പാർക്ക് ചെയ്ത കാറിനുള്ളിൽ കളിക്കവെ അബദ്ധത്തിൽ ഡോർ ലോക്കായി; അഞ്ചുവയസ്സുകാരൻ ശ്വാസം മുട്ടി മരിച്ചു

എൽകെജി വിദ്യാർഥിയാ‌യ ദേവ് ‌യാദവാണ് മരിച്ചത്. വെയിലത്താണ് കാർ പാർക്ക് ചെയ്തിരുന്നത്.

ആഗ്ര: വീടിനു സമീപം കളിച്ചു കൊണ്ടിരിക്കെ പാർക്ക് ചെയ്‌ത കാറിനുള്ളിൽ അബദ്ധത്തിൽ കുടുങ്ങിയ അഞ്ചുവയസ്സുകാരൻ ശ്വാസം മുട്ടി മരിച്ചു. ഉത്തർപ്രദേശിലെ ഹത്രാസ് സിക്കന്ദ്രറാവു പട്ടണത്തിലെ ഗാർഹി ബുണ്ടു ഖാൻ പ്രദേശത്താണ് സംഭവം നടന്നതെന്ന് പൊലീസ് പറഞ്ഞു. എൽകെജി വിദ്യാർഥിയാ‌യ ദേവ് ‌യാദവാണ് മരിച്ചത്. വെയിലത്താണ് കാർ പാർക്ക് ചെയ്തിരുന്നത്.

സംഭവം നടക്കുമ്പോൾ കൃഷിയിടത്തിലായിരുന്നുവെന്ന് പിതാവ് നരേന്ദ്ര യാദവ് പറഞ്ഞു.  ഉച്ചഭക്ഷണ സമയത്ത് ഭാര്യ അവനെ അന്വേഷിച്ചെങ്കിലും എവിടെയും കണ്ടില്ല. പിന്നീട് എന്നെ വിളിച്ചു. ഞാൻ വീട്ടിലെത്തി മണിക്കൂറുകൾ നീണ്ട തിരച്ചിലിനൊടുവിൽ കാറിനുള്ളിൽ അബോധാവസ്ഥയിൽ കിടക്കുന്നതായി കുട്ടിയെ കണ്ടെത്തി. ഉടൻ തന്നെ അടുത്തുള്ള ഒരു പ്രാദേശിക ക്ലിനിക്കിലെത്തിച്ചെങ്കിലും  മരിച്ചുവെന്ന് ഡോക്ടർമാർ സ്ഥിരീകരിച്ചു.

മകൻ പലപ്പോഴും കാറിൽ കളിക്കാറുണ്ടായിരുന്നു. എന്നാൽ ഇത്തവണ അവൻ അകത്ത് കുടുങ്ങിപോകുകയായിരുന്നുവെന്നും പിതാവ് പറഞ്ഞു. സംഭവവുമായി ബന്ധപ്പെട്ട് ഇതുവരെ കേസെടുത്തിട്ടില്ലെന്ന് പോലീസ് പറഞ്ഞു.