'അകത്തുനിന്ന് വിദ്യാർത്ഥികൾ ഫോൺവിളിച്ചു'; ഡൽഹിയിൽ തകര്‍ന്ന കെട്ടിടത്തിൽ ആളുകൾ കുടിങ്ങിക്കിടക്കുന്നതായി റിപ്പോര്‍ട്ട്

ഡൽഹിയിലെ സത്യനികേതനിൽ നിർമ്മാണത്തിലിരുന്ന കെട്ടിടം തകർന്നു വീണു. അഞ്ച് തൊഴിലാളികൾ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായി സംശയം. അകത്ത് കുടുങ്ങിയ ചില വിദ്യാർത്ഥികൾ ഫോണിൽ വിളിക്കുന്നുണ്ടെന്ന് ബിജെപി എംഎൽഎ അനിൽ ശർമ്മ വെളിപ്പെടുത്തിയത് ആശങ്ക വർധിപ്പിച്ചു.

ദില്ലി: ഡൽഹിയിലെ സത്യനികേതനിൽ നിർമ്മാണത്തിലിരുന്ന കെട്ടിടം തകർന്നു വീണ് നിരവധി പേർ കുടുങ്ങിക്കിടക്കുന്നതായി റിപ്പോർട്ട്. അഞ്ച് തൊഴിലാളികളാണ് അപകടത്തിൽപ്പെട്ടതെന്നാണ് പ്രാഥമിക വിവരം. എന്നാൽ, അവശിഷ്ടങ്ങൾക്കിടയിൽ കുടുങ്ങിയ ചില വിദ്യാർത്ഥികൾ സഹായത്തിനായി ഫോണിൽ വിളിക്കുന്നുണ്ടെന്ന ബിജെപി എംഎൽഎ അനിൽ ശർമ്മയുടെ വെളിപ്പെടുത്തൽ പുറത്തുവന്നു. തിങ്കളാഴ്ച ഉച്ചയ്ക്ക് 1:24-ഓടെയാണ് അപകടവിവരം പുറത്തറിയുന്നത്. ഉടൻ തന്നെ ഫയർഫോഴ്സിന്റെ ആറ് യൂണിറ്റുകൾ സ്ഥലത്തെത്തി രക്ഷാപ്രവർത്തനം ആരംഭിച്ചു. ദേശീയ ദുരന്ത നിവാരണ സേനയുടെ (എൻഡിആർഎഫ്) സഹായവും തേടിയിട്ടുണ്ട്.

മുന്നറിയിപ്പ് അവഗണിച്ച് നിർമ്മാണം

ഡൽഹി സർവകലാശാലയുടെ സൗത്ത് ക്യാമ്പസിന് എതിർവശത്തുള്ള ഒരു പഴയ കെട്ടിടമാണ് തകർന്നു വീണത്. പെയിങ് ഗസ്റ്റ് താമസസൗകര്യമാക്കി മാറ്റുന്നതിനുള്ള നവീകരണ പ്രവർത്തനങ്ങൾ ഇവിടെ നടന്നുവരികയായിരുന്നു. വിദ്യാർത്ഥികൾ ധാരാളമുള്ള പ്രദേശമായതിനാൽ അപകടത്തിൽപ്പെട്ടവരിൽ വിദ്യാർത്ഥികളുമുണ്ടാകാമെന്ന സംശയം ബലപ്പെട്ടിട്ടുണ്ട്.

അപകടാവസ്ഥയിലാണെന്ന് ചൂണ്ടിക്കാട്ടി മുൻസിപ്പൽ കോർപ്പറേഷൻ ഓഫ് ഡൽഹി ഈ കെട്ടിടത്തിന് നേരത്തെ നോട്ടീസ് നൽകിയിരുന്നു. ഈ മുന്നറിയിപ്പ് അവഗണിച്ചാണ് ഇവിടെ നിർമ്മാണ പ്രവർത്തനങ്ങൾ തുടർന്നതെന്നാണ് ഇപ്പോൾ വ്യക്തമാകുന്നത്. ഇതാണ് ദുരന്തത്തിലേക്ക് നയിച്ചതെന്നാണ് വിലയിരുത്തൽ.

സ്ഥലത്തെത്തിയ ആർകെ പുരം എംഎൽഎ കൂടിയായ അനിൽ ശർമ്മയാണ് വിദ്യാർത്ഥികൾ കുടുങ്ങിക്കിടക്കുന്നതായുള്ള ഗുരുതരമായ ആരോപണം ഉന്നയിച്ചത്. ഈ അവകാശവാദം രക്ഷാപ്രവർത്തകർക്കിടയിലും വലിയ ആശങ്ക സൃഷ്ടിച്ചിട്ടുണ്ട്. കെട്ടിടാവശിഷ്ടങ്ങൾക്കിടയിൽ നിന്ന് കൂടുതൽ പേരെ കണ്ടെത്താനുള്ള തീവ്രശ്രമം തുടരുകയാണ്.