പിടിയിലായത് അഞ്ച് പാകിസ്ഥാൻ പൗരന്മാർ; ലക്ഷദ്വീപിന് സമീപം കണ്ട ബോട്ടിലുണ്ടായിരുന്നത് 3000 കോടിയുടെ ലഹരിമരുന്ന്

ലക്ഷദ്വീപിന് പടിഞ്ഞാറ് അറബിക്കടലിൽ നിന്ന് 3,000 കോടിയിലധികം രൂപ വിലമതിക്കുന്ന ലഹരിമരുന്നുകൾ കോസ്റ്റ് ഗാർഡും ഗുജറാത്ത് എടിഎസും ചേർന്ന് പിടികൂടി. ഇറാനിയൻ ബോട്ടിൽ കടത്തുകയായിരുന്ന 526 കിലോ ലഹരിവസ്തുക്കളാണ് പിടിച്ചെടുത്തത്. സംഭവത്തിൽ അഞ്ച് പാകിസ്താൻ പൗരന്മാരെ കസ്റ്റഡിയിലെടുത്ത് മുംബൈയിലെത്തിച്ച് ചോദ്യം ചെയ്തുവരികയാണ്.

ദില്ലി: അറബിക്കടലിൽ ലക്ഷദ്വീപിന് പടിഞ്ഞാറുഭാഗത്തുനിന്നും 3,000 കോടിയിലധികം രൂപ വിലമതിക്കുന്ന വൻ ലഹരിമരുന്ന് ശേഖരം ഇന്ത്യൻ കോസ്റ്റ് ഗാർഡും ഗുജറാത്ത് ഭീകരവിരുദ്ധ സ്ക്വാഡും ചേർന്ന് പിടികൂടി. സെപ്റ്റംബർ 25-നാണ് അന്താരാഷ്ട്ര ലഹരി കടത്ത് സംഘത്തെ ലക്ഷ്യമിട്ട് സംയുക്ത ഓപ്പറേഷൻ നടന്നത്. സംശയാസ്പദമായ സാഹചര്യത്തിൽ കണ്ടെത്തിയ ഇറാനിയൻ ബോട്ട് വളഞ്ഞാണ് ഉദ്യോഗസ്ഥർ പരിശോധന നടത്തിയത്. ബോട്ടിൽ നിന്ന് 526 കിലോഗ്രാം ഉയർന്ന ഗുണനിലവാരമുള്ള ഹെറോയിനും മെത്താംഫെറ്റാമൈനും അടക്കമുള്ള ലഹരിവസ്തുക്കൾ പിടിച്ചെടുത്തു.

സംഭവവുമായി ബന്ധപ്പെട്ട് ബോട്ടിലുണ്ടായിരുന്ന അഞ്ച് പാകിസ്താൻ പൗരന്മാരെ ഉദ്യോഗസ്ഥർ കസ്റ്റഡിയിലെടുത്തു. രഹസ്യവിവരത്തിന്റെ അടിസ്ഥാനത്തിൽ, കോസ്റ്റ് ഗാർഡിന്റെ കപ്പലുകളും വിമാനങ്ങളും ഉപയോഗിച്ച് പ്രദേശത്ത് കർശന വ്യോമ-സമുദ്ര നിരീക്ഷണം ഏർപ്പെടുത്തിയിരുന്നു. തുടർന്ന് സംശയാസ്പദമായ ഇറാനിയൻ ബോട്ടിനെ കൃത്യമായി പിന്തുടരുകയും ഉൾകടലിൽ വെച്ച് സാഹസികമായി കീഴടക്കുകയുമായിരുന്നു. കസ്റ്റഡിയിലെടുത്ത ബോട്ട്, ലഹരിമരുന്ന് ശേഖരം, അഞ്ച് ജീവനക്കാർ എന്നിവരെ സശസ്ത്ര സുരക്ഷയോടെ മുംബൈയിലേക്ക് എത്തിച്ചു. വിവിധ കേന്ദ്ര-സംസ്ഥാന അന്വേഷണ ഏജൻസികളുടെ നേതൃത്വത്തിൽ പ്രതികളെ ചോദ്യം ചെയ്തുവരികയാണ്. ഇതിനുശേഷം നിയമപരമായ തുടർനടപടികൾ സ്വീകരിക്കും. രാജ്യത്തെ ലഹരിമുക്തമാക്കുക എന്ന ലക്ഷ്യത്തിലേക്കുള്ള വലിയൊരു ചുവടുവെയ്പ്പാണ് ഈ വിജയകരമായ ദൗത്യമെന്ന് കോസ്റ്റ് ഗാർഡ് വ്യക്തമാക്കി.