കേന്ദ്ര സർക്കാരിന്‍റെ അപൂർവ്വ പ്രശംസ നേടി വിജയ് സർക്കാർ; നിർണായക തീരുമാനം, തമിഴ്‌നാട്ടിൽ വിമാന ഇന്ധന നികുതി കുറച്ചു

വിമാന ഇന്ധനമായ എടിഎഫിന്റെ മൂല്യവർദ്ധിത നികുതി തമിഴ്‌നാട് സർക്കാർ വൻതോതിൽ വെട്ടിക്കുറച്ചു. ചെന്നൈയിൽ നികുതി 16 ശതമാനമായും മറ്റ് വിമാനത്താവളങ്ങളിൽ ഒരു ശതമാനമായുമാണ് കുറച്ചത്. വിമാനക്കമ്പനികൾക്ക് വലിയ ആശ്വാസമാകുന്ന ഈ തീരുമാനത്തെ കേന്ദ്ര വ്യോമയാന മന്ത്രി പ്രശംസിച്ചു.

ചെന്നൈ: ആകാശ ഇന്ധനമായ ഏവിയേഷൻ ടർബൈൻ ഫ്യൂവലിന്‍റെ മൂല്യവർദ്ധിത നികുതി വൻതോതിൽ വെട്ടിക്കുറച്ച തമിഴ്‌നാട് സർക്കാരിന് കേന്ദ്ര സർക്കാരിന്‍റെ അപൂർവ്വ പ്രശംസ. ക്രൂഡ് ഓയിൽ വില കുതിച്ചുയരുന്ന സാഹചര്യത്തിൽ വിമാനക്കമ്പനികൾക്ക് ആശ്വാസമേകുന്നതാണ് തമിഴ്‌നാട് സർക്കാരിന്‍റെ ഈ തീരുമാനം. ചെന്നൈയിൽ എടിഎഫ് നികുതി 29 ശതമാനത്തിൽ നിന്ന് 16 ശതമാനമായും, സംസ്ഥാനത്തെ മറ്റ് വിമാനത്താവളങ്ങളിൽ ഇത് വെറും ഒരു ശതമാനമായും കുറച്ചു. സിവിലിയൻ വ്യോമയാന മന്ത്രി റാം മോഹൻ നായിഡുവാണ് തമിഴ്‌നാട് മുഖ്യമന്ത്രി വിജയ്‍യുടെ ഈ നടപടിയെ പ്രശംസിച്ച് രംഗത്തെത്തിയത്. വിമാന യാത്ര കൂടുതൽ ജനകീയമാക്കുന്നതിൽ കേന്ദ്ര-സംസ്ഥാന സർക്കാരുകൾ തമ്മിലുള്ള ഇത്തരം ഏകോപനം നിർണായകമാണെന്ന് റാം മോഹൻ നായിഡു എക്സിൽ കുറിച്ചു. ജിഎസ്ടി പരിധിക്ക് പുറത്തുള്ള എടിഎഫിന് സ്വന്തം നിലയിൽ നികുതി നിശ്ചയിക്കാൻ സംസ്ഥാനങ്ങൾക്ക് സ്വാതന്ത്ര്യമുണ്ട്.

ഇന്ധന നികുതി കുറച്ചതിന്‍റെ പ്രാധാന്യം

ഒരു വിമാനക്കമ്പനിയുടെ പ്രവർത്തനച്ചെലവിന്‍റെ 30 മുതൽ 40 ശതമാനം വരെ സാധാരണയായി ഇന്ധനവിലയാണ്. എന്നാൽ നിലവിലെ സാഹചര്യത്തിൽ ഇത് 55 മുതൽ 60 ശതമാനം വരെയായി വർദ്ധിച്ചിരിക്കുകയാണ്. ഈ ഫെബ്രുവരിയിൽ യുഎസ്-ഇറാൻ യുദ്ധം പൊട്ടിപ്പുറപ്പെട്ടതുമുതൽ ജെറ്റ് ഇന്ധന വില തുടർച്ചയായി ഉയരുകയാണ്. യുദ്ധം അവസാന ലക്ഷണങ്ങൾ കാണിക്കാത്തതിനാൽ എടിഎഫ് വിലക്കയറ്റവും വ്യോമാതിർത്തി അടച്ചിടലുകളും കാരണം ലോകമെമ്പാടുമുള്ള വിമാനക്കമ്പനികൾ പ്രതിസന്ധിയിലാണ്.

ഇന്ത്യൻ കമ്പനികളെ സംബന്ധിച്ചിടത്തോളം രൂപയുടെ മൂല്യത്തകർച്ചയും പാകിസ്ഥാൻ വ്യോമാതിർത്തി അടച്ചിട്ടതും പാശ്ചാത്യ രാജ്യങ്ങളിലേക്കുള്ള വിമാനങ്ങളുടെ യാത്രാദൂരവും ഇന്ധനച്ചെലവും വർദ്ധിപ്പിച്ചിട്ടുണ്ട്. എടിഎഫ് വില പത്ത് വർഷത്തെ ഏറ്റവും ഉയർന്ന നിരക്കിലാണ് ഉള്ളത്. നികുതി കുറയ്ക്കുന്നത് വിമാനക്കമ്പനികളുടെ പ്രവർത്തനച്ചെലവ് കുറയ്ക്കാനും യാത്രാനിരക്കുകൾ പിടിച്ചുനിർത്താനും സഹായിക്കുമെന്നാണ് വിലയിരുത്തപ്പെടുന്നത്.

തമിഴ്‌നാട് സർക്കാരിന്‍റെ നിർണ്ണായക തീരുമാനം

വ്യോമയാന മേഖലയെ കൂടുതൽ മത്സരസ്വഭാവമുള്ളതാക്കാനുള്ള നിർണ്ണായക ചുവടുവെപ്പാണ് ഇതെന്നും, കൂടുതൽ പുതിയ റൂട്ടുകൾ ആരംഭിക്കാനും പ്രാദേശിക വിമാനത്താവളങ്ങളെ ശക്തിപ്പെടുത്താനും ഇത് സഹായിക്കുമെന്നും തമിഴ്‌നാട് വ്യവസായ മന്ത്രി വിരുദ്ധൈ മഗൽ കീർത്തന വ്യക്തമാക്കി. ചെന്നൈ വിമാനത്താവളത്തിൽ 29 ശതമാനമായിരുന്ന നികുതി 16 ശതമാനമാക്കിയും, മറ്റ് വിമാനത്താവളങ്ങളിൽ ഇത് ഒരു ശതമാനമാക്കിയും കുറച്ചുകൊണ്ട് വെള്ളിയാഴ്ച മൂന്ന് ഗെസറ്റ് വിജ്ഞാപനങ്ങൾ പുറത്തിറക്കി. 40,000 കിലോഗ്രാമിൽ താഴെ ഭാരമുള്ള ചെറിയ വിമാനങ്ങളുടെ ഇന്ധന നികുതിയും ഒരു ശതമാനമായി കുറച്ചിട്ടുണ്ട്. അടുത്ത ഒരു വർഷത്തേക്ക് ഈ ഉത്തരവ് നിലവിലുണ്ടാകും. വിമാനക്കമ്പനികൾ ഈ ഇളവിന്‍റെ ആനുകൂല്യം യാത്രക്കാർക്ക് കൈമാറുമോ എന്നാണ് ഇനി കണ്ടറിയേണ്ടത്.