ഇന്ത്യയ്ക്ക് ശാസ്ത്ര മേഖലയിൽ അഭിമാന നേട്ടം ; നേച്ചര്‍ ഇന്‍ഡക്സ് പട്ടികയിൽ ഇടം നേടി കൊൽക്കത്ത

ഇന്ത്യയുടെ ശാസ്ത്ര പുരോ​ഗതിയെ എടുത്തു കാട്ടുന്ന നേട്ടമാണിത്. എഡിൻബർഗ്, ഹെൽസിങ്കി, ജനീവ തുടങ്ങിയ പ്രധാന അന്താരാഷ്ട്ര ഗവേഷണ കേന്ദ്രങ്ങളെ മറികടന്നാണ് കൊൽക്കത്ത ഈ നേട്ടം കരസ്ഥമാക്കിയത്.

ദില്ലി : ഇന്ത്യന്‍ ശാസ്ത്ര സമൂഹത്തിന് അഭിമാനിക്കാവുന്ന നേട്ടമായി കൊല്‍ക്കത്ത നഗരം. ആഗോള നേച്ചര്‍ ഇന്‍ഡക്സ് 2024 പട്ടികയില്‍ ലോകത്തെ പ്രധാന നഗരങ്ങളില്‍ മുന്‍നിരയില്‍ കൊല്‍ക്കത്തയും.  ആഗോള തലത്തില്‍ 200 ശാസ്ത്ര നഗരങ്ങളില്‍ 84-ാം സ്ഥാനത്താണ് കൊല്‍ക്കത്ത. 

പ്രമുഖ ശാസ്ത്ര ജേണലുകളിൽ പ്രസിദ്ധീകരിച്ച ലേഖനങ്ങളിൽ നൽകിയ സംഭാവനകളെ അടിസ്ഥാനമാക്കിയാണ് നേച്ചർ ഇൻഡക്സ് നഗരങ്ങളെയും  സ്ഥാപനങ്ങളെയും തെരഞ്ഞെടുക്കുന്നത്. ഇന്ത്യയിൽ കൊൽത്ത ന​ഗരമാണ് മുന്നിൽ. ഓരോ ന​ഗരത്തിന്റെയും "ഷെയർ" ഉയർന്ന സ്വാധീനമുള്ള പ്രസിദ്ധീകരണങ്ങളെയും  അതേസമയം "എണ്ണം" സംഭാവന ചെയ്ത ലേഖനങ്ങളുടെ ആകെ എണ്ണത്തെയും സൂചിപ്പിക്കുന്നു. 

ഇന്ത്യൻ നഗരങ്ങളിൽ കൊൽക്കത്ത മെട്രോപൊളിറ്റൻ ഏരിയ (എംഎ) 183.40 ഷെയറോടെ 398 എണ്ണവുമായി മുന്നിട്ടുനിൽക്കുന്നു. ഇത് ഇന്ത്യയുടെ മൊത്തത്തിലുള്ള ഗവേഷണ വിഹിതത്തിൽ 12.5% ​​ആണെന്നാണ് കണക്ക്. ബെംഗളൂരു (ആഗോളതലത്തിൽ 85), മുംബൈ എംഎ (98), ഡൽഹി എൻസിആർ (124), ഹൈദരാബാദ് എംഎ (184) എന്നിവയാണ് തൊട്ടുപിന്നിലുള്ള മറ്റു ന​ഗരങ്ങൾ.

എഡിൻബർഗ്, ഹെൽസിങ്കി, ജനീവ തുടങ്ങിയ പ്രധാന അന്താരാഷ്ട്ര ഗവേഷണ കേന്ദ്രങ്ങളെ മറികടന്നാണ് കൊൽക്കത്ത ഈ നേട്ടം കരസ്ഥമാക്കിയത്. ആഗോളതലത്തിൽ ബെയ്ജിംഗ് ഒന്നാം സ്ഥാനം നിലനിർത്തി. രണ്ടാം സ്ഥാനത്തുള്ള ന്യൂയോർക്കിനെ മൂന്നാം സ്ഥാനത്തേക്ക് പിന്തള്ളി ഷാങ്ഹായ് രണ്ടാം സ്ഥാനത്തെത്തി. 

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം