'കുട്ടിക്ക് കളിക്കാൻ വേണ്ടി മഴയോട് പോകാൻ പറയുന്നത് ശരിയല്ല',ജോണി ജോണിക്ക് പിന്നാലെ റെയിൻ റെയിൻ ഗോ എവേ കവിതയ്ക്കും എതിരെ യുപി മന്ത്രി

ഇംഗ്ലീഷ് നഴ്സറി കവിതകളായ 'റെയിൻ റെയിൻ ഗോ എവേ', 'ജോണി ജോണി യെസ് പാപ്പ' എന്നിവ കുട്ടികളെ തെറ്റായ മൂല്യങ്ങൾ പഠിപ്പിക്കുന്നുവെന്ന് ഉത്തർപ്രദേശ് ഉന്നതവിദ്യാഭ്യാസ മന്ത്രി യോഗേന്ദ്ര ഉപാധ്യായ. മഴയെ പോകാൻ പറയുന്നതും നുണ പറയുന്നതും ഭാരതീയ സംസ്കാരത്തിന് വിരുദ്ധമാണെന്ന് അദ്ദേഹം ആരോപിച്ചു. 

ലഖ്‌നൗ: പ്രശസ്തമായ ഇംഗ്ലീഷ് നഴ്സറി കവിതകൾ കുട്ടികളെ തെറ്റായ മൂല്യങ്ങൾ പഠിപ്പിക്കുന്നുവെന്ന് വീണ്ടും ഉത്തർപ്രദേശ് ഉന്നതവിദ്യാഭ്യാസ മന്ത്രി യോഗേന്ദ്ര ഉപാധ്യായ. മഴ പെയ്യുന്നത് എല്ലാവർക്കും ഗുണകരമാണെന്നിരിക്കെ, ചെറിയ കുട്ടിക്ക് കളിക്കാൻ വേണ്ടി മഴയോട് പോകാൻ പറയുന്നത് നമ്മുടെ പാരമ്പര്യത്തിന് വിരുദ്ധമാണെന്ന് മന്ത്രി പ്രാദേശിക മാധ്യമങ്ങളോട് സംസാരിക്കവെ വ്യക്തമാക്കി. 'റെയിൻ റെയിൻ ഗോ എവേ': "ചെറിയ ജോണിക്ക് കളിക്കാൻ വേണ്ടി മഴയോട് പോകാൻ ആവശ്യപ്പെടുകയാണ് ഇതിൽ. മഴ അനുഗ്രഹമായി കാണുന്ന നമ്മുടെ സംസ്‌കാരത്തിൽ ഇത് തെറ്റായ സന്ദേശമാണ് നൽകുന്നത്. അതിനാൽ ഇത്തരം കവിതകൾ പാഠപുസ്തകങ്ങളിൽ നിന്ന് നീക്കം ചെയ്യണം" - മന്ത്രി പറഞ്ഞു.

'ജോണി ജോണി യെസ് പാപ്പ' ഏതാനും ദിവസങ്ങൾക്ക് മുമ്പ് ഈ കവിതയ്ക്കെതിരെയും മന്ത്രി രംഗത്തെത്തിയിരുന്നു. പഞ്ചസാര കഴിക്കുന്നത് മാതാപിതാക്കളോട് നുണ പറയുന്ന രീതിയിലാണ് ഇതിൽ ചിത്രീകരിച്ചിരിക്കുന്നത്. ഇത് കുട്ടികളെ നുണ പറയാൻ പഠിപ്പിക്കുമെന്നും മന്ത്രി ആരോപിച്ചു. പഴയ ഹിന്ദി കവിതകൾക്കാണ് മന്ത്രിയുടെ പ്രശംസ. പഴയ തലമുറ പഠിച്ചു വളർന്ന പരമ്പരാഗത ഹിന്ദി കവിതകൾക്ക് ആഴത്തിലുള്ള മൂല്യങ്ങളും സാംസ്‌കാരിക പ്രാധാന്യവുമുണ്ടെന്ന് അദ്ദേഹം അഭിപ്രായപ്പെട്ടു.

അധ്യാപകർ പാഠപുസ്തകങ്ങൾക്ക് അപ്പുറത്തേക്ക് ചിന്തിക്കണമെന്നും പുരാതനമായ ഗുരു-ശിഷ്യ പാരമ്പര്യം ഉയർത്തിപ്പിടിക്കണമെന്നും കാൺപൂരിൽ നടന്ന ഒരു ചടങ്ങിൽ അദ്ദേഹം അധ്യാപകരോട് ആഹ്വാനം ചെയ്തു. പാശ്ചാത്യ മൂല്യങ്ങളേക്കാൾ ഭാരതീയ മൂല്യങ്ങൾക്ക് മുൻഗണന നൽകുന്ന വിദ്യാഭ്യാസ രീതിയാണ് ആവശ്യമെന്നും അദ്ദേഹം കൂട്ടിച്ചേർത്തു.