വീണ്ടും ട്രംപിന്‍റെ താരിഫ് ഭീഷണി, ഇത്തവണ 200 ശതമാനം! ഇന്ത്യക്ക് കനത്ത തിരിച്ചടിയാകും, ജനറിക് മരുന്ന് ഇറക്കുമതി തടയുക ലക്ഷ്യം

യുഎസ് പ്രസിഡന്റ് ഡോണൾഡ് ട്രംപ് ഇറക്കുമതി ചെയ്യുന്ന ജനറിക് മരുന്നുകൾക്ക് ഘട്ടംഘട്ടമായി വൻ നികുതി ഏർപ്പെടുത്തുമെന്ന് പ്രഖ്യാപിച്ചു. അമേരിക്കൻ മരുന്ന് നിർമ്മാണം പ്രോത്സാഹിപ്പിക്കാൻ ലക്ഷ്യമിടുന്ന ഈ നീക്കം, യുഎസ് വിപണിയിലേക്ക് 40% മരുന്നുകളും കയറ്റുമതി ചെയ്യുന്ന ഇന്ത്യയെ കാര്യമായി ബാധിച്ചേക്കാം.

വാഷിംഗ്ടൺ: അമേരിക്കയിലേക്ക് ഇറക്കുമതി ചെയ്യുന്ന ജനറിക് (ബ്രാൻഡ് ഇല്ലാത്ത) മരുന്നുകൾക്ക് ഘട്ടംഘട്ടമായി വൻതോതിൽ നികുതി ചുമത്തുമെന്ന് യുഎസ് പ്രസിഡന്‍റ് ഡോണൾഡ് ട്രംപ് പ്രഖ്യാപിച്ചു. ജനറിക് മരുന്നുകളുടെ ഉത്പാദനം അമേരിക്കയിലേക്ക് തന്നെ തിരികെ കൊണ്ടുവരുന്നതിനും ആഭ്യന്തര നിർമ്മാണം പ്രോത്സാഹിപ്പിക്കുന്നതിനുമാണ് ഈ അടിയന്തര നടപടിയെന്ന് ട്രംപ് ട്രൂത്ത് സോഷ്യലിലൂടെ വ്യക്തമാക്കി. പുതിയ പ്രഖ്യാപനപ്രകാരം, 2026 ഓഗസ്റ്റ് ഒന്ന് മുതൽ അടുത്ത രണ്ട് വർഷത്തേക്ക് ഇറക്കുമതി ചെയ്യുന്ന ജനറിക് മരുന്നുകൾക്ക് പൂജ്യം ശതമാനം നികുതിയായിരിക്കും ഉണ്ടായിരിക്കുക.

എന്നാൽ മൂന്നാം വർഷത്തിൽ (2028 ഓഗസ്റ്റ് മുതൽ) ഇത് 100 ശതമാനമായും, അതിനുശേഷം 200 ശതമാനമായും കുത്തനെ ഉയർത്താനാണ് അമേരിക്ക ലക്ഷ്യമിടുന്നത്. അനുവദിച്ച സമയപരിധിക്കുള്ളിൽ അമേരിക്കയിൽ പ്ലാന്‍റുകളും ഉൽപ്പാദന സൗകര്യങ്ങളും നിർമ്മിക്കാത്ത കമ്പനികൾക്കുള്ള പിഴയായാണ് ഈ ഉയർന്ന നികുതി ചുമത്തുന്നതെന്ന് ട്രംപ് വ്യക്തമാക്കി. അതേസമയം, പേറ്റന്‍റുള്ളതും ബ്രാൻഡഡ് ആയതുമായ മരുന്നുകൾക്ക് നിലവിലുള്ള നയം മാറ്റമില്ലാതെ തുടരുമെന്നും അദ്ദേഹം കൂട്ടിച്ചേർത്തു.

ലോകത്തിന്‍റെ 'ഔഷധശാല' എന്ന് അറിയപ്പെടുന്ന ഇന്ത്യയെ ഈ തീരുമാനം കാര്യമായി ബാധിച്ചേക്കുമെന്നാണ് വിലയിരുത്തൽ. അമേരിക്ക ഉപയോഗിക്കുന്ന മൊത്തം ജനറിക് മരുന്നുകളുടെ അളവിൽ ഏകദേശം 40 ശതമാനവും ഇന്ത്യയിൽ നിന്നാണ് കയറ്റി അയക്കുന്നത്. പ്രതിരോധ സമ്മർദ്ദം, പ്രമേഹം, അർബുദം തുടങ്ങിയ രോഗങ്ങൾക്കുള്ള മരുന്നുകളും ഗർഭനിരോധന ഗുളികകളും ഇന്ത്യൻ കമ്പനികളാണ് അമേരിക്കൻ വിപണിയിലേക്ക് വൻതോതിൽ എത്തിക്കുന്നത്.

രണ്ടു വർഷത്തെ സമയപരിധി ലഭിക്കുന്നത് ഇന്ത്യൻ കമ്പനികൾക്ക് തങ്ങളുടെ വിതരണ ശൃംഖല പുനഃക്രമീകരിക്കാനും അമേരിക്കയിൽ കൂടുതൽ നിക്ഷേപം നടത്താനും താൽക്കാലിക ആശ്വാസം നൽകുന്നുണ്ട്. എങ്കിലും, വരും വർഷങ്ങളിൽ നികുതി 100-ഉം 200-ഉം ശതമാനമായി ഉയർന്നാൽ, കുറഞ്ഞ ചിലവിൽ അമേരിക്കയിലേക്ക് മരുന്നുകൾ കയറ്റി അയക്കുന്ന ഇന്ത്യൻ കമ്പനികളുടെ സാമ്പത്തിക ഭദ്രതയെ അത് രൂക്ഷമായി ബാധിച്ചേക്കാം.