഉപയോഗിക്കുന്ന ആളാണോ? എങ്കിൽ നിരവധി പ്രധാന മാറ്റങ്ങളാണ് വരാൻ പോകുന്നത്. 2026 ഏപ്രിൽ 1 മുതൽ പ്രാബല്യത്തിൽ വരുന്ന ആദായനികുതി നിയമങ്ങളുടെ കരട് രൂപത്തിലാണ് ഈ മാറ്റങ്ങൾ നിർദ്ദേശിച്ചിരിക്കുന്നത്. ഇവ അന്തിമ നിയമമാകുമ്പോൾ പ്രാബല്യത്തിൽ വരും.

പ്രധാന മാറ്റം

ക്രെഡിറ്റ് കാർഡ് ഉപയോക്താക്കൾക്ക് വരുന്ന മാറ്റങ്ങളിൽ ആദ്യത്തേത് ഇതാണ്. ഒരു സാമ്പത്തിക വർഷത്തിൽ ഒന്നോ അതിലധികമോ ക്രെഡിറ്റ് കാർഡുകളിലൂടെ നിങ്ങൾ 10 ലക്ഷം രൂപയിൽ (1 മില്യൺ) കൂടുതൽ അടയ്ക്കുന്നുണ്ടെങ്കിൽ, ബന്ധപ്പെട്ട ബാങ്ക് ഈ വിവരം ആദായനികുതി വകുപ്പിനെ അറിയിക്കും.

ക്രെഡിറ്റ് കാർഡ് സ്റ്റേറ്റ്മെന്റ്

രണ്ടാമത്തെ മാറ്റം: ഇനി മുതൽ പാൻ കാർഡിന് അപേക്ഷിക്കുമ്പോൾ വിലാസം തെളിയിക്കുന്ന രേഖയായി ക്രെഡിറ്റ് കാർഡ് സ്റ്റേറ്റ്മെൻറ് ഉപയോഗിക്കാം. മൂന്നാമത്തെ മാറ്റം: ഓൺലൈനായി ആദായനികുതി അടയ്ക്കാൻ ക്രെഡിറ്റ് കാർഡുകൾ ഉപയോഗിക്കാൻ അനുവദിച്ചേക്കും. ഇതുവരെ നെറ്റ് ബാങ്കിംഗ്, ഡെബിറ്റ് കാർഡുകൾ വഴിയായിരുന്നു ഇത് സാധ്യമായിരുന്നത്.

പാൻ കാർഡ് നിർബന്ധമാക്കും

നാലാമത്തെ മാറ്റം: പുതിയ ക്രെഡിറ്റ് കാർഡിന് അപേക്ഷിക്കുമ്പോൾ പാൻ കാർഡ് നൽകുന്നത് നിർബന്ധമാക്കും. അഞ്ചാമത്തെ മാറ്റം: ഒരു കമ്പനി ജീവനക്കാർക്ക് ക്രെഡിറ്റ് കാർഡ് നൽകുകയും, ബിൽ തുക കമ്പനി അടയ്ക്കുകയും ചെയ്യുന്നുണ്ടെങ്കിൽ, ആ ചെലവ് ഔദ്യോഗിക ആവശ്യങ്ങൾക്ക് മാത്രമുള്ളതല്ലെങ്കിൽ, അത് നികുതിക്ക് വിധേയമായേക്കാം.