National Nutrition Week : കുട്ടികളിൽ രോഗപ്രതിരോധശേഷി കൂട്ടാൻ എന്തൊക്കെ ഭക്ഷണങ്ങൾ കൊടുക്കണം?

പ്രതിരോധ കോശങ്ങളുടെ പ്രവർത്തനത്തെ സഹായിക്കുന്ന ഒരു ആന്റിഓക്‌സിഡന്റാണ് വിറ്റാമിൻ സി. സിട്രസ് പഴങ്ങൾ, പേരയ്ക്ക, നെല്ലിക്ക, കാപ്സിക്കം എന്നിവയിൽ വിറ്റാമിൻ സി ധാരാളമായി അടങ്ങിയിരിക്കുന്നു.

കുട്ടികളിലെ പ്രതിരോധശേഷി വർദ്ധിപ്പിക്കാൻ സമീകൃതമായ ഭക്ഷണക്രമം പ്രധാന പങ്കാണ് വഹിക്കുന്നത്. കുട്ടികളിൽ ഇടയ്ക്കിടെയുണ്ടാകുന്ന ചുമ, ജലദോഷം, അണുബാധ എന്നിവ പ്രതിരോധശേഷി കുറയുന്നത് കൊണ്ടാണ് ഉണ്ടാകുന്നത്.

ആവശ്യമായ പോഷകങ്ങൾ അടങ്ങിയ സമീകൃതാഹാരത്തോടൊപ്പം മതിയായ ഉറക്കം, ശരീരത്തിൽ ജലാംശം നിലനിർത്തൽ, ശാരീരിക പ്രവർത്തനങ്ങൾ എന്നിവ ആരോഗ്യകരമായ വളർച്ചയ്ക്കും മികച്ച പ്രതിരോധശേഷിക്കും സഹായിക്കും. ഒരു കുട്ടിയുടെ പ്രതിരോധ സംവിധാനം ഏതെങ്കിലും ഒരു പ്രത്യേക 'ഇമ്മ്യൂണിറ്റി ബൂസ്റ്റർ' ഭക്ഷണത്തെക്കാൾ ഉപരിയായി, അവരുടെ മൊത്തത്തിലുള്ള ഭക്ഷണക്രമത്തെയാണ് ആശ്രയിച്ചിരിക്കുന്നത്.

കുട്ടികളുടെ ശാരീരിക വളർച്ചയ്ക്കും പ്രതിരോധശേഷി വർദ്ധിപ്പിക്കുന്നതിനും ആവശ്യമായ പ്രോട്ടീൻ, കൊഴുപ്പ്, വിറ്റാമിനുകൾ, ധാതുക്കൾ, നാരുകൾ എന്നിവ അടങ്ങിയ സമീകൃതാഹാരം നൽകുന്നതിലാണ് മാതാപിതാക്കൾ ശ്രദ്ധിക്കേണ്ടതെന്ന് ബെംഗളൂരു ഇലക്ട്രോണിക് സിറ്റിയിലെ കിംസ് ഹോസ്പിറ്റൽസ് ചീഫ് ഡയറ്റീഷ്യനായ ഡോ. ചിത്ര ബി.കെ. പറയുന്നു.

ഒരു കുട്ടിയുടെ പ്രതിരോധ സംവിധാനത്തിന് സാധാരണ നിലയിൽ പ്രവർത്തിക്കാൻ വിവിധ വിറ്റാമിനുകളും ധാതുക്കളും ആവശ്യമാണ്. അവശ്യ പോഷകങ്ങളുടെ അപര്യാപ്തമായ അളവിലുള്ള ഉപഭോഗം കുട്ടിയുടെ വളർച്ചയെയും, രോഗപ്രതിരോധ പ്രവർത്തനങ്ങൾ ഫലപ്രദമായി നിർവഹിക്കാനുള്ള ശരീരത്തിന്റെ കഴിവിനെയും ബാധിച്ചേക്കാം. രോഗപ്രതിരോധ പ്രവർത്തനത്തിലും ശ്വാസകോശ ആരോഗ്യത്തിലും വിറ്റാമിൻ ഡി പ്രധാന പങ്ക് വഹിക്കുന്നു. ചില ശിശുക്കൾക്ക് വിറ്റാമിൻ ഡി പ്രതിരോധ ഡോസ് ആവശ്യമായി വന്നേക്കാം.

