‌മുളപ്പിച്ച പയർവർ​ഗങ്ങളോ അതോ വേവിച്ച കടലയോ? ശരീരഭാരം കുറയ്ക്കാൻ ഏറ്റവും നല്ലത് ഏതാണ്?

മുളപ്പിച്ച പയർവർ​ഗങ്ങിൽ കലോറി കുറവായത് കൊണ്ട് തന്നെ അമിത വിശപ്പ് തടയുകയും പെട്ടെന്ന് വയറു നിറഞ്ഞതായി തോന്നാനും സഹായിക്കും.  

വണ്ണം കുറയ്ക്കാൻ മിക്കവരും ഡയറ്റിൽ ഉൾപ്പെടുത്തുന്ന രണ്ട് ഭക്ഷണങ്ങളാണ് ‌മുളപ്പിച്ച പയർവർ​ഗങ്ങളും വേവിച്ച കടലയും. എന്നാൽ ഇതിൽ ഏറ്റവും നല്ലത്‌ ഏതാണ്? മുളപ്പിച്ച പയറ് വർ​ഗങ്ങളിൽ കലോറി കുറവാണെങ്കിലും നാരുകൾ, വിറ്റാമിനുകൾ, എൻസൈമുകൾ എന്നിവ കൂടുതലാണ്.

മുളയ്ക്കുന്നത് ചേരുവകളുടെ പോഷകമൂല്യം വർദ്ധിപ്പിക്കുകയും മികച്ച ദഹനം നൽകുകയും ചെയ്യുന്നു. കൂടാതെ, ഇത് ആന്റിഓക്‌സിഡന്റുകൾ നൽകുകയും ക്ലോറോഫില്ലിന്റെ പ്രവർത്തനം വർദ്ധിപ്പിക്കുകയും ചെയ്യുന്നു. ഇത് ശരീരത്തിലെ ഓക്സിജന്റെ അളവ് വർദ്ധിപ്പിക്കുന്നതിന് സഹായിക്കുമെന്ന് ദില്ലിയിലെ പോഷകാഹാര വിദഗ്ധയായ ഷീല സെഹ്‌രാവത്ത് പറയുന്നു.

മുളപ്പിച്ച പയർവർ​ഗങ്ങിൽ കലോറി കുറവായത് കൊണ്ട് തന്നെ അമിത വിശപ്പ് തടയുകയും പെട്ടെന്ന് വയറു നിറഞ്ഞതായി തോന്നാനും സഹായിക്കും. ഇത് സ്വാഭാവികമായും മൊത്തത്തിലുള്ള ഭക്ഷണ ഉപഭോഗം കുറയ്ക്കാൻ സഹായിക്കും. നാരുകൾ അടങ്ങിയിട്ടുള്ളതിനാൽ മുളപ്പിച്ച ഭക്ഷണം കഴിക്കുന്നത് ശരീരഭാരം കുറയ്ക്കാനും സഹായിക്കും.

വേവിച്ച കടലയിലും ധാരാളം പോഷക​ഗുണങ്ങൾ അടങ്ങിയിരിക്കുന്നു. പ്രോട്ടീൻ, നാരുകൾ എന്നിവ അടങ്ങിയിട്ടുള്ളതിനാൽ വിശപ്പ് നിയന്ത്രിക്കാൻ സഹായിക്കുന്നു. വെള്ള കടല ലഘുഭക്ഷണമായി കഴിക്കാവുന്നതാണ്. 

100 ഗ്രാം വേവിച്ച വെള്ളക്കടലയിൽ 9 ഗ്രാം പ്രോട്ടീൻ, 8 ഗ്രാം ഡയറ്ററി ഫൈബർ, 2.6 ഗ്രാം ആരോഗ്യകരമായ കൊഴുപ്പ് എന്നിവ അടങ്ങിയിരിക്കുന്നു. ഇതിൽ ഉയർന്ന അളവിൽ നാരുകൾ അടങ്ങിയിരിക്കുന്നതിനാൽ, ഇത് ദഹനം മന്ദഗതിയിലാക്കാനും വിശപ്പ് നിയന്ത്രിക്കാനും സഹായിക്കുന്നു.

ഫൈബർ കൂടുതലുള്ളതും ഗ്ലൈസെമിക് സൂചിക കുറഞ്ഞതും പ്രോട്ടീനും അടങ്ങിയിട്ടുള്ളതിനാൽ ശരീരഭാരം നിയന്ത്രിക്കുന്നതിന് വളരെ മികച്ചൊരു ഭക്ഷണമായാണ് വെള്ളക്കടല കണക്കാക്കപ്പെടുന്നത്. വെള്ളക്കടല സാലഡ് കറികളിലോ എല്ലാം ചേർത്ത് കഴിക്കാവുന്നതാണ്. ഇവ രണ്ടും ശരീരഭാരം കുറയ്ക്കാൻ മികച്ച ഭക്ഷണങ്ങളായാണ് പഠനങ്ങൾ പറയുന്നത്.