കണ്ണിലെ കറുത്ത പാടുകൾ ഉറക്കക്കുറവ് കൊണ്ട് മാത്രമല്ല; പിന്നിലെ യഥാർത്ഥ കാരണങ്ങൾ ഇതാണ്

രാത്രിയിൽ നന്നായി ഉറങ്ങുന്ന ആളുകളിൽ പോലും ചിലപ്പോൾ ഡാർക്ക് സർക്കിൾസ് കാണാറുണ്ട്.

കണ്ണുകൾക്ക് താഴെയുണ്ടാകുന്ന ഡാർക്ക് സർക്കിൾസ് വെറും ഉറക്കക്കുറവിന്റെയോ ഉറക്കമില്ലായ്മയുടെയോ മാത്രം പ്രശ്നം കൊണ്ട് വരുന്നതല്ല. നിങ്ങളുടെ ഉറക്കവുമായി ബന്ധപ്പെട്ട ശീലങ്ങൾക്കപ്പുറം ശരീരത്തിലെ കൂടുതൽ സങ്കീർണ്ണമായ ചില മാറ്റങ്ങളുടെ സൂചനയാകാം ഇവ. രാത്രിയിൽ നന്നായി ഉറങ്ങുന്ന ആളുകളിൽ പോലും ചിലപ്പോൾ ഡാർക്ക് സർക്കിൾസ് കാണാറുണ്ട്. പാരമ്പര്യം, കണ്ണിന്റെ ഘടന, അലർജികൾ, പോഷകാഹാരക്കുറവ്, ജീവിതശൈലി, പ്രായം എന്നിവയെല്ലാം ഇതിന് കാരണമാകാം. ഇക്കാര്യങ്ങൾ ശ്രദ്ധിക്കൂ.

1. പാരമ്പര്യം

ചില ആളുകളിൽ ഡാർക്ക് സർക്കിൾസ് പാരമ്പര്യമായി ഉണ്ടാകുന്നതാണ്. കണ്ണിന് താഴെ മെലാനിന്റെ ഉത്പാദനം കൂടുന്നത് മൂലം ചെറുപ്രായത്തിൽ തന്നെ ചിലരിൽ ഇവ കാണാറുണ്ട്. ഇത് ജനിതകപരമായ കാരണങ്ങളാലാണെങ്കിൽ, ജീവിതശൈലി മാറ്റങ്ങൾ കൊണ്ട് മാത്രം ഈ പ്രശ്നം പൂർണ്ണമായി പരിഹരിക്കാൻ കഴിയുകയില്ല.

2. ചർമ്മം മെലിയുന്നതും രക്തക്കുഴലുകളും

നമ്മുടെ ശരീരത്തിൽ ഏറ്റവും കനം കുറഞ്ഞ ചർമ്മമുള്ളത് കണ്ണിന് താഴെയാണ്. മുഖത്തെ മറ്റ് ഭാഗങ്ങളിൽ ചർമ്മത്തിന് 2 മില്ലിമീറ്ററോളം കനമുള്ളപ്പോൾ കണ്ണിന് താഴെ ഇത് വെറും 0.5 മില്ലിമീറ്റർ മാത്രമാണ്. പ്രായമാകുന്തോറും ഈ ചർമ്മത്തിന്റെ കനവും ഇലാസ്തികതയും വീണ്ടും കുറയുന്നു. ചർമ്മം മെലിയുമ്പോൾ അതിനടിയിലെ രക്തക്കുഴലുകൾ പുറത്തേക്ക് തെളിഞ്ഞു കാണാൻ തുടങ്ങും. ഇത് കണ്ണിന് താഴെ നിറ വ്യത്യാസത്തിന് കാരണമാകുന്നു.

3. അലർജികൾ

പലരും ശ്രദ്ധിക്കാതെ പോകുന്ന ഒന്നാണ് അലർജി പ്രശ്നങ്ങൾ. അലർജിക് റിനിറ്റിസ് പോലുള്ള അവസ്ഥകൾ കണ്ണിന് ചുറ്റുമുള്ള രക്തക്കുഴലുകളിൽ തടസ്സങ്ങൾ ഉണ്ടാക്കുകയും അത് കറുപ്പ് നിറത്തിന് കാരണമാകുകയും ചെയ്യും. പൂമ്പൊടി, പൊടിപടലങ്ങൾ, വളർത്തുമൃഗങ്ങളുടെ രോമങ്ങൾ അന്തരീക്ഷ മലിനീകരണം എന്നിവയെല്ലാം അലർജി വരാൻ കാരണമാകുന്നവയാണ്. അലർജിക്കുള്ള കൃത്യമായ ചികിത്സ ഉറപ്പാക്കുന്നത് വഴി കണ്ണിന് താഴെയുള്ള കറുപ്പ് വലിയൊരു പരിധി വരെ കുറയ്ക്കാൻ സാധിക്കും.

4. വിളർച്ചയും പോഷകാഹാരക്കുറവും

ശരീരത്തിലെ പോഷകങ്ങളുടെ കുറവ് കാരണവും കണ്ണിൽ കറുപ്പ് വരാം. അയണിന്റെ കുറവ് മൂലം വിളർച്ച ഉണ്ടാകുമ്പോൾ കോശങ്ങളിലേക്കുള്ള ഓക്സിജൻ പ്രവാഹം കുറയുകയും ചർമ്മം വിളറി വെളുക്കുകയും ചെയ്യുന്നു. ഇത് കറുത്ത പാടുകളെ കൂടുതൽ വ്യക്തമായി കാണിക്കും. കൂടാതെ വിറ്റാമിൻ ബി12, വിറ്റാമിൻ സി എന്നിവയുടെ കുറവും ചർമ്മത്തിന്റെ നിറവ്യത്യാസത്തിനും ക്ഷീണത്തിനും കൊളാജൻ ഉത്പാദനം കുറയുന്നതിനും കാരണമാകുന്നുണ്ട്.

5. നിർജ്ജലീകരണവും വെയിലിന്റെ ആഘാതവും

നമ്മുടെ ചില ദൈനംദിന ശീലങ്ങളും ഇതിന് ആക്കം കൂട്ടാറുണ്ട്. ശരീരത്തിൽ വെള്ളത്തിന്റെ അളവ് കുറയുന്നത് ചർമ്മത്തിന്റെ തിളക്കം നഷ്ടപ്പെടുത്തുകയും കണ്ണുകൾ കുഴിഞ്ഞു പോകാൻ കാരണമാകുകയും ചെയ്യും. വരണ്ട ചർമ്മം കറുത്ത പാടുകളെ കൂടുതൽ എടുത്തു കാണിക്കും. അതുപോലെ അമിതമായി വെയിൽ കൊള്ളുന്നത് മെലാനിൻ വർദ്ധിപ്പിക്കുകയും ചർമ്മത്തിന് വേഗത്തിൽ പ്രായം തോന്നിപ്പിക്കുകയും ചെയ്യും. അതിനാൽ ആവശ്യത്തിന് വെള്ളം കുടിക്കുന്നതും സൺസ്ക്രീൻ ഉപയോഗിക്കുന്നതും കണ്ണിന് താഴെയുള്ള ചർമ്മത്തെ സംരക്ഷിക്കാൻ സഹായിക്കും.

6. പ്രായമാകുമ്പോൾ

പ്രായമാകുമ്പോൾ മുഖത്തിന്റെ ഘടനയിൽ സ്വാഭാവികമായ മാറ്റങ്ങൾ വരുന്നു. കണ്ണിന് താഴെയുള്ള കൊഴുപ്പ് ക്രമേണ കുറയുകയും കണ്ണുകൾക്ക് താഴെ കുഴികൾ രൂപപ്പെടുകയും ചെയ്യും. ചർമ്മത്തിന് ദൃഢത നൽകുന്ന കൊളാജൻ, ഇലാസ്റ്റിൻ എന്നിവയുടെ ഉത്പാദനം കുറയുന്നു.

ഡാർക്ക് സർക്കിൾസ് കൂട്ടുന്ന മറ്റ് ജീവിതശൈലികൾ

പ്രധാന കാരണം ഉറക്കക്കുറവ് അല്ലെങ്കിൽ പോലും, താഴെ പറയുന്ന ശീലങ്ങൾ ഈ പ്രശ്നം കൂടുതൽ വഷളാക്കാം:

1. കടുത്ത മാനസിക സമ്മർദ്ദം

2. അമിതമായ ഫോൺ, കമ്പ്യൂട്ടർ ഉപയോഗം

3. പുകവലി

4. മോശമായ ഭക്ഷണരീതികൾ

5. ആവശ്യത്തിന് വെള്ളം കുടിക്കാതിരിക്കുക

6. കൃത്യമല്ലാത്ത ഉറക്ക സമയം

ഇവയെല്ലാം രക്തയോട്ടത്തെയും ചർമ്മത്തിന്റെ ആരോഗ്യത്തെയും ദോഷകരമായി ബാധിക്കുന്നവയാണ്.