​ഗുരുതരപരിക്കേറ്റ് സഹായത്തിന് അപേക്ഷിച്ച് 13 കാരി; ദൃശ്യങ്ങൾ മൊബൈലിൽ ചിത്രീകരിച്ച് ചുറ്റുമുള്ളവർ; അന്വേഷണം

 ഉത്തർപ്രദേശിലെ കനൗജിലാണ് ഈ ക്രൂരത അരങ്ങേറിയത്. ​ഗുരുതരമായി പരിക്കേറ്റ 13 കാരി പെൺകുട്ടി സഹായത്തിനായി അഭ്യർത്ഥിച്ചിട്ടും ആരും മുന്നോട്ട് വന്നില്ല.

ലക്നൗ: ​ഗുരുതരമായി പരിക്കേറ്റ് സഹായത്തിന് അപേക്ഷിച്ച പെൺ‌കുട്ടിയുടെ വാക്കുകൾ കേൾക്കാൻ തയ്യാറാകാതെ നാട്ടുകാർ. മൊബൈലിൽ ദൃശ്യങ്ങൾ പകർത്താനുള്ള തിരക്കിലായിരുന്നു എല്ലാവരും. ഉത്തർപ്രദേശിലെ കനൗജിലാണ് ഈ ക്രൂരത അരങ്ങേറിയത്. ​ഗുരുതരമായി പരിക്കേറ്റ 13 കാരി പെൺകുട്ടി സഹായത്തിനായി അഭ്യർത്ഥിച്ചിട്ടും ആരും മുന്നോട്ട് വന്നില്ല. ഒടുവിൽ പൊലീസെത്തിയാണ് പെൺകുട്ടിയെ ആശുപത്രിയിലെത്തിച്ചത്. പെൺകുട്ടി ലൈം​ഗികമായി പീഡിപ്പിക്കപ്പെട്ടിട്ടുണ്ടോ എന്ന് സംശയമുണ്ട്. ഒക്ടോബർ 23 ന് നടന്ന സംഭവത്തിന്റെ ദൃശ്യങ്ങളാണ് വ്യാപകമായി പ്രചരിക്കുന്നുണ്ട്. 

25 സെക്കന്റ് ദൈർഘ്യമുള്ള വീഡിയോ ദൃശ്യങ്ങളിൽ രക്തം പുരണ്ട കൈകളുമായി പെൺകുട്ടി സഹായത്തിന് അഭ്യർത്ഥിക്കുന്നതായി കാണാം. എന്നാൽ ഇതൊന്നും ​ഗൗനിക്കാതെ ചുറ്റും നിൽക്കുന്ന ആളുകൾ മൊബൈലിൽ ഇത് ചിത്രീകരിക്കുകയാണ്. പെൺകുട്ടി ലൈം​ഗികമായി ആക്രമിക്കപ്പെട്ടോ എന്ന കാര്യത്തിൽ സ്ഥിരീകരണമില്ലെന്ന് ഇന്ത്യ ടുഡേ റിപ്പോർട്ട് ചെയ്ത വാർത്തയിൽ പറയുന്നു. പെൺകുട്ടിയുടെ കുടുംബത്തിന്റെ പരാതിയിൽ കേസ് രജിസ്റ്റർ ചെയ്തിട്ടുണ്ട്. എന്നാൽ സംഭവത്തിൽ ഇതുവരെ ആരും അറസ്റ്റ് ചെയ്തതായി വിവരം ലഭിച്ചിട്ടില്ല.