​ഗെയ്സർ ​ഗ്യാസ് ലീക്കായി ദമ്പതികൾ മരിച്ചു

ശീതള അഷ്ടമിക്ക് പങ്കെടുത്ത ദമ്പതികളും മകൻ വിഹാറും വീട്ടിലെത്തി കുളിക്കാനായി കുളിമുറിയിലേക്ക് കടക്കുകയായിരുന്നു. ഈ സമയത്ത് ​ഗെയ്സർ ​ഗ്യാസ് ചോർന്നതിനാൽ ശ്വാസം മുട്ടി മരിക്കുകയായിരുന്നുവെന്ന് അന്വേഷണ ഉദ്യോ​ഗസ്ഥനായ ജിതേന്ദ്ര സിങ് പറയുന്നു.   

ജയ്പൂർ: ​ഗെയ്സർ ​ഗ്യാസ് ലീക്കായി ദമ്പതികൾ മരിച്ചു. രാജസ്ഥാനിലെ ബിൽവാര ജില്ലയിലാണ് ​ഗ്യാസ് ലീക്കായതിനാൽ ശ്വാസംമുട്ടി ദമ്പതികളായ ശിവരഞ്ജൻ ഝാൻവാർ(37),കവിത(35) എന്നിവർ മരിച്ചത്. ഇരുവർക്കുമൊപ്പം ഉണ്ടായ അഞ്ചു വയസ്സുകാരനായ മകൻ രക്ഷപ്പെട്ടു.

ശീതള അഷ്ടമിക്ക് പങ്കെടുത്ത ദമ്പതികളും മകൻ വിഹാറും വീട്ടിലെത്തി കുളിക്കാനായി കുളിമുറിയിലേക്ക് കടക്കുകയായിരുന്നു. ഈ സമയത്ത് ​ഗെയ്സർ ​ഗ്യാസ് ചോർന്നതിനാൽ ശ്വാസം മുട്ടി മരിക്കുകയായിരുന്നുവെന്ന് അന്വേഷണ ഉദ്യോ​ഗസ്ഥനായ ജിതേന്ദ്ര സിങ് പറയുന്നു. 

കുളിക്കാനായി കടന്ന കുടുംബം മണിക്കൂറുകൾ കഴിഞ്ഞു പുറത്തിറങ്ങിയിരുന്നില്ല. തുടർന്ന് വീട്ടുകാർ വാതിൽ ചവിട്ടിപ്പൊളിച്ച് അകത്തു കടക്കുകയായിരുന്നു. മൂന്നുപേരും തറയിൽ ബോധരഹിതരായി കിടക്കുന്ന കാഴ്ച്ചയാണ് കാണാനായത്. ​ഗെയ്സർ ​ഗ്യാസ് ഓണായി കിടക്കുന്നതും കണ്ടെത്തി. ഉടൻ തന്നെ ആശുപത്രിയിൽ എത്തിച്ചെങ്കിലും ദമ്പതികൾ മരണത്തിന് കീഴടങ്ങി. മകൻ ആശുപത്രിയിൽ ചികിത്സയിൽ തുടരുകയാണ്.