അപ്രതീക്ഷിത രാജി, പിന്നാലെ രാഷ്ട്രീയപ്രവേശം പ്രഖ്യാപിച്ച് യുപിയിലെ മുൻ ഐഎഎസ് ഉദ്യോ​ഗസ്ഥ ദിവ്യ മിത്തൽ; 'ഇനി ജനങ്ങൾക്കൊപ്പം'

ഉത്തർപ്രദേശിലെ നിയമസഭ തെരഞ്ഞെടുപ്പിന് മാസങ്ങൾ ബാക്കിനിൽക്കെയാണ് മുൻ ഐഎഎസ് ഉദ്യോ​ഗസ്ഥയുടെ രാഷ്ട്രീയപ്രവേശം. ഉത്തർപ്രദേശ് കേഡറിലെ 2013 ബാച്ച് ഐഎഎസ് ഉദ്യോ​ഗസ്ഥയായിരുന്നു ദിവ്യ മിത്തൽ. 13 വർഷത്തെ സേവനത്തിന് ശേഷം അടുത്തിടെയാണ് ദിവ്യ മിത്തൽ രാജിവെച്ചത്.

ലഖ്നൗ: രാഷ്ട്രീയപ്രവേശനം പ്രഖ്യാപിച്ച് ഉത്തർപ്രദേശിലെ മുൻ ഐഎഎസ് ഉദ്യോ​ഗസ്ഥ ദിവ്യ മിത്തൽ. സിവിൽ സർവീസിൽനിന്ന് രാജിവെച്ചതിന് പിന്നാലെയാണ് ഇനി മുതൽ രാഷ്ട്രീയരം​ഗത്ത് പ്രവർത്തിക്കുമെന്ന് ദിവ്യ മിത്തൽ വ്യക്തമാക്കിയത്. അതേസമയം, ഏതെങ്കിലും ഒരു രാഷ്ട്രീയപാർട്ടിക്കൊപ്പം ചേർന്നായിരിക്കില്ല തന്റെ രാഷ്ട്രീയപ്രവർത്തനമെന്നും ഒരു പാർട്ടിയുടെയും ഭാ​ഗമാകാനില്ലെന്നും അവർ വ്യക്തമാക്കി.

ഉത്തർപ്രദേശിലെ നിയമസഭ തെരഞ്ഞെടുപ്പിന് മാസങ്ങൾ ബാക്കിനിൽക്കെയാണ് മുൻ ഐഎഎസ് ഉദ്യോ​ഗസ്ഥയുടെ രാഷ്ട്രീയപ്രവേശം. ഉത്തർപ്രദേശ് കേഡറിലെ 2013 ബാച്ച് ഐഎഎസ് ഉദ്യോ​ഗസ്ഥയായിരുന്നു ദിവ്യ മിത്തൽ. 13 വർഷത്തെ സേവനത്തിന് ശേഷം അടുത്തിടെയാണ് ദിവ്യ മിത്തൽ രാജിവെച്ചത്. ഉത്തർപ്രദേശിലെ മിർസാപുർ, ദിയോറിയ തുടങ്ങിയ ജില്ലകളിൽ ജില്ലാ മജിസ്ട്രേറ്റായി ദിവ്യ മിത്തൽ പ്രവർത്തിച്ചിരുന്നു. മിർസാപുരിൽ ജില്ലാ മജിസ്ട്രേറ്റായിരിക്കെ ഉൾനാടൻ ​ഗ്രാമങ്ങളിലേക്ക് കുടിവെള്ള പദ്ധതി നടപ്പിലാക്കിയത് ഏറെ ശ്രദ്ധനേടുകയുംചെയ്തു.

സിവിൽ സർവീസിൽനിന്ന് ദിവ്യ മിത്തൽ രാജിവെച്ചതിന് പിന്നാലെ തന്നെ അവർ സജീവ രാഷ്ട്രീയത്തിലിറങ്ങുമെന്ന് അഭ്യൂഹങ്ങളുണ്ടായിരുന്നു. ഇതിനിടെയാണ് ഏതെങ്കിലും പാർട്ടിയുടെ ഭാ​ഗമാകാതെ രാഷ്ട്രീയപ്രവർത്തനം നടത്തുമെന്ന് ദിവ്യ മിത്തൽ പ്രഖ്യാപിച്ചിരിക്കുന്നത്. ഇനി ജനങ്ങൾക്കൊപ്പം ചേർന്നാണ് തന്റെ പ്രവർത്തനമെന്നും ജനങ്ങളുടെ ശബ്ദമാകുമെന്നും സാധാരണക്കാരുടെ പ്രശ്നങ്ങളിൽ ഇടപെടുമെന്നും അവർക്ക് നീതി ഉറപ്പാക്കുമെന്നും ദിവ്യ മിത്തൽ പറഞ്ഞു.