മഴക്കാല രോ​ഗങ്ങൾ ; ഈ ലക്ഷണങ്ങൾ തള്ളിക്കളയരുത്

അതിശക്തമായ പനി, വിറയൽ, സന്ധികളിൽ കഠിനമായ വേദന എന്നിവ മലേറിയ, ഡെങ്കിപ്പനി, ചിക്കുൻഗുനിയ തുടങ്ങിയ കൊതുക് പരത്തുന്ന രോഗങ്ങളുടെ ലക്ഷണമാകാം.

മഴക്കാലത്ത് നിരവധി രോ​ഗങ്ങൾ പിടിപെടാം. വെളളം കെട്ടിനിക്കലും കൊതുകുകൾ മുട്ടയിട്ട് പെരുകുന്നതും മഴക്കാലാരോഗങ്ങൾക്ക് ഒരു പ്രധാന കാരണം ആകുന്നു. ഓടകളിലും അഴുക്കുചാലുകളിലും കെട്ടിനിൽക്കുന്ന വെള്ളം കൊതുക് മുട്ടയിട്ട് പെരുകുന്നതിനും ഇടയാകുന്നു. 

പനി മുതൽ വയറ്റിലുണ്ടാകുന്ന അണുബാധകൾ വരെ, മഴക്കാലം പലതരം ആരോഗ്യപ്രശ്നങ്ങൾക്ക് കാരണമായേക്കാം. എന്നിരുന്നാലും, ശുചിത്വവുമായി ബന്ധപ്പെട്ട ചില ലളിതമായ ശീലങ്ങളും ഭക്ഷണക്രമത്തിലെ മാറ്റങ്ങളും മഴക്കാലത്തുടനീളം ആരോഗ്യം നിലനിർത്താൻ ഏറെ സഹായിക്കും.

മഴക്കാലത്ത് രോ​ഗങ്ങൾ ; ലക്ഷണങ്ങൾ എന്തെല്ലാം?

അതിശക്തമായ പനി, വിറയൽ, സന്ധികളിൽ കഠിനമായ വേദന എന്നിവ മലേറിയ, ഡെങ്കിപ്പനി, ചിക്കുൻഗുനിയ തുടങ്ങിയ കൊതുക് പരത്തുന്ന രോഗങ്ങളുടെ ലക്ഷണമാകാം.

ഛർദ്ദി, വയറിളക്കം, വയറുവേദന: ഇവ പലപ്പോഴും ഭക്ഷ്യവിഷബാധ, വയറിളക്കം അല്ലെങ്കിൽ കോളറ പോലുള്ള ജലജന്യ രോഗങ്ങളുമായി ബന്ധപ്പെട്ടിരിക്കുന്നു.

വിട്ടുമാറാത്ത പനി, വയറുവേദന, വിശപ്പില്ലായ്മ എന്നിവ ടൈഫോയിഡിന്റെ ലക്ഷണങ്ങളാകാം.

ചുവന്നതോ, അസ്വസ്ഥതയുള്ളതോ ആയ കണ്ണുകൾ: 'ഐ ഫ്ലൂ' (eye flu) എന്ന് സാധാരണയായി അറിയപ്പെടുന്ന വൈറൽ കൺജങ്ക്റ്റിവിറ്റിസിന്റെ ലക്ഷണമാകാം.

മഴക്കാലത്ത് ആരോഗ്യം നിലനിർത്താൻ ശ്രദ്ധിക്കേണ്ട കാര്യങ്ങൾ

ഇടയ്ക്കിടെ കൈകൾ കഴുകുക: ഭക്ഷണം കഴിക്കുന്നതിന് മുൻപും, ശുചിമുറി ഉപയോഗിച്ചതിന് ശേഷവും, വീട്ടിൽ തിരിച്ചെത്തിയതിന് ശേഷവും കുറഞ്ഞത് 20 സെക്കൻഡ് നേരമെങ്കിലും സോപ്പും വെള്ളവും ഉപയോഗിച്ച് കൈകൾ കഴുകുക.

പാദ സംരക്ഷണം അവഗണിക്കരുത്: മഴക്കാലത്ത് പാദങ്ങൾ ചെളിവെള്ളവുമായി നേരിട്ട് സമ്പർക്കത്തിൽ വരുന്നതിനാൽ അവ ഫംഗസ്, ബാക്ടീരിയ അണുബാധകൾക്ക് ഇരയാകുന്നു.

മഴയിൽ നനയുകയാണെങ്കിൽ വീട്ടിലെത്തിയ ഉടൻ തന്നെ കുളിക്കുക. ശുദ്ധമായ വെള്ളവും ആന്റിസെപ്റ്റിക് സോപ്പും ഉപയോഗിക്കുന്നത് അണുക്കളെ നീക്കം ചെയ്യാനും ചർമ്മരോഗങ്ങൾക്കുള്ള സാധ്യത കുറയ്ക്കാനും സഹായിക്കും.

പഴങ്ങളും പച്ചക്കറികളും നന്നായി കഴുകിയ ശേഷം എടുക്കുക.: മഴക്കാലത്ത് ഇലക്കറികളിൽ ബാക്ടീരിയ, ചെറിയ പ്രാണികൾ പിടിപെടാം . പാചകം ചെയ്യുന്നതിന് മുമ്പ് ശുദ്ധമായ വെള്ളത്തിൽ നന്നായി കഴുകുക അല്ലെങ്കിൽ ഉപ്പുവെള്ളത്തിൽ അൽപനേരം മുക്കിവയ്ക്കുക.

വീട്ടിലുണ്ടാക്കിയ ഭക്ഷണം കഴിക്കുക എന്നുള്ളതാണ് മറ്റൊരു കാര്യം. പഴകിയ ഭക്ഷണം ഒഴിവാക്കുക; ഭക്ഷണം പാകം ചെയ്ത് രണ്ട് മണിക്കൂറിനുള്ളിൽ കഴിക്കാൻ ശ്രമിക്കുക. മഴക്കാലത്ത് മലിനമാകാൻ സാധ്യതയുള്ളതിനാൽ വഴിയോരക്കടകളിലെ ഭക്ഷണം, നേരത്തെ മുറിച്ചുവച്ച പഴങ്ങൾ, മൂടിവെക്കാത്ത ജ്യൂസ് എന്നിവ ഒഴിവാക്കുന്നതും ഉചിതമാണ്.