കളിക്കുന്നതിനിടെ പട്ടത്തിൻ്റെ നൂല് പൊട്ടി പറന്നുപോയി; പിടിക്കാൻ പിന്നാലെയോടിയ 7 വയസുകാരനെ ഓവുചാലിൽ വീണ് കാണാതായി

പൊട്ടിയ പട്ടം പിടിക്കാനാടുന്നതിനിടെ ഓവുചാലിൽ വീണ് ഏഴ് വയസുകാരനെ കാണാതായി

ദില്ലി: നൂല് പൊട്ടിയ പട്ടത്തിന് പിന്നാലെ ഓടിയ ഏഴ് വയസുകാരനെ ഓവുചാലിൽ വീണ് കാണാതായി. വടക്കുകിഴക്കൻ ദില്ലിയിലെ പുലിയ ലക്‌ഡി മാർക്കറ്റ് പരിസരത്താണ് സംഭവം. രാത്രി വെളിച്ചക്കുറവ് മൂലം തിരച്ചിൽ അവസാനിപ്പിക്കുന്നത് വരെ കുട്ടിയെ തെരഞ്ഞെങ്കിലും കണ്ടെത്താനായില്ല. കുട്ടിയുടെ പേരടക്കം വിശദാംശങ്ങൾ പൊലീസ് പുറത്തുവിട്ടിട്ടില്ല.

ഇന്നലെ വൈകിട്ട് പ്രദേശത്ത് പട്ടം പറത്തി കളിക്കുകയായിരുന്നു കുട്ടി. ഇതിനിടെ പട്ടത്തിൻ്റെ നൂല് പൊട്ടി പട്ടം കൈവിട്ടതോടെ ഇത് പിടിക്കാനായി പുറകെ ഓടിയതായിരുന്നു. ഓട്ടത്തിനിടെ കുട്ടി അബദ്ധത്തിൽ ഓവുചാലിൽ വീണെന്നാണ് കരുതുന്നത്.

വിവരം അറിഞ്ഞയുടൻ തങ്ങൾ സ്ഥലത്തെത്തി പരിശോധന തുടങ്ങിയെന്ന് ദില്ലി പൊലീസ് പറയുന്നു. ദില്ലി ദുരന്ത നിവാരണ അതോറിറ്റിയും തെരച്ചിലിൻ്റെ ഭാഗമായി. പ്രദേശത്തെ നീന്തൽ വിദഗ്ദ്ധരും അഗ്നിരക്ഷാ സേന ഉദ്യോഗസ്ഥരും സ്ഥലത്ത് പരിശോധന നടത്തി. ഇന്ന് രാവിലെ വീണ്ടും തെരച്ചിൽ ആരംഭിച്ചിട്ടുണ്ട്.