മഴക്കെടുതി: മരണം 76, നാളെ എവിടെയും റെഡ് അലര്‍ട്ട് ഇല്ല, ആറ് ജില്ലകളില്‍ ഓറഞ്ച് അലര്‍ട്ട് - Live

ഇരട്ടയാർ, കല്ലാർ എന്നീ എന്നീ ഡാമുകളുടെ ഷട്ടറുകൾ അടച്ചിട്ടുണ്ട്. അരുവിക്കര ഡാമിന്റെ ഷട്ടറിന്‍റെ ഉയരം 50 മുതൽ 20 സെന്‍റീമീറ്റർ വരെ കുറഞ്ഞിട്ടുണ്ട്. മറ്റു റിസർവോയറിലേക്കുള്ള വെള്ളത്തിന്‍റെ ഒഴുക്കും റിസർവോയറില്‍ നിന്നുള്ള വെള്ളത്തിന്‍റെ ഒഴുക്കും ഇപ്പോൾ സ്ഥിരഗതിയിലാണ്. 

മധ്യ കേരളത്തിലെ ദുരിതാശ്വാസ ക്യാമ്പിൽ നാളെ മുതൽ സൗജന്യമായി പാൽ നൽകുമെന്ന് മിൽമ എറണാകുളം മേഖല യൂണിയൻ

അപ്പർ കുട്ടനാട് മേഖലകളിൽ 14 പാടശേഖരങ്ങളിലായി ആയിരം ഹെക്ടറിലെ കൃഷി നശിച്ചു. എണ്ണൂറിലധികം വീടുകളിൽ വെള്ളം കയറി. 6200 പേരാണ് ജില്ലയിലെ 48 ദുരിതാശ്വാസ ക്യാമ്പുകളിലായിയുള്ളത്.

സംസ്ഥാനത്ത് കഴിഞ്ഞ അഞ്ച് ദിവസത്തിനിടെ കിട്ടിയത് 467 മില്ലി മഴ. ഈ കാലവർഷത്തിൽ കിട്ടേണ്ട മഴയുടെ നാലിലൊന്നും കിട്ടിയത് ഈ അഞ്ച് ദിവസം കൊണ്ടാണ്. നാളെ മഴ കുറയുമെന്നാണ് കാലാവസ്ഥാ നിരീക്ഷണകേന്ദ്രത്തിന്‍റെ പ്രവചനം. സംസ്ഥാനത്തെ കാലാവസ്ഥയിലുണ്ടായ അപകടകരമായ ചില മാറ്റങ്ങളിലേക്കാണ് അടുപ്പിച്ചുള്ള വര്‍ഷങ്ങളിലുണ്ടായ പ്രളയം വിരല്‍ ചൂണ്ടുന്നതെന്ന് കാലാവസ്ഥാ വിദഗ്ദ്ധര്‍ പറയുന്നു. 

കോഴിക്കോട് ജില്ലയിൽ 317 ക്യാമ്പുകളിലായി 18024 കുടുംബങ്ങളിലെ 58317 പേർ കഴിയുന്നു

മധ്യകേരളത്തിലെ ദുരിതാശ്വാസ ക്യാമ്പിൽ നാളെ മുതൽ സൗജന്യമായി പാൽ നൽകുമെന്ന് മിൽമ എറണാകുളം മേഖല യൂണിയൻ അറിയിച്ചു. 

കുട്ടനാട്ടിലെ കൈനകരിയിൽ പാടശേഖരങ്ങളിൽ മട വീണതിനെ തുടർന്ന് ദുരിതത്തിലായവരെ  പുനരധിവസിപ്പിക്കുന്നതിനായി ആലപ്പുഴ എസ്ഡിവിജെബിഎസ് സ്‌കൂളിൽ ദുരിതാശ്വാസ ക്യാമ്പ് തുറന്നു. 

ഇന്ന് വൈകുന്നേരത്തോടെ ആകെ 80 കുടുംബങ്ങളിലായി 333 പേരാണ് ക്യാമ്പിലുള്ളത്. ജലഗതാഗത വകുപ്പിന്റെ രണ്ടു ബോട്ടുകളും മൂന്നു വാട്ടർ ആംബുലൻസും രണ്ട് ഫയർ ആന്റ് റസ്‌ക്യൂ ബോട്ടുകളും ചേർന്നാണ് കുടുംബങ്ങളെ കൈനകരിയിൽ നിന്നും ഒഴിപ്പിച്ച് ആലപ്പുഴയിലെത്തിച്ചത്.

പ്രധാനമന്ത്രിയോട് കേരളത്തിലെ കാര്യങ്ങൾ അറിയിച്ചിട്ടുണ്ടെന്ന് രാഹുൽ ഗാന്ധി . "ക്യാന്പുകളിൽ കൂടുതൽ സൗകര്യങ്ങൾ മെച്ചപ്പെടേണ്ടതുണ്ട്" . രാജ്യം കേരളത്തിന് ഒപ്പം നിൽക്കണമെന്ന് രാഹുൽ ഗാന്ധി. കൂടുതൽ കേന്ദ്ര സഹായം ആവശ്യപ്പെടുമെന്നും രാഹുൽ ഗാന്ധി മാധ്യമങ്ങളോട് പറഞ്ഞു. 

സംസ്ഥാനത്ത് ഏറ്റവും അധികം ആളുകളെ പ്രളയം ബാധിച്ചത് കോഴിക്കോട് ജില്ലയിലാണ്. അരലക്ഷത്തിലേറെ പേർ ദുരിതാശ്വാസ ക്യാംപുകളിലായി. പുഴകളിൽ വെള്ളം ഇറങ്ങിത്തുടങ്ങിയതോടെ രക്ഷാപ്രവർത്തനം സജീവമായി. വീടുകളിലേക്ക് മടങ്ങിത്തുടങ്ങിയവർ പാമ്പടക്കമുള്ള ഇഴജന്തുക്കളെകണ്ട് പകച്ച് നിൽക്കുകയാണ്.

ഇടുക്കി മൂന്നാർ പെരിയവരെ പാലത്തിലൂടെയുള്ള ഗതാഗതം പുനഃസ്ഥാപിച്ചു. ചെറിയ വാഹനങ്ങളാണ് കടത്തി വിടുന്നത്. താത്കാലിക പാലം നിർമിച്ചാണ് ഗതാഗതം പുനഃസ്ഥാപിച്ചത്

ക്യാമ്പുകളില്‍ നിന്ന് പോകുന്നവര്‍ക്ക് മാനസിക പിന്തുണ ഉറപ്പാക്കുമെന്ന് ആരോഗ്യമന്ത്രി കെ കെ ശൈലജ. മണ്ഡലത്തിലെ ദുരിതാശ്വാസ ക്യാമ്പ് സന്ദർശിക്കുമ്പോൾ തങ്ങളുടെ വീട് നഷ്ടപ്പെട്ടതിലും, വീട്ടുപകരണങ്ങൾ നഷ്ടപ്പെട്ടതിലും, രേഖകൾ നഷ്ടപ്പെട്ടതിലുമുള്ള സങ്കടമാണ് എല്ലാവരും പങ്കുവെച്ചത്. ചിലർ മാനസിക സംഘർഷത്തിലാണെന്ന് മനസ്സിലാക്കാൻ കഴിഞ്ഞു. പ്രളയ ദുരിതം നേരിട്ട് സ്വന്തം വീടുകളിലേക്ക് തിരികെ പോകുന്നവര്‍ക്ക് ഉണ്ടാകാനിടയുള്ള മാനസിക സംഘര്‍ഷങ്ങള്‍ പരിഗണിച്ച് ഇത്തരം ആളുകള്‍ക്ക് മാനസിക പിന്തുണ നല്‍കുന്നതിനായി പ്രത്യേക ആരോഗ്യ-കൗണ്‍സലിംഗ് സംഘത്തെ സജ്ജമാക്കുമെന്നും ആരോഗ്യമന്ത്രി വ്യക്തമാക്കി. 

ദുരിതാശ്വാസപ്രവര്‍ത്തനങ്ങള്‍ക്കായി കൈകോര്‍ത്ത് വിമന്‍ ഇന്‍ സിനിമാ കളക്ടീവ് കൂട്ടായ്മ. നാളെ രാവിലെ 10 മണി മുതല്‍ കലൂരിലെ മാമാങ്കം സ്റ്റ്യുഡിയോയില്‍ ദുരിതാശ്വാസക്യാമ്പിലേക്ക് ആവശ്യമായ സാധൻങ്ങള്‍ ശേഖരിക്കുന്നു. കേരളത്തിനായി ഒരുമിച്ച് നില്‍ക്കാമെന്ന് സംഘാടകര്‍. 

നാളെ സംസ്ഥാനത്ത് എവിടെയും റെഡ് അലര്‍ട്ട് ഇല്ല, ആറു ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഇടുക്കി, മലപ്പുറം, കോഴിക്കോട്, കണ്ണൂർ, വയനാട്, കാസർകോട് ജില്ലകളിലാണ് റെഡ് അലര്‍ട്ട് പ്രഖ്യാപിച്ചിരിക്കുന്നത്. 

കനത്തമഴയെ തുടര്‍ന്നുണ്ടായ നാശനഷ്ടങ്ങളില്‍ ദുരിതത്തിലായവര്‍ക്കായി സഹായം അഭ്യര്‍ത്ഥിച്ച് ആലപ്പുഴ ജില്ലാ കളക്ടര്‍ അദീല അബ്ദുള്ളയും സബ് കളക്ടര്‍ കൃഷ്ണ തേജയും. ദുരിതാശ്വാസ ക്യാമ്പുകളിലേക്കായി അവശ്യവസ്തുക്കള്‍ നല്‍കാനാണ് അദീല അബ്ദുള്ളയും സബ് കളക്ടര്‍ കൃഷ്ണ തേജയും അഭ്യര്‍ത്ഥിച്ചിരിക്കുന്നത്.

മഴക്കെടുതിയില്‍ നാല് ദിവസത്തിനിടെ സംസ്ഥാനത്ത് തകര്‍ന്നത് 3052 വീടുകള്‍. ഇതില്‍ 265 വീടുകള്‍ പൂര്‍‍ണ്ണമായും നശിച്ചു.  2,787 വീടുകള്‍ ഭാഗികമായി തകര്‍ന്നു. രണ്ടരലക്ഷത്തിലേറെ പേരാണ് ദുരിതാശ്വാസ ക്യാമ്പുകളിലെത്തിയതെന്നും സര്‍ക്കാരിന്‍റെ ഔദ്യോഗിക കണക്കുകള്‍ വ്യക്തമാക്കുന്നു. പേമാരിയും ഉരുള്‍പൊട്ടലും ഏറ്റവും നാശം വിതച്ചത് മലപ്പുറം ജില്ലയിലാണ്.

സംസ്ഥാനത്ത് മഴക്കെടുതിയിൽ ഇതുവരെ മരിച്ചവരുടെ എണ്ണം 76 ആയി .

കോഴിക്കോട് ഒരു മരണം കൂടി.വടകര തൂണേരിയിൽ ഇബ്രാഹിം മരം മുറിക്കുന്നതിന് ഇടയിൽ മരത്തിൽ നിന്ന് വീണ് മരിച്ചു. ഇതോടെ ജില്ലയിൽ മരണം 17 ആയി

പാലക്കാട് നിന്ന് ചുരം വഴി  അട്ടപ്പാടിയിലേക്ക്  കെഎസ്ആർടിസി ബസ്സുകൾ ഓടിത്തുടങ്ങി. മുഴുവൻ സർവീസുകളും പതിവുപോലെ നടക്കുന്നുണ്ടെന്ന് പാലക്കാട് കെഎസ്ആർടിസി സ്റ്റേഷൻ മാസ്റ്റർ അറിയിച്ചു. 

മണ്ണടിച്ചിലും ഉരുൾ പൊട്ടലും നടന്ന സ്ഥലം അസ്ഥിരമായതിനാൽ ഏറെ വാഹനങ്ങളും, പ്രത്യേകിച്ച് ജെ സി ബി യും ഹെവി വാഹനങ്ങളും എത്തിക്കുന്നത് അപകട സാധ്യത കൂട്ടുമെന്ന് യുഎൻ ദുരന്ത ലഘൂകരണവിഭാഗം തലവൻ മുരളി തുമ്മാരുകുടി. ഉരുള്‍പൊട്ടിയ സ്ഥലത്തെ രക്ഷാപ്രവര്‍ത്തനത്തിനിടെ വിഐപികളുടെ സന്ദര്‍ശനം വേണ്ടെന്നും തുമ്മാരക്കുടി.

കുണ്ടുതോട് വീട് തകർന്ന് മരിച്ച യുനുസിന്‍റെ കുട്ടികളെ കാണാന്‍ രാഹുൽ ഗാന്ധി എത്തി

തൃശൂരിൽ ദുരിതാശ്വാസ ക്യാമ്പിൽ നിന്ന് വീട്ടിലേക്ക് മടങ്ങവെ വെള്ളക്കെട്ടിൽ വീണ് ഒരാൾ മരിച്ചു. മംഗലത്ത് വീട്ടിൽ പ്രദീപൻ ആണ് മരിച്ചത്. 

അതിരപ്പിള്ളി, വാഴച്ചാൽ വെള്ളച്ചാട്ടത്തില്‍  നാളെ മുതൽ സഞ്ചാരികൾക്ക് സന്ദർശിക്കാൻ അനുമതി

മലപ്പുറം മമ്പാട് എംഇഎസ് കോളേജിലെ ദുരിതാശ്വാസ ക്യാമ്പിൽ രാഹുൽ ഗാന്ധി എത്തി. മമ്പാട് പഞ്ചായത്തിലെ 558 പേരുള്ള ക്യാമ്പാണിത്. 

പയ്യന്നൂർ നഗരസഭ വണ്ണാത്തിപ്പുഴക്ക് കുറുകെയുള്ള മീങ്കുഴി റെഗുലേറ്ററിന്‍റെ ഷട്ടർ തകർന്നു. വീടുകളിൽ വെള്ളം കയറി.

ദുരന്തബാധിത പ്രദേശങ്ങൾക്ക് കൈത്താങ്ങായി എറണാകുളം ജില്ലയിൽ തുടങ്ങിയ കളക്ഷൻ സെന്‍ററുകളിലും തണുപ്പൻ പ്രതികരണമാണ്. കളക്ട്രേറ്റിലടക്കം കളക്ഷൻ സെന്‍ററുകൾ തുടങ്ങിയെങ്കിലും മരുന്നടക്കമുള്ള അവശ്യവസ്തുക്കൾ കാര്യമായെത്തുന്നില്ല. കഴിഞ്ഞ പ്രളയകാലത്ത് ആയിരങ്ങൾക്ക് കൈത്താങ്ങായ 'അൻപൊട് കൊച്ചി'യിലും ഇതാണവസ്ഥ.

ഉരുള്‍പൊട്ടി വന്‍ അപകടമുണ്ടായ വയനാട്ടിലെ പുത്തുമലയിൽ ഒരു മൃതദേഹം കൂടി കണ്ടെടുത്തു. പുത്തുമലയിൽ കണ്ടെത്തിയത് 10 പേരുടെ മൃതദേഹം. 

കവളപ്പാറയില്‍ ഉരുള്‍പൊട്ടി കാണാതായവരില്‍ ഒരാളുടെ മൃതദേഹം കൂടി കണ്ടെത്തി. ഇതോടെ മരിച്ചവരുടെ എണ്ണം 13 ആയി. 

സംസ്ഥാനത്ത് മഴക്കെടുതിയില്‍ മരിച്ചവരുടെ എണ്ണം 73 ആയി. 

വയനാട് എംപി രാഹുല്‍ ഗാന്ധി ഉരുള്‍പൊട്ടലുണ്ടായി ദുരന്തഭൂമിയായി മാറിയ കവളപ്പാറ സന്ദര്‍ശിച്ചു. പ്രദേശത്തെ ആളുകളുമായി രാഹുല്‍ സംസാരിച്ചു. 

സംസ്ഥാനത്ത് വിവിധ ജില്ലകളിലായി ക്യാമ്പുകളില്‍ കഴിയുന്നത് 2.5 ലക്ഷത്തിലധികം പേര്‍.1621 ക്യാമ്പുകളിലായി 254339 പേര്‍ താമസിക്കുന്നുണ്ടെന്നാണ് ഔദ്യോഗിക കണക്കുകള്‍ വ്യക്തമാക്കുന്നത്. മഴക്കെടുതി ഏറ്റവുമധികം ബാധിച്ച മലപ്പുറം ജില്ലയില്‍ 237 ക്യാമ്പുകളിലായി 54139 പേരും കോഴിക്കോട് 317 ക്യാമ്പുകളിലായി 52416 പേരുമാണ് കഴിയുന്നത്. വയനാട് 207 ക്യാമ്പുകളിലായി 35882 പേരുണ്ട്.  

കോട്ടയം മാണിക്കുന്നത്ത് തോട്ടിൽ കുളിക്കാനിറങ്ങി കാണാതായ യുവാവ് മരിച്ചു. പാറേപ്പാടം സ്വദേശി നന്ദു(19)വാണ് മരിച്ചത്. ഫയർഫോഴ്സും നാട്ടുകാരും തിരച്ചിൽ നടത്തുന്നു

ഡാമിലേക്കുള്ള നീരൊഴുക്ക് കുറഞ്ഞതിനാൽ ഇടുക്കിയിലെ രണ്ട്‌ ഡാമുകൾ അടച്ചു.  കല്ലാർ, ഇരട്ടയാർ ഡാമുകളുടെ ഷട്ടറുകളാണ് അടച്ചത്

സംസ്ഥാനത്ത് മഴക്കെടുതിയിൽ മരിച്ചവരുടെ എണ്ണം 72

തിരുവനന്തപുരത്തുനിന്ന് പുറപ്പെടേണ്ടിയിരുന്ന മംഗളൂരു, മലബാർ, മാവേലി എസ്പ്രസ്സുകൾ റദ്ദാക്കി. 

12602 മംഗലാപുരം - എംജിആര്‍ ചെന്നൈ സെന്‍ട്രല്‍ 
12686 മംഗലാപുരം - എംജിആര്‍ ചെന്നൈ സെന്‍ട്രല്‍ 
56324 മംഗലാപുരം - കോയന്പത്തൂർ
16528 കണ്ണൂർ - യശ്വന്ത്പൂര്‍ 
56604 ഷൊര്‍ണ്ണൂര്‍ - കോയന്പത്തൂർ 
56323 കോയന്പത്തൂർ‍ - മംഗലാപുരം
16858 മംഗലാപുരം സെൻട്രൽ - പുതുച്ചേരി
2610 കോയന്പത്തൂര്‍ - മംഗലാപുരം സെന്‍ട്രല്‍
2609 മംഗലാപുരം സെന്‍ട്രല്‍ - കോയന്പത്തൂർ
2607 എറണാകുളം ജംഗ്ഷന്‍ - ബനസ് വാടി

കോട്ടയം മാണിക്കുന്നത്ത് തോട്ടിൽ കുളിക്കാനിറങ്ങിയ യുവാവിനെ കാണാതായി. പാറേപ്പാടം സ്വദേശി നന്ദുവിനെയാണ് (19) കാണാതായത്. 
ഫയർഫോഴ്സും നാട്ടുകാരും തിരച്ചിൽ നടത്തുന്നു.

ശാന്തന്‍പാറ സ്വദേശി ഈട്ടിക്കല്‍ സാബു (55)ആണ് മരിച്ചത്. ആനയിറങ്കല്‍ എണ്‍പതേക്കര്‍ ഭാഗത്തുവെച്ചാണ് വള്ളം മറിഞ്ഞ് അപകടമുണ്ടായത്. മൃതദേഹം നെടുംകണ്ടം താലൂക്ക് ആശുപത്രിയിലേക്ക് മാറ്റി. 

നിലമ്പൂർ, വണ്ടൂർ, പെരിന്തൽമണ്ണ ഭാഗങ്ങളിലാണ് