വിവിഐപികളുടെ യാത്ര ഇനി കൂടുതല്‍ സുരക്ഷിതം; 24 പ്രത്യേക ഹെലികോപ്റ്ററുകള്‍ വാങ്ങാന്‍ വ്യോമസേന
Synopsis
രാഷ്ട്രപതി, പ്രധാനമന്ത്രി തുടങ്ങിയ വിവിഐപികളുടെ യാത്രകൾക്കായി 24 പുതിയ ഹെലികോപ്റ്ററുകൾ വാങ്ങാൻ ഇന്ത്യൻ വ്യോമസേന ഒരുങ്ങുന്നു. പതിനായിരം കോടി രൂപ ചെലവ് വരുന്ന ഈ പദ്ധതിക്ക് ഡിഫൻസ് അക്വിസിഷൻ കൗൺസിൽ അനുമതി നൽകി. എയർബസ്, ലോക്ക്ഹീഡ് മാർട്ടിൻ എന്നീ കമ്പനികളാണ് പ്രധാനമായും പരിഗണനയിലുള്ളത്.
ദില്ലി: രാജ്യത്തെ വിവിഐപികള്‍ക്കായി അത്യാധുനിക ഹെലികോപ്റ്ററുകള്‍ വാങ്ങാന്‍ വ്യോമസേന. 24 പുതിയ 'സ്‌പെഷ്യല്‍ യൂട്ടിലിറ്റി ഹെലികോപ്റ്ററുകള്‍' വാങ്ങാന്‍ ആണ് ഇന്ത്യന്‍ വ്യോമസേന ആലോചിക്കുന്നത്. ഏകദേശം പതിനായിരം കോടി രൂപയാണ് ഹെലികോപ്റ്ററുകള്‍ വാങ്ങാന്‍ ഉള്ള ചെലവ്. പ്രതിരോധ മന്ത്രി രാജ്നാഥ് സിങ്ങിന്റെ അധ്യക്ഷതയില്‍ ചേര്‍ന്ന ഡിഫന്‍സ് അക്വിസിഷന്‍ കൗണ്‍സില്‍ യോഗം പദ്ധതിക്ക് അനുമതി നല്‍കി. നിലവില്‍ രാഷ്ട്രപതി, ഉപരാഷ്ട്രപതി, പ്രധാനമന്ത്രി എന്നിവരുടെ യാത്രകള്‍ക്കായി ഉപയോഗിക്കുന്ന റഷ്യന്‍ നിര്‍മ്മിത എംഐ - 17 ഹെലികോപ്റ്ററുകള്‍ക്ക് പകരമായാണ് ഇവ വാങ്ങുന്നത്.
പരിഗണനയില്‍ എയര്‍ബസ്, ലോക്ക്ഹീഡ് മാര്‍ട്ടിന്‍
പദ്ധതിക്കായി പ്രധാനമായും പരിഗണിക്കുന്ന കമ്പനികള്‍ എയര്‍ബസിന്റെ എച്ച്-725 , യുഎസ് കമ്പനിയായ ലോക്ക്ഹീഡ് മാര്‍ട്ടിന്‍ എന്നിവയാണെന്നാണ് സൂചന. എയര്‍ബസ് ഹെലികോപ്‌റ്റേഴ്‌സ് നിര്‍മ്മിക്കുന്ന ഒരു ദീര്‍ഘദൂര, ഇരട്ട എഞ്ചിന്‍ മിലിട്ടറി ട്രാന്‍സ്‌പോര്‍ട്ട് ഹെലികോപ്റ്ററാണ് എയര്‍ബസ് എച്ച് - 725. 30 ഓളം പേരെ വഹിക്കാന്‍ ശേഷിയുള്ള ഇവയ്ക്ക് മണിക്കൂറില്‍ പരമാവധി 324 കിലോമീറ്റര്‍ വേഗതയില്‍ സഞ്ചരിക്കാന്‍ സാധിക്കും. ലോക്ക്ഹീഡ് മാര്‍ട്ടിന്‍ തങ്ങളുടെ കീഴിലുള്ള സിക്കോര്‍സ്‌കി എന്ന പ്രശസ്ത ഹെലികോപ്റ്റര്‍ കമ്പനി വഴിയാണ് അത്യാധുനിക ഹെലികോപ്റ്ററുകള്‍ നിര്‍മ്മിക്കുന്നത്.
ലോകമെമ്പാടുമുള്ള സൈനിക ആവശ്യങ്ങള്‍ക്കും വിവിഐപി യാത്രകള്‍ക്കും ദുരന്തനിവാരണ പ്രവര്‍ത്തനങ്ങള്‍ക്കും ഇവരുടെ ഹെലികോപ്റ്ററുകള്‍ വ്യാപകമായി ഉപയോഗിക്കുന്നു. രാഷ്ട്രപതി, ഉപരാഷ്ട്രപതി, പ്രധാനമന്ത്രി എന്നിവരുടെ യാത്രയ്ക്കുള്ള പ്രത്യേക ആവശ്യകതകള്‍ കണക്കിലെടുത്താണ് പുതിയ ഹെലികോപ്റ്ററുകളുടെ സാങ്കേതിക മാനദണ്ഡങ്ങള്‍ തയ്യാറാക്കിയിരിക്കുന്നത്.
മാറിയ സുരക്ഷാ മാനദണ്ഡങ്ങള്‍
വിവിഐപികള്‍ക്കായി പ്രത്യേക ഹെലികോപ്റ്ററുകള്‍ വാങ്ങാനുള്ള മുന്‍ പദ്ധതി അഴിമതി വിവാദത്തെത്തുടര്‍ന്ന് റദ്ദാക്കിയിരുന്നു. തുടര്‍ന്ന് നിലവിലുള്ള ഹെലികോപ്റ്ററുകളില്‍ മാറ്റങ്ങള്‍ വരുത്തിയാണ് അവ വിവിഐപി യാത്രകള്‍ക്കായി ഉപയോഗിച്ചുവന്നത്.
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്‌ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam