അഡിനോയ്ഡ് കുട്ടികളുടെ പഠനത്തെ ബാധിക്കുന്നത് എങ്ങനെ?

ശ്വാസതടസ്സം ഗുരുതരമാകുകയും, കേൾവിക്കുറവ് ഉണ്ടാകുകയും, പഠനത്തെയും വളർച്ചയെയും ബാധിക്കുകയും ചെയ്യുകയാണെങ്കിൽ ലളിതമായ ശസ്ത്രക്രിയയിലൂടെ അഡിനോയ്ഡ് നീക്കം ചെയ്യാവുന്നതാണ്.

കുട്ടികൾ പഠനത്തിൽ പിന്നോട്ടുപോകുമ്പോഴോ ക്ലാസിൽ ശ്രദ്ധക്കുറവ് കാണിക്കുമ്പോഴോ നമ്മൾ പലപ്പോഴും കുറ്റപ്പെടുത്താറുണ്ട്. എന്നാൽ ഇതിന് പിന്നിൽ അവർക്ക് ശ്വാസമെടുക്കാൻ പോലുമാകാത്ത വിധം ബുദ്ധിമുട്ടിക്കുന്ന ഒരു ആരോഗ്യപ്രശ്നമായിരിക്കാം കാരണം—അതാണ് അഡിനോയ്ഡ് (Adenoids) വീക്കം.

മൂക്കിന് പിന്നിലായി കാണപ്പെടുന്ന ഒരു ലിംഫ് ഗ്രന്ഥിയാണിത്. ഇത് അമിതമായി വലുതാകുമ്പോൾ കുട്ടിയുടെ ശ്വാസവായു കടന്നുപോകുന്ന വഴി തടസ്സപ്പെടുന്നു. ഇത് എങ്ങനെയാണ് കുട്ടികളുടെ പഠനത്തെ ബാധിക്കുന്നത് എന്ന് നോക്കാം.

വില്ലനാകുന്ന ഘട്ടങ്ങൾ

- ശ്വാസതടസ്സം : മൂക്കിലൂടെയുള്ള ശ്വാസമെടുക്കൽ ബുദ്ധിമുട്ടാകുമ്പോൾ കുട്ടികൾ എപ്പോഴും വായ തുറന്ന് ശ്വസിക്കാൻ തുടങ്ങുന്നു.

- ഉറക്കമില്ലായ്മ: രാത്രിയിൽ കടുത്ത കൂർക്കംവലി, ഉറക്കത്തിനിടയിൽ പെട്ടെന്ന് ശ്വാസം നിൽക്കൽ (Sleep Apnea) എന്നിവ കാരണം കുട്ടിക്ക് ആഴത്തിലുള്ള ഉറക്കം ലഭിക്കില്ല.

1. ഓക്സിജൻ കുറയുന്നു: ശ്വാസതടസ്സം കാരണം ശരീരത്തിലും തലച്ചോറിലും ആവശ്യത്തിന് ഓക്സിജൻ എത്തുന്നില്ല.

2. പകൽ സമയത്തെ തളർച്ച: രാത്രി ഉറക്കം നഷ്ടപ്പെടുന്നതോടെ പകൽ ക്ലാസുകളിൽ കുട്ടിക്ക് കടുത്ത ക്ഷീണവും ഉറക്കംതൂങ്ങലും അനുഭവപ്പെടുന്നു.

3. പഠനവൈകല്യം: ഒരു കാര്യത്തിലും ശ്രദ്ധ കേന്ദ്രീകരിക്കാൻ കഴിയാതെ വരിക, ഓർമ്മക്കുറവ്, ദേഷ്യം, ഹൈപ്പർ ആക്ടിവിറ്റി തുടങ്ങിയ സ്വഭാവവ്യതിയാനങ്ങൾ ഇതോടെ പ്രകടമാകുന്നു.

ഈ ലക്ഷണങ്ങൾ ശ്രദ്ധിക്കുക

• എപ്പോഴും വായ തുറന്ന് ഉറങ്ങുകയും ശ്വസിക്കുകയും ചെയ്യുക.

• വിട്ടുമാറാത്ത മൂക്കടപ്പും ജലദോഷവും.

• രാവിലെയുള്ള തലവേദന, അലസത.

• വാക്കുകൾ വ്യക്തമല്ലാതെ സംസാരിക്കുക (മൂക്കിലൊതുങ്ങിയ ശബ്ദം).

• ഭക്ഷണം വിഴുങ്ങാനുള്ള ബുദ്ധിമുട്ട്.

• അഡിനോയ്ഡ് ഫേസ് (Adenoid Face): ദീർഘനാൾ ചികിത്സിക്കാതിരുന്നാൽ കുട്ടിയുടെ മുഖത്തിന്റെ ഘടനയിൽപ്പോലും മാറ്റം വരാം (തുറന്ന വായയും നീണ്ട മുഖവും).

പ്രതിവിധി

ഇത് കേവലം ഒരു പഠനപ്രശ്നമല്ല, കൃത്യമായ മെഡിക്കൽ സഹായം തേടേണ്ട രോഗാവസ്ഥയാണ്.

• മെഡിക്കൽ ചികിത്സ: തുടക്കത്തിൽ അലർജി നിയന്ത്രണത്തിലൂടെയും നേസൽ സ്പ്രേകളിലൂടെയും ഇത് പരിഹരിക്കാം.

• 90 ശതമാനം കേസുകളും മരുന്നുകൾ കൊണ്ട് ചികിത്സിച്ചു മാറ്റാൻ കഴിയുന്നതാണെങ്കിലും ഗൗരവമേറിയ രോഗാവസ്ഥകളിൽ ശസ്ത്രക്രിയ വേണ്ടി വന്നേക്കും.

ശസ്ത്രക്രിയ (Adenoidectomy): ശ്വാസതടസ്സം ഗുരുതരമാകുകയും, കേൾവിക്കുറവ് ഉണ്ടാകുകയും, പഠനത്തെയും വളർച്ചയെയും ബാധിക്കുകയും ചെയ്യുകയാണെങ്കിൽ ലളിതമായ ശസ്ത്രക്രിയയിലൂടെ അഡിനോയ്ഡ് നീക്കം ചെയ്യാവുന്നതാണ്. കൂർക്കംവലി കുട്ടികളിൽ സാധാരണയല്ല. നിങ്ങളുടെ കുട്ടികളിൽ ഈ ലക്ഷണങ്ങൾ കാണുന്നുണ്ടെങ്കിൽ എത്രയും വേഗം ഒരു പീഡിയാട്രിക് / ഇ.എൻ.ടി കൺസൾട്ടേഷൻ ഉറപ്പാക്കുക. കൃത്യസമയത്തെ ചികിത്സ കുട്ടിയുടെ പഠനശേഷിയും ആരോഗ്യവും തിരികെ നൽകും.