ഇന്ന് രാത്രി 10 മുതൽ നാളെ രാത്രി 10 വരെ ഇന്റർനെറ്റ് കട്ട്; സിജെപി സമരത്തെ നേരിടാൻ ഉത്തരവുമായി ദില്ലി പൊലീസ്

സിജെപി സമരത്തെ നേരിടാൻ ദില്ലിയിൽ കടുത്ത നടപടിയുമായി പൊലീസ്. ഇന്ന് രാത്രി 10 മുതൽ നാളെ രാത്രി 10 വരെ കർത്തവ്യപഥിൻ്റെ നാല് കിലോമീറ്റർ ചുറ്റളവിൽ ഇന്റർനെറ്റ് സേവനങ്ങൾ റദ്ദാക്കും. ടെലികമ്മ്യൂണിക്കേഷൻസ് ആക്ട് പ്രകാരമാണ് ടെലികോം കമ്പനികൾക്ക് നിർദേശം നൽകിയത്.

ദില്ലി: സിജെപി സമരത്തെ നേരിടാൻ കടുത്ത നടപടിയുമായി ദില്ലി പൊലീസ്. ഇന്ന് രാത്രി 10 മണി മുതൽ ഇൻ്റർനെറ്റ് നിയന്ത്രണം നടപ്പാക്കും. കർത്തവ്യപഥിൻ്റെ നാല് കിലോമീറ്റർ ചുറ്റളവിലായിരിക്കും നിയന്ത്രണം. നാളെ രാത്രി 10 മണി വരെയാണ് നിയന്ത്രണം. ഇത് സംബന്ധിച്ച് ഇൻറർനെറ്റ് സേവന കമ്പനികൾക്ക് നിർദേശം നൽകി. എയർടെൽ, വോഡഫോൺ/ഐഡിയ, ജിയോ & എം.ടി.എൻ.എൽ എന്നീ കമ്പനികൾക്കാണ് നിർദേശം നൽകിയത്. ടെലികമ്മ്യൂണിക്കേഷൻസ് ആക്ട് 2023 ലെ സെക്ഷൻ 20(2)(b) പ്രകാരമാണ് പൊലീസിന്റെ നടപടി.

ജനപഥ്-കർതവ്യ പഥ് ക്രോസിംഗിൽ നിന്ന് നാല് കിലോമീറ്റർ ചുറ്റളവിൽ മൊബൈൽ ഇന്റർനെറ്റ് സേവനങ്ങളും ഇന്ന് രാത്രി 10 മുതൽ നാളെ പാത്രി 10 വരെ റദ്ദാക്കാനുള്ള പൊലീസിന്റെ അഭ്യർത്ഥന കേന്ദ്ര ആഭ്യന്തര സെക്രട്ടറി പരിഗണിക്കുകയും അനുമതി അറിയിക്കുകയും ചെയ്തു. ഉത്തരവ് ഉടൻ നടപ്പിലാക്കുന്നതിനായി ആവശ്യമായ എല്ലാ നടപടികളും സ്വീകരിക്കാൻ അഭ്യർത്ഥിക്കുന്നുവെന്ന് ഡെപ്യൂട്ടി പൊലീസ് കമ്മീഷണർ മനീഷി ചന്ദ്ര ആവശ്യപ്പെട്ടു.