കഴുത്ത് വേദനയെ നിസ്സാരമായി കാണേണ്ട; ഇക്കാര്യങ്ങൾ നിങ്ങൾ അറിഞ്ഞിരിക്കണം

ശരിയല്ലാത്ത ഇരുത്തം, ദീർഘനേരം ഒരേ രീതിയിലിരുന്ന് ജോലി ചെയ്യുന്നവർ, ദീർഘദൂരം വാഹനം ഓടിക്കുന്നവർ, കിടന്നുകൊണ്ട് ഫോൺ നോക്കുന്നവർ തുടങ്ങിയവർക്കൊക്കെയും ഇത്തരത്തിൽ കഴുത്ത് വേദന അനുഭവപ്പെടാറുണ്ട്.

എല്ലാത്തരം പ്രായക്കാരിലും ഇന്ന് കണ്ടുവരുന്ന ഒരു ആരോഗ്യ പ്രശ്നമാണ് കഴുത്ത് വേദന. ശരിയല്ലാത്ത ഇരുത്തം, ദീർഘനേരം ഒരേ രീതിയിലിരുന്ന് ജോലി ചെയ്യുന്നവർ, ദീർഘദൂരം വാഹനം ഓടിക്കുന്നവർ, കിടന്നുകൊണ്ട് ഫോൺ നോക്കുന്നവർ തുടങ്ങിയവർക്കൊക്കെയും ഇത്തരത്തിൽ കഴുത്ത് വേദന അനുഭവപ്പെടാറുണ്ട്. ഒരിക്കൽ കഴുത്ത് വേദന വന്നാൽ പിന്നെ സ്ഥിരമായി നിങ്ങൾക്കിത് വന്നുകൊണ്ടേയിരിക്കും. ഇത് നിങ്ങളുടെ ദൈനംദിന കാര്യങ്ങളെയും ബാധിക്കുന്നു.

ആക്സിയൽ നെക്ക് പെയിൻ (പ്രധാനമായും കഴുത്തിൽ അനുഭവപ്പെടുന്നു) റാഡിക്കുലാർ നെക്ക് പെയിൻ (നിങ്ങളുടെ തോളിലേക്കോ കൈകളിലേക്കോ അല്ലെങ്കിൽ മറ്റ് ഭാഗങ്ങളിലേക്കോ പടരുന്ന വേദന) ഈ രീതികളിലാണ് കഴുത്ത് വേദന നിങ്ങൾക്ക് അനുഭവപ്പെടുന്നത്. ഇത് ദിവസങ്ങൾ മുതൽ ആഴ്ചകൾ വരെ നീണ്ടുനിൽക്കുന്നു. ചില സാഹചര്യങ്ങളിൽ വിട്ടുമാറാത്ത വേദനയായും ഇത് മാറാറുണ്ട്. ശരിയായ രീതിയിൽ ചികിത്സ തേടിയില്ലെങ്കിൽ നിങ്ങളുടെ ദൈനംദിന പ്രവർത്തനങ്ങൾക്ക് ഇത് തടസ്സമുണ്ടാക്കും. കഴുത്ത് വേദന ഉണ്ടാവുന്നതിന്റെ കാരണങ്ങൾ ഇതാണ്.

വാർദ്ധക്യം

പ്രായമാകുമ്പോൾ സ്വാഭാവികമായി ഉണ്ടാകുന്ന തേയ്മാനം നിങ്ങളുടെ സെർവിക്കൽ സ്പൈനിന്റെ ഭാഗങ്ങൾ ക്ഷയിക്കാൻ കാരണമാകുന്നു. ഇത് സ്ഥിരമായി കഴുത്ത് വേദന അനുഭവപ്പെടാൻ കാരണമാകും.

ജോലികൾ ചെയുന്നത്

ആവർത്തിച്ചുള്ളതോ ആയാസകരമായതോ ആയ ജോലികൾ ചെയ്യുമ്പോൾ നിങ്ങളുടെ കഴുത്തിലെ പേശികളിൽ സ്‌ട്രെയിൻ അനുഭവപ്പെടാം. ഇത് വിട്ടുമാറാത്ത വേദനയ്ക്ക് കാരണമാകും. ഉദാഹരണത്തിന് ദീർഘനേരം കമ്പ്യൂട്ടർ സ്ക്രീൻ നോക്കിയിരിക്കുന്നത് വിട്ടുമാറാത്ത കഴുത്ത് വേദന ഉണ്ടാവാൻ കാരണമാകാറുണ്ട്.

മാനസിക സമ്മർദ്ദം

സമ്മർദ്ദം കാരണം കഴുത്തിലെ പേശികൾ മുറുകുന്നത് കഴുത്ത് വേദനയ്ക്ക് കാരണമാകുന്നു. നിസ്സാരമെന്ന് തോന്നുമെങ്കിലും ഇത്തരം ചെറിയ കാര്യങ്ങൾ പോലും വിട്ടുമാറാത്ത കഴുത്ത് വേദന വരാൻ കാരണമാകാറുണ്ട്.

പരിക്കുകൾ

ആഘാതമുള്ളതും അല്ലാത്തതുമായ ചിലതരം പരിക്കുകളും നിങ്ങളുടെ സുഷുമ്‌നാ നാഡിയിലെ പേശികൾ, ലിഗമെന്റുകൾ, ഡിസ്കുകൾ, വെർട്ടെബ്രൽ സന്ധികൾ, നാഡി വേരുകൾ എന്നിവയ്ക്ക് കേടുപാടുകൾ വരുത്തുകയും കഴുത്ത് വേദനയ്ക്ക് കാരണമാവുകയും ചെയ്യാറുണ്ട്.

മുഴ വരുന്നത്

മുഴ, സിസ്റ്റുകൾ എന്നിവ ഉണ്ടാകുന്നതും കഴുത്തിലെ ഞരമ്പുകളിൽ സമ്മർദ്ദം ചെലുത്തുകയും വേദനയ്ക്ക് കാരണമാവുകയും ചെയ്യാറുണ്ട്.