മുംബൈയിലെ പ്രതിഷേധം: നടൻ ഇമ്രാൻ ഖാൻ യുഎസ് പൗരൻ, എത്രയും വേ​ഗം നാടുകടത്തണമെന്ന് ബിജെപി നേതാവ്

മുഖ്യ തെരഞ്ഞെടുപ്പ് കമ്മീഷണർ ​ഗ്യാനേഷ് കുമാർ രാജിവെയ്ക്കുക തുടങ്ങിയ ആവശ്യങ്ങൾ ഉന്നയിച്ച് ശനിയാഴ്ച മുംബൈയിൽ സംഘടിപ്പിച്ച പ്രതിഷേധത്തിലാണ് നടൻ ഇമ്രാൻ ഖാനും പെൺസുഹൃത്തായ ലേഖ വാഷിങ്ടണും പങ്കാളികളായത്. സമരത്തിൽ പങ്കെടുത്ത ഇരുവരെയും പിന്നീട് പൊലീസ് കസ്റ്റഡിയിലെടുത്തിരുന്നു.

മുംബൈ: തെരഞ്ഞെടുപ്പ് കമ്മീഷനെതിരായ പ്രതിഷേധത്തിൽ പങ്കെടുത്ത് അറസ്റ്റിലായ നടൻ ഇമ്രാൻ ഖാനെ രാജ്യത്തുനിന്ന് നാടുകടത്തണമെന്ന് ബിജെപി നേതാവ്. മഹാരാഷ്ട്രയിലെ ബിജെപി നേതാവും മുൻ എംപിയുമായ കിരിത് സോമൈയയാണ് നടനെതിരേ രം​ഗത്തെത്തിയത്. ഇമ്രാൻ ഖാൻ യുഎസ് പൗരനാണെന്ന് അവകാശപ്പെട്ട ബിജെപി നേതാവ്, മുംബൈ പൊലീസ് നടന്റെ പൗരത്വം പരിശോധിക്കണമെന്നും ആവശ്യപ്പെട്ടു. ഇമ്രാൻ ഖാനെ എത്രയും വേ​ഗം നാടുകടത്തണം. ഒരു വിദേശ പൗരൻ രാജ്യത്തെ രാഷ്ട്രീയപ്രക്ഷോഭങ്ങളിൽ പങ്കെടുക്കാമോ എന്നും ബിജെപി നേതാവ് ചോദിച്ചു.

എസ്ഐആർ റദ്ദാക്കുക, മുഖ്യ തെരഞ്ഞെടുപ്പ് കമ്മീഷണർ ​ഗ്യാനേഷ് കുമാർ രാജിവെയ്ക്കുക തുടങ്ങിയ ആവശ്യങ്ങൾ ഉന്നയിച്ച് ശനിയാഴ്ച മുംബൈയിൽ സംഘടിപ്പിച്ച പ്രതിഷേധത്തിലാണ് നടൻ ഇമ്രാൻ ഖാനും പെൺസുഹൃത്തായ ലേഖ വാഷിങ്ടണും പങ്കാളികളായത്. സമരത്തിൽ പങ്കെടുത്ത ഇരുവരെയും പിന്നീട് പൊലീസ് കസ്റ്റഡിയിലെടുത്തിരുന്നു. പൊലീസ് കസ്റ്റഡിയിലായ നടന്റെ ​ദൃശ്യങ്ങളടക്കം പിന്നീട് വൈറലാവുകയും ചെയ്തു.

അതേസമയം, ഒരു മുംബൈ നിവാസി എന്നനിലയിലാണ് പ്രതിഷേധത്തിൽ പങ്കെടുത്തതെന്നും താൻ ഏതെങ്കിലും രാഷ്ട്രീയസംഘടനയുടെ പ്രതിനിധി അല്ലെന്നുമായിരുന്നു നടൻ ഇമ്രാൻ ഖാന്റെ പ്രതികരണം.