ജലാലാബാദ് ഇനി പരശുരാംപുരി; ഉത്തർപ്രദേശിൽ വീണ്ടും പേരുമാറ്റം; മന്ത്രിസഭാ യോ​ഗത്തിൽ തീരുമാനം

ജലാലാബാദ് ന​ഗരത്തിന്റെ പേരാണ് മാറ്റിയത്. പരശുരാംപുരി എന്നതാണ് ജലാലാബാദിന്റെ പുതിയ പേര്. തിങ്കളാഴ്ച ചേർന്ന മന്ത്രിസഭാ യോ​ഗത്തിലാണ് പേരുമാറ്റത്തിന് അം​ഗീകാരം നൽകിയത്. ജലാലാബാദ് ന​ഗർ പാലിക പരിഷത്ത് ഇനിമുതൽ പരശുരാംപുരി ന​ഗർ പാലിക പരിഷത്ത് എന്നും അറിയപ്പെടും.

ലഖ്നൗ: ഉത്തർപ്രദേശിൽ വീണ്ടും പേരുമാറ്റം. ഇത്തവണ ജലാലാബാദ് ന​ഗരത്തിന്റെ പേരാണ് മാറ്റിയത്. പരശുരാംപുരി എന്നതാണ് ജലാലാബാദിന്റെ പുതിയ പേര്. തിങ്കളാഴ്ച ചേർന്ന മന്ത്രിസഭാ യോ​ഗത്തിലാണ് പേരുമാറ്റത്തിന് അം​ഗീകാരം നൽകിയത്. ജലാലാബാദ് ന​ഗർ പാലിക പരിഷത്ത് ഇനിമുതൽ പരശുരാംപുരി ന​ഗർ പാലിക പരിഷത്ത് എന്നും അറിയപ്പെടും.

ജലാലാബാദിന്റെ പേര് മാറ്റണമെന്ന ആവശ്യത്തിന് വർഷങ്ങൾ പഴക്കമുണ്ടെന്നായിരുന്നു ധനമന്ത്രി സുരേഷ് ഖന്നയുടെ പ്രതികരണം. പരശുരാമന്റെ ജന്മസ്ഥലമെന്ന് കരുതുന്നയിടമാണ് ജലാലാബാദ്. ജലാലാബാദിന്റെ പേരുമാറ്റം വർഷങ്ങളായി പരി​ഗണനയിലായിരുന്നുവെന്നും അദ്ദേഹം പറഞ്ഞു.

2025 ഏപ്രിൽ 24-നാണ് പേരുമാറ്റത്തിനുള്ള നിർദേശം സർക്കാരിന്റെ മുന്നിലെത്തിയത്. 2025 ജൂൺ 27-ന് സംസ്ഥാനം ഇതിനായി കേന്ദ്രത്തിന്റെ അനുമതി തേടി. 2025 ഓ​ഗസ്റ്റ് 19-നാണ് പേരുമാറ്റുന്നതിനുള്ള കേന്ദ്രത്തിന്റെ എൻഒസി കിട്ടിയതെന്നും തിങ്കളാഴ്ച ചേർന്ന മന്ത്രിസഭാ യോ​ഗം ഐക്യകണ്ഠേനയാണ് പേരുമാറ്റം അം​ഗീകരിച്ചതെന്നും മന്ത്രി കൂട്ടിച്ചേർത്തു.

ഉത്തർപ്രദേശിൽ അടുത്തവർഷം നിയമസഭ തിരഞ്ഞെടുപ്പ് നടക്കാനിരിക്കെയാണ് സംസ്ഥാനത്തെ മറ്റൊരു സ്ഥലത്തിന്റെ പേരുമാറ്റമെന്നത് ശ്രദ്ധേയമാണ്. നേരത്തേ അലഹാബാദ്, ഫൈസാബാദ് തുടങ്ങിയ വിവിധ സ്ഥലങ്ങളുടെ പേരുകളിലും യുപി സർക്കാർ മാറ്റംവരുത്തിയിരുന്നു.