ബം​ഗാളിൽ വരുന്നു അമൂലിന്റെ വമ്പൻ പ്ലാന്റ്, 700 കോടി രൂപയുടെ പദ്ധതി; ​തറക്കല്ലിട്ട് അമിത് ഷാ, ​ഗുജറാത്തിൽനിന്ന് നിക്ഷേപങ്ങൾ തുടരുമെന്നും പ്രഖ്യാപനം

പശ്ചിമബം​ഗാളിൽ 700 കോടി രൂപയുടെ 'അമൂൽ' ഡയറി പ്ലാന്റിന് തറക്കല്ലിട്ട് കേന്ദ്ര ആഭ്യന്തര മന്ത്രി അമിത് ഷാ. ബം​ഗാളിലേക്ക് ​ഗുജറാത്തിൽനിന്ന് നിക്ഷേപങ്ങൾ കൊണ്ടുവരുന്നത് ഇനിയും തുടരുമെന്നും ബം​ഗാളിൽ വരുന്ന പ്ലാന്റ് അമൂലിൻ്റെ ഏറ്റവും വലിയ തൈര് ഉത്പാദന പ്ലാന്റ് ആയിരിക്കുമെന്നും അമിത് ഷാ ഉദ്ഘാടന പ്രസം​ഗത്തിൽ പറഞ്ഞു.

കൊൽക്കത്ത: പശ്ചിമബം​ഗാളിൽ 700 കോടി രൂപയുടെ 'അമൂൽ' ഡയറി പ്ലാന്റിന് തറക്കല്ലിട്ട് കേന്ദ്ര ആഭ്യന്തര മന്ത്രി അമിത് ഷാ. ബം​ഗാളിലേക്ക് ​ഗുജറാത്തിൽനിന്ന് നിക്ഷേപങ്ങൾ കൊണ്ടുവരുന്നത് ഇനിയും തുടരുമെന്നും ബം​ഗാളിൽ വരുന്ന പ്ലാന്റ് അമൂലിൻ്റെ ഏറ്റവും വലിയ തൈര് ഉത്പാദന പ്ലാന്റ് ആയിരിക്കുമെന്നും അമിത് ഷാ ഉദ്ഘാടന പ്രസം​ഗത്തിൽ പറഞ്ഞു.

തൃണമൂൽ കോൺ​ഗ്രസിന് ​ഗുജറാത്ത് വിരുദ്ധ മനോഭാവമായിരുന്നു. ​ഗുജറാത്തിൽനിന്ന് ഒന്നും ബം​ഗാളിൽ പ്രവേശിക്കാൻ അനുവദിക്കില്ലെന്നായിരുന്നു അവരുടെ നിലപാട്. ഇപ്പോൾ ​ബം​ഗാളിലെ ജനങ്ങൾ ബിജെപിക്ക് വോട്ട് ചെയ്ത് ബിജെപിയെ അധികാരത്തിലേറ്റി. ബം​ഗാളിലെ ജനങ്ങൾ ​ഗുജറാത്തിൽനിന്നുള്ള നിക്ഷേപങ്ങൾ ബം​ഗാളിൽ വരുന്നത് കണ്ടുകൊണ്ടിരിക്കുകയാണ്. ഹൗറയിൽ വരുന്ന പ്ലാന്റ് അമൂലിൻ്റെ ഏറ്റവും വലിയ തൈര് ഉത്പാദന പ്ലാന്റ് ആയിരിക്കും. സംസ്ഥാനത്തെ ചെറുകിട ക്ഷീരകർഷകർക്കെല്ലാം ഇതിന്റെ പ്രയോജനം ലഭിക്കുമെന്നും അമിത് ഷാ പറഞ്ഞു. ഹൗറയിലെ പുതിയ പ്ലാന്റിന് പുറമേ ബം​ഗാളിൽ അമൂലിന്റെ പുതിയ ഐസ്ക്രീം പ്ലാന്റുകൾ സ്ഥാപിക്കുമെന്നും അമിത് ഷാ പ്രഖ്യാപിച്ചു.

അമൂലിൻ്റെ ഐസ്ക്രീം പ്ലാന്റുകൾക്കായുള്ള ഭൂമി ബം​ഗാളിൽ തയ്യാറാണെന്ന് ചടങ്ങിൽ സംസാരിച്ച മുഖ്യമന്ത്രി സുവേന്ദു അധികാരിയും പറഞ്ഞു. സംസ്ഥാനത്തിന്റെ വടക്കു,തെക്കു മേഖലകളിലായി 15 ഏക്കർ ഭൂമി വീതം അമൂലിന് നൽകുമെന്നും മുഖ്യമന്ത്രി പ്രഖ്യാപിച്ചു.

​ഹൗറയിലെ സം​ഗറെയിൽ ഫുഡ് പാർക്കിലാണ് ​ഗുജറാത്ത് ആസ്ഥാനമായി പ്രവർത്തിക്കുന്ന അമൂൽ പുതിയ പ്ലാന്റ് നിർമിക്കുന്നത്. പ്ലാന്റ് പൂർണമായും പ്രവർത്തന സജ്ജമാകുന്നതോടെ ദിനംപ്രതി 30 ലക്ഷം ലിറ്റർ പാലും 10 ലക്ഷം ലിറ്റർ തൈരും ഇവിടെനിന്ന് ഉത്പാദിപ്പിക്കാനാകും. ഏകദേശം ആയിരത്തോളം പേർക്ക് നേരിട്ട് തൊഴിലവസരവും ലഭിക്കും.