പ്രതിരോധ കോശങ്ങളുടെ പ്രവർത്തനത്തെ സഹായിക്കുന്ന ഒരു ആന്റിഓക്‌സിഡന്റാണ് വിറ്റാമിൻ സി. സിട്രസ് പഴങ്ങൾ, പേരയ്ക്ക, നെല്ലിക്ക, കാപ്സിക്കം എന്നിവയിൽ വിറ്റാമിൻ സി ധാരാളമായി അടങ്ങിയിരിക്കുന്നു.

ന്യൂട്രോഫിലുകളും നാച്ചുറൽ കില്ലർ സെല്ലുകളും (natural killer cells) ഉൾപ്പെടെയുള്ള വിവിധ പ്രതിരോധ കോശങ്ങളുടെ വികാസത്തിനും പ്രവർത്തനത്തിനും സിങ്ക് ആവശ്യമാണ്. നട്‌സ്, മത്തങ്ങയുടെ വിത്ത് പോലുള്ള വിത്തുകൾ, പയർവർഗ്ഗങ്ങൾ, മുട്ട എന്നിവയിലൂടെ സിങ്ക് ലഭ്യമാക്കാം.

ശരീരത്തിന്റെ പ്രതിരോധ സംവിധാനത്തിലെ ആദ്യനിരയിൽ പ്രധാന പങ്കുവഹിക്കുന്ന ശ്വാസകോശ ആരോഗ്യം നിലനിർത്താൻ വിറ്റാമിൻ എ സഹായിക്കുന്നു. ക്യാരറ്റ്, മധുരക്കിഴങ്ങ്, ഇലക്കറികൾ എന്നിവ വിറ്റാമിൻ എ-യോ അതിലേക്ക് പരിവർത്തനം ചെയ്യപ്പെടാവുന്ന ഘടകങ്ങളോ നൽകുന്ന ഭക്ഷണങ്ങളിൽ ഉൾപ്പെടുന്നു.

രോഗപ്രതിരോധ കോശങ്ങളുടെ വളർച്ചയ്ക്ക് ഇരുമ്പ് പ്രധാനമാണ്; അതേസമയം, ശരീരത്തിലെ ആന്റിഓക്‌സിഡന്റ് പ്രവർത്തനങ്ങളെ സെലിനിയം സഹായിക്കുന്നു. വിവിധ നിറങ്ങളിലുള്ള പഴങ്ങളും പച്ചക്കറികളും, ധാന്യങ്ങൾ, പയറുവർഗ്ഗങ്ങൾ, മുട്ട, മറ്റ് പ്രോട്ടീൻ ഉറവിടങ്ങൾ എന്നിവ ഭക്ഷണത്തിൽ ഉൾപ്പെടുത്തുന്നത് കുട്ടികൾക്ക് ആവശ്യമായ പോഷകങ്ങൾ ലഭ്യമാക്കാൻ സഹായിക്കും.

ബെറികൾ, ബീറ്റ്‌റൂട്ട് തുടങ്ങിയ ചുവപ്പ്, പർപ്പിൾ നിറങ്ങളിലുള്ള ഭക്ഷണങ്ങളിൽ ആന്തോസയാനിനുകൾ ഉൾപ്പെടെയുള്ള ഗുണകരമായ സസ്യ സംയുക്തങ്ങൾ അടങ്ങിയിട്ടുണ്ട്. ക്യാരറ്റ്, ഓറഞ്ച് തുടങ്ങിയ ഓറഞ്ച്, മഞ്ഞ നിറങ്ങളിലുള്ള ഭക്ഷണങ്ങൾ കരോട്ടിനോയിഡുകളും വിറ്റാമിൻ സിയും നൽകുന്നു. അതേസമയം ചീര, ബ്രൊക്കോളി തുടങ്ങിയ പച്ചക്കറികളിൽ ഫോളേറ്റ് അടങ്ങിയിരിക്കുന്നു.