ഐഐടി വിദ്യാര്ത്ഥി കാമ്പസിലെ ഹോസ്റ്റല് മുറിയില് തൂങ്ങി മരിച്ചു
Synopsis
മുറിയില് പരിശോധന നടത്തിയ പൊലീസ് ഉദ്യോഗസ്ഥര്ക്ക് ആത്മഹത്യാ കുറിപ്പ് പോലുള്ളവയൊന്നും കണ്ടെടുക്കാന് സാധിച്ചിട്ടില്ല
ഡല്ഹി: ഡല്ഹി ഐഐടിയില് അവസാന വര്ഷ എഞ്ചിനീയറിങ് ബിരുദ വിദ്യാര്ത്ഥി ആത്മഹത്യ ചെയ്തു. ഉത്തര്പ്രദേശ് സ്വദേശിയായ 20 വയസുകാരന് ആയുഷ് അഷ്നയാണ് കഴിഞ്ഞ ദിവസം അര്ദ്ധരാത്രിക്ക് ശേഷം കാമ്പസിലെ ഹോസ്റ്റല് മുറിയില് തൂങ്ങി മരിച്ചതെന്ന് പൊലീസ് പറഞ്ഞു. അടുത്തിടെ ബിടെക് അവസാന വര്ഷ പരീക്ഷയെഴുതിയ വിദ്യാര്ത്ഥിയാണ് ആയുഷ്.
മുറിയില് പരിശോധന നടത്തിയ പൊലീസ് ഉദ്യോഗസ്ഥര്ക്ക് ആത്മഹത്യാ കുറിപ്പ് പോലുള്ളവയൊന്നും കണ്ടെടുക്കാന് സാധിച്ചിട്ടില്ല. വിദ്യാര്ത്ഥിയുടെ മാതാപിതാക്കളെ വിവരം അറിയിച്ചിട്ടുണ്ടെന്നും മരണ കാരണം കണ്ടെത്തുന്നതിനുള്ള അന്വേഷണം പുരോഗമിക്കുകയാണെന്നും പൊലീസ് അറിയിച്ചു.
കഴിഞ്ഞ ദിവസം ഉത്തര്പ്രദേശിലെ രാംപൂര് സ്വദേശിയായ മറ്റൊരു വിദ്യാര്ത്ഥിയും ആത്മഹത്യ ചെയ്തിരുന്നു. രണ്ട് മാസം മുമ്പ് രാംപൂരില് നിന്ന് കോട്ടയിലേക്ക് താമസം മാറിയ വിദ്യാര്ത്ഥി ഐഐടി പ്രവേശനത്തിനുള്ള ജോയിന്റ് എന്ട്രന്സ് എക്സാം പരിശീലനത്തിനിടെയാണ് ജീവനൊടുക്കിയത്. സുഹൃത്തിനൊപ്പം കോട്ടയില് പേയിങ് ഗസ്റ്റായി താമസിച്ചിരുന്ന വിദ്യാര്ത്ഥി, സുഹൃത്ത് മറ്റൊരിടത്തായിരുന്ന സമയത്ത് ആത്മഹത്യ ചെയ്യുകയായിരുന്നുവെന്നാണ് പ്രാഥമിക വിവരം. ഈ സംഭവത്തിലും അന്വേഷണം പുരോഗമിക്കുകയാണ്.
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam