126 മണ്ഡലങ്ങൾ, രണ്ടര കോടിയോളം വോട്ടർമാർ; അസമിൽ എൻഡിഎയും കോൺ​ഗ്രസ് നയിക്കുന്ന പ്രതിപക്ഷ മുന്നണിയും നേർക്കുനേർ പോരാട്ടം, ഇന്ന് വോട്ടെടുപ്പ്

അസമിൽ ഇന്ന് വോട്ടെടുപ്പ്. രാവിലെ 7 മണിക്ക് 126 മണ്ഡലങ്ങളിലും വോട്ടെടുപ്പ് തുടങ്ങും, വൈകീട്ട് 6 മണിവരെയാണ് വോട്ടെടുപ്പ്.

ദിസ്പൂർ: നിയമസഭാ തെരഞ്ഞെടുപ്പ് നടക്കുന്ന അസമിൽ ഇന്ന് വോട്ടെടുപ്പ്. രാവിലെ 7 മണിക്ക് 126 മണ്ഡലങ്ങളിലും വോട്ടെടുപ്പ് തുടങ്ങും, വൈകീട്ട് 6 മണിവരെയാണ് വോട്ടെടുപ്പ്. ഒറ്റ ഘട്ടമായാണ് വോട്ടെടുപ്പ് നടക്കുക. രണ്ടര കോടിയോളം വോട്ടർമാരാണ് സംസ്ഥാനത്തുള്ളത്. ഒന്നേകാൽ കോടി വോട്ടർമാർ സ്ത്രീകളാണ്. 6.42 ലക്ഷം പേർ പുതിയ വോട്ടർമാരാണ്. ഭൂരിഭാ​ഗം മണ്ഡലങ്ങളിലും ബിജെപി നയിക്കുന്ന എൻഡിഎയും കോൺ​ഗ്രസ് നയിക്കുന്ന പ്രതിപക്ഷ മുന്നണിയും നേർക്കുനേർ പോരാട്ടമാണ്. ആകെ 722 സ്ഥാനാർത്ഥികളാണ് മത്സര രം​ഗത്തുള്ളത്. 31,490 പോളിം​ഗ് സ്റ്റേഷനുകളാണ് 35 ജില്ലകളിലായുള്ളത്. പ്രശ്ന ബാധിത ബൂത്തുകളിൽ സുരക്ഷ വിന്യാസം ശക്തമാക്കി. 2016 മുതൽ സംസ്ഥാനം ഭരിക്കുന്ന ബിജെപി മൂന്നാം തവണയും ഭരണ തുടർച്ച ലക്ഷ്യമിടുമ്പോൾ ശക്തമായ തിരിച്ചുവരവാണ് കോൺ​ഗ്രസ് പ്രതീക്ഷിക്കുന്നത്. ഭൂരിഭാ​ഗം സർവേകളും ഭരണ തുടർച്ചയാണ് സംസ്ഥാനത്ത് പ്രവചിച്ചത്.