ഡോക്ടറോട് ചോദിക്കാതെ നിങ്ങൾ ആന്റിബയോട്ടിക്കുകൾ കഴിക്കാറുണ്ടോ? സൂക്ഷിക്കുക

ശരിയായ രീതിയിൽ ആന്റിബയോട്ടിക് ഉപയോഗിക്കുമ്പോൾ പോലും തെറ്റായ അളവിൽ കഴിക്കുകയോ, പൂർണ്ണമായ കോഴ്സ് പൂർത്തിയാക്കുന്നതിന് മുൻപ് മരുന്ന് നിർത്തുകയോ ചെയ്യുന്നത് അതിന്റെ ഫലപ്രാപ്തി കുറയ്ക്കും.

ബാക്ടീരിയ മൂലമുണ്ടാകുന്ന അണുബാധകൾക്കെതിരെ പോരാടാൻ സഹായിക്കുന്ന മികച്ച മരുന്നുകളാണ് ആന്റിബയോട്ടിക്കുകൾ. എന്നാൽ, ആന്റിബയോട്ടിക്കിന്റെ അനാവശ്യവും അമിത ഉപയോഗവും ഗുരുതരമായ പാർശ്വഫലങ്ങൾക്കും ആരോഗ്യ പ്രശ്നങ്ങൾക്കും കാരണമാകുമെന്ന കാര്യം പലരും അറിയാതെ പോകുന്നു.

ഡോക്ടറുടെ കുറിപ്പടിയില്ലാതെ തന്നെ ആന്റിബയോട്ടിക്കുകൾ ഉപയോ​ഗിക്കുന്ന പ്രവണ ഏറെ ആശങ്കാജനകമാണെന്ന് ഐസിഎംആർ അഡീഷണൽ ഡയറക്ടർ ജനറൽ ഡോ. സംഘമിത്ര പതി വ്യക്തമാക്കിയിരുന്നു. കേരളം, രാജസ്ഥാൻ, പഞ്ചാബ് എന്നിവിടങ്ങളിലെ മാധ്യമപ്രവർത്തകരുമായി ഭുവനേശ്വറിൽ നടത്തിയ മുഖാമുഖത്തിലാണ് അവർ ഇക്കാര്യം പറഞ്ഞത്.

ഡോക്ടറോട് ചോദിക്കാതെ ആന്റിബയോട്ടിക്കുകൾ കഴിക്കുന്നത് പീന്നിട് പ്രത്യാഘാതങ്ങൾ ഗുരുതരമായേക്കാം. കുറിപ്പടിയില്ലാതെ മരുന്നുകൾ നൽകുന്നത്‌ ഒഴിവാക്കണമെന്ന്‌ സർക്കാർ നിർദേശിച്ചിട്ടുണ്ടെങ്കിലും മരുന്നുകളുടെ ദുരുപയോഗം വ്യാപകമാണ്‌. ഇതിനെതിരേ സ്‌കൂൾതലം മുതൽ സമൂഹത്തിന്റെ എല്ലാ വിഭാഗങ്ങളിലേക്കും ബോധവൽക്കരണം ശക്‌തമാക്കേണ്ടതുണ്ടെന്നും ഡോ.സംഘമിത്ര പറഞ്ഞു.

ഡോക്ടറുടെ നിർദ്ദേശമില്ലാതെ പലരും ആന്റിബയോട്ടിക്കുകൾ ഉപയോഗിക്കാറുണ്ട്. വൈറൽ പനിയോ ഫ്ലൂവോ ഉണ്ടാകുമ്പോൾ പോലും കടകളിൽ നിന്ന് എളുപ്പത്തിൽ ലഭിക്കുന്ന അസിത്രോമൈസിനോ മറ്റ് ആന്റിബയോട്ടിക്കുകളോ ആണ് അവർ പലപ്പോഴും ഉപയോഗിക്കുന്നത്. എന്നാൽ, വൈറൽ അണുബാധകൾക്കെതിരെ ആന്റിബയോട്ടിക്കുകൾ ഫലപ്രദമല്ല. അതിനാൽ ഇത്തരം സാഹചര്യങ്ങളിൽ അവ ഉപയോഗിക്കുന്നത് അനാവശ്യമാണെന്ന് ദില്ലിയിലെ കൈലാഷ് ദീപക് ആശുപത്രിയിലെ കൺസൾട്ടന്റ് ഫിസിഷ്യനായ ഡോ. മാൻസി നിഗം പറയുന്നു.

ശരിയായ രോഗനിർണയം നടത്താതെ തെറ്റായ ആന്റിബയോട്ടിക് കഴിക്കാൻ ഇടയാകുന്നതിലൂടെ ചികിത്സ വൈകുന്നത് ഉൾപ്പെടെയുള്ള മറ്റ് അപകടസാധ്യതകളും ഇതിലുണ്ട്. സ്വയമായുള്ള ചികിത്സ പാർശ്വഫലങ്ങൾക്കോ ​​അലർജി പ്രശ്നങ്ങൾക്കോ ​​അല്ലെങ്കിൽ മറ്റ് ആരോ​ഗ്യപ്രശ്നങ്ങൾക്കോ ​​കാരണമായേക്കാമെന്നും ഡോ. ​​നിഗം ​​മുന്നറിയിപ്പ് നൽകുന്നു.

ശരിയായ രീതിയിൽ ആന്റിബയോട്ടിക് ഉപയോഗിക്കുമ്പോൾ പോലും തെറ്റായ അളവിൽ കഴിക്കുകയോ, പൂർണ്ണമായ കോഴ്സ് പൂർത്തിയാക്കുന്നതിന് മുൻപ് മരുന്ന് നിർത്തുകയോ ചെയ്യുന്നത് അതിന്റെ ഫലപ്രാപ്തി കുറയ്ക്കും. തെറ്റായ അളവിൽ മരുന്ന് കഴിക്കുകയോ രോഗലക്ഷണങ്ങൾ കുറയുമ്പോൾ തന്നെ മരുന്ന് നിർത്തുകയോ ചെയ്യുന്നത് രോ​ഗം പൂർണമായും മാറ്റാൻ സഹായിക്കില്ല. യഥാർത്ഥത്തിൽ ആന്റിബയോട്ടിക്ക് കോഴ്സ് പൂർണ്ണമായും പൂർത്തിയാക്കുകയാണ് വേണ്ടതെന്ന് വിദ​ഗ്ധർ ചൂണ്ടിക്കാട്ടുന്നു. എപ്പോഴും ഒരു ഡോക്ടറുടെ ഉപദേശം തേടിയതിനുശേഷം മാത്രം ആന്റിബയോട്ടിക്കുകൾ ഉപയോഗിക്കാൻ പാടുള്ളൂ.

പ്രധാന അപകടസാധ്യതകളും പാർശ്വഫലങ്ങളും

ഒന്ന്

അമിതമായോ അനാവശ്യമായോ ആന്റിബയോട്ടിക്കുകൾ ഉപയോഗിക്കുന്നത് ആന്റിബയോട്ടിക് പ്രതിരോധശേഷി ഉണ്ടാകുന്നതിനും കുടലിലെ ആരോഗ്യകരമായ ബാക്ടീരിയകളെ നശിപ്പിക്കുന്നതിനും ദഹനസംബന്ധമായതോ അലർജി മൂലമുള്ളതോ ആയ പെട്ടെന്നുള്ള പാർശ്വഫലങ്ങൾക്കും കാരണമാകുന്നു.

രണ്ട്

ആന്റിബയോട്ടിക്കുകൾ ദോഷകരമായ ബാക്ടീരിയകളെപ്പോലെ തന്നെ ഗുണകരമായ ബാക്ടീരിയകളെയും നശിപ്പിക്കുന്നു. ഈ അസന്തുലിതാവസ്ഥ വയറിളക്കം, വയറുവേദന, ദഹനസംബന്ധമായ അസ്വസ്ഥതകൾ എന്നിവയ്ക്ക് കാരണമായേക്കാം.

രണ്ട്

ശരീരത്തിന് ഗുണകരമായ ബാക്ടീരിയകൾ നശിക്കുന്നത് ഫംഗസുകളുടെ അമിതവളർച്ചയ്ക്ക് കാരണമാകുന്നു. ഇത് പലപ്പോഴും യോനീഭാഗത്തെ ഈസ്റ്റ് അണുബാധയ്‌ക്കോ (vaginal yeast infection) വായയിലെ ഫംഗസ് ബാധയ്‌ക്കോ വഴിവയ്ക്കുന്നു.

മൂന്ന്

ചിലരിൽ ആന്റിബയോട്ടിക്കിന്റെ അമിത ഉപയോ​ഗം ചർമ്മത്തിലെ അലർജി പ്രശ്നങ്ങൾക്ക് ഇടയാക്കും. ചെറിയ തോതിലുള്ള ചർമ്മത്തിലെ തടിപ്പുകൾ, ചൊറിച്ചിൽ എന്നിവ ഉൾപ്പെടുന്നു.

അറി‍ഞ്ഞിരിക്കേണ്ട ചില കാര്യങ്ങൾ

1. ഡോക്ടറുടെ നിർദ്ദേശപ്രകാരം മാത്രം ആന്റിബയോട്ടിക്കുകൾ മരുന്നുകൾ കഴിക്കുക.

2. പറഞ്ഞിരിക്കുന്ന ദിവസങ്ങളും അളവും പൂർണ്ണമായും പാലിക്കുക. കോഴ്സ് പൂർത്തിയാക്കാതെ ഇടയ്ക്ക് വച്ച് നിർത്തരുത്.

3. എല്ലാ അണുബാധകൾക്കും ആൻറിബയോട്ടിക്കുകൾ ആവശ്യമില്ല. ഒന്നോ രണ്ടോ ദിവസം നീണ്ട് നിൽക്കുന്ന നേരിയ ജലദോഷം, ചുമ, എന്നിവ തനിയെ സുഖപ്പെടും. അതിന് ആൻറിബയോട്ടിക്കുകൾ ഉപയോഗിച്ച് ചികിത്സിക്കേണ്ടതില്ല.

4. ചികിത്സ കഴിഞ്ഞ് ശേഷിക്കുന്ന ആന്റിബയോട്ടിക്കുകൾ ഒരിക്കലും ഉപയോഗിക്കരുത്.

5. രോഗശമനം തോന്നിയാൽ പോലും ഡോക്ടർ നിർദ്ദേശിച്ച കാലയളവിലേക്ക് ആന്റിബയോട്ടിക് ചികിത്സ പൂർത്തിയാക്കണം.