ഉയര്ന്ന കൊളസ്ട്രോളിന്റെ ശ്രദ്ധിക്കാതെ പോകുന്ന ലക്ഷണങ്ങള്...
Synopsis
ശരീരത്തില് കൊളസ്ട്രോളിന്റെ അളവ് അധികമായാല് അത് രക്തധമനികളില് അടിഞ്ഞു കൂടും. ഹൃദയത്തിലേയ്ക്കുള്ള രക്തപ്രവാഹം തടസപ്പെടാന് വരെ ഇത് കാരണമാകാം. തുടര്ന്ന് ഇത് ഹാര്ട്ട് അറ്റാക്ക് അടക്കമുളള പല പ്രശ്നങ്ങളിലേക്കും വഴി വയ്ക്കാം.
രക്തത്തില് കാണുന്ന മെഴുക് പോലുള്ള വസ്തുവാണ് കൊളസ്ട്രോള്. കൊളസ്ട്രോൾ രണ്ടു തരത്തിലുണ്ട് എൽ ഡി എൽ കൊളസ്ട്രോൾ അഥവാ ചീത്ത കൊളസ്ട്രോളും എച്ച് ഡി എൽ അഥവാ നല്ല കൊളസ്ട്രോളും. ചീത്ത കൊളസ്ട്രോളിന്റെ അളവ് കൂടിയാൽ അത് ഹൃദയാരോഗ്യത്തെ ബാധിക്കാം. ശരീരത്തില് കൊളസ്ട്രോളിന്റെ അളവ് അധികമായാല് അത് രക്തധമനികളില് അടിഞ്ഞു കൂടും. ഹൃദയത്തിലേയ്ക്കുള്ള രക്തപ്രവാഹം തടസപ്പെടാന് വരെ ഇത് കാരണമാകാം. തുടര്ന്ന് ഇത് ഹാര്ട്ട് അറ്റാക്ക് അടക്കമുളള പല പ്രശ്നങ്ങളിലേക്കും വഴി വയ്ക്കാം.
കൊഴുപ്പ് കൂടിയ ഭക്ഷണം, വ്യായാമമില്ലായ്മ, പുകവലി, അമിത മദ്യപാനം തുടങ്ങിയവയൊക്കെ കൊളസ്ട്രോള് കൂടാന് കാരണമാകും. കൊളസ്ട്രോള് കൂടുമ്പോള് കാര്യമായ ലക്ഷണങ്ങള് ഉണ്ടാകണമെന്നില്ല. ചര്മ്മത്തിന്റെ നിറത്തിലുള്ള വ്യത്യാസം ചിലപ്പോള് ഉയര്ന്ന കൊളസ്ട്രോളിന്റെ ലക്ഷണമാകാം. ചില ആളുകളുടെ ചർമ്മത്തിൽ മഞ്ഞ കലർന്ന ഓറഞ്ച് നിറത്തിലുള്ള വളർച്ച കാണാം. കൊളസ്ട്രോള് കൂടുമ്പോള് ചര്മ്മത്തില് ചൊറിച്ചിലും ചുവന്ന പാടുമെല്ലാം ഉണ്ടാകാന് സാധ്യതയേറെയാണ്.
അതുപോലെ കാലുകളില് വേദന, കാലുകളില് മരവിപ്പ്, മുട്ടുവേദന, കാലുകളുടെ പേശികളില് വേദന തുടങ്ങിയവ ഉണ്ടാകാം. കൈയോ കാലോ അനക്കുന്ന എന്തെങ്കിലും ചെറിയ ജോലിയില് ഏര്പ്പെട്ടാല് കൂടി ഈ വേദന വരാം. കാലുകളിലോ പാദത്തിലോ മുറിവുകള്, കഴുത്തിനു പിന്നില് ഉളുക്കുപോലെ കഴപ്പുണ്ടാകുക, മങ്ങിയ നഖങ്ങള് തുടങ്ങിയവയും ചിലരില് ഉണ്ടാകാം. പൊതുവേ നെഞ്ചുവേദന ഹാര്ട്ട് അറ്റാക്ക് അടക്കമുള്ള പല രോഗങ്ങളുടേയും ലക്ഷണമാണ്. എന്നാല് ഇത് കൊളസ്ട്രോള് അധികമാകുമ്പോഴും അനുഭവപ്പെടാം. തളര്ച്ചയും ക്ഷീണവും പല കാരണങ്ങള് കൊണ്ടുമുണ്ടാകാം. എന്നാല് കൊളസ്ട്രോള് കൂടുമ്പോഴും തളര്ച്ചയും ക്ഷീണവുമുണ്ടാകാം. ഇവയൊക്കെ അപകട സാധ്യതയായി കണ്ട് കൊളസ്ട്രോള് പരിശോധന നടത്തണം.
ശ്രദ്ധിക്കുക: മേൽപ്പറഞ്ഞ ലക്ഷണങ്ങൾ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ 'കൺസൾട്ട്' ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.
ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം