'ദില്ലിയിൽ കോളനികൾ നിയമവിധേയമാക്കി താമസക്കാർക്ക് പൂർണ ഉടമസ്ഥാവകാശം നൽകും'; വമ്പൻ പ്രഖ്യാപനങ്ങളുമായി ബിജെപി

ദില്ലിയിൽ തെരഞ്ഞെടുപ്പ് വാ​ഗ്ദാന പെരുമഴ തോരുന്നില്ല. 1700 അനധികൃത കോളനികൾ നിയമവിധേയമാക്കി വീടുകൾ നിർമ്മിക്കാനും, വിൽക്കാനും വാങ്ങാനുമുള്ള അധികാരം നൽകുമെന്നതാണ് ബിജെപിയുടെ മൂന്നാം പ്രകടനപത്രികയിലെ പ്രധാന വാ​ഗ്ദാനം. 

ദില്ലി: ദില്ലി തെരെഞ്ഞെടുപ്പിൽ മൂന്നാം പ്രകടന പത്രികയുമായി ബിജെപി. ദില്ലിയിലെ കോളനികൾ നിയമവിധേയമാക്കി താമസക്കാർക്ക് പൂർണ ഉടമസ്ഥാവകാശം നൽകുമെന്നതുൾപ്പെടെ വമ്പൻ പ്രഖ്യാപനങ്ങളാണ് അമിത് ഷാ അവതരിപ്പിച്ച മൂന്നാം പത്രികയിലുള്ളത്. അതിനിടെ, ആംആദ്മി പാർട്ടി ബിജെപിയുടെ ബി ടീമാണെന്ന് കോൺ​ഗ്രസ് വിമർശിച്ചു.

ദില്ലിയിൽ തെരഞ്ഞെടുപ്പ് വാ​ഗ്ദാന പെരുമഴ തോരുന്നില്ല. 1700 അനധികൃത കോളനികൾ നിയമവിധേയമാക്കി വീടുകൾ നിർമ്മിക്കാനും, വിൽക്കാനും വാങ്ങാനുമുള്ള അധികാരം നൽകുമെന്നതാണ് ബിജെപിയുടെ മൂന്നാം പ്രകടനപത്രികയിലെ പ്രധാന വാ​ഗ്ദാനം. പാക്കിസ്ഥാനിൽ നിന്നും വന്ന അഭയാർത്ഥികൾക്ക് വീട്, അസംഘടിത തൊഴിലാളികൾക്കും നെയ്ത് - നിർമ്മാണ തൊഴിലാളികൾക്കും ക്ഷേമബോർഡ്, ഇൻഷൂറൻസ്, അരലക്ഷം യുവാക്കൾക്ക് സർക്കാർജോലിയടക്കം 20 ലക്ഷം പേർക്ക് തൊഴിൽ, പാവപ്പെട്ട വിദ്യാർത്ഥികൾക്ക് മെട്രോയിൽ സൗജന്യ യാത്രക്കായി വർഷം നാലായിരം രൂപ, മുഴുവന് സമയ ബസ് - മെട്രോ സർവീസ്, ഇ ബസ് സിറ്റി, തോട്ടിപ്പണി നിർമാർജനം, 3 വർഷത്തിനകം യമുനാനദി ശുദ്ധമാക്കും മുതലായവയാണ് വാ​ഗ്ദാനങ്ങൾ. കെജ്രിവാളിനെതിരായ കേസടക്കം ഉയർത്തിക്കാട്ടി രൂക്ഷ വിമർശനം ആവർത്തിച്ച അമിത്ഷാ നിലവിലുള്ള ക്ഷേമപദ്ധതികളെല്ലാം തുടരുമെന്ന് ഓർമ്മപ്പെടുത്തി. 

അതേസമയം, തന്നെ അധിക്ഷേപിച്ചതുകൊണ്ട് ദില്ലിക്ക് ഒരു ​ഗുണവും ലഭിക്കില്ലെന്ന് അരവിന്ദ് കെജ്രിവാൾ പ്രതികരിച്ചു. എഎപി നടപ്പാക്കിയ പദ്ധതികൾ ആവ‍ർത്തിക്കുന്നതല്ലാതെ ബിജെപിക്ക് യാതൊരു കാഴ്ചപ്പാടുമില്ലെന്നും, ബിജെപി തെരഞ്ഞെടുപ്പിൽ കീഴടങ്ങിയെന്നും കെജ്രിവാൾ പറഞ്ഞു. അതേസമയം വോട്ടെടുപ്പിന് പത്ത് ദിവസം മാത്രം ബാക്കി നിൽക്കേ എഎപിക്കെതിരെ വിമർശനം കടുപ്പിക്കുകയാണ് കോൺ​ഗ്രസ്. എഎപി ബിജെപിയുടെ ബിടീമാണെന്നാണ് ജയറാം രമേശിന്റെ വിമർശനം. അണ്ണാ ഹസാരയുടെ നേതൃത്ത്വത്തിൽ 2011 ൽ നടന്ന സമരത്തിന് പിന്നിൽ ആർഎസ്എസ് ആണെന്നും ജയറാം രമേശ് ആരോപിച്ചു.

https://www.youtube.com/watch?v=Ko18SgceYX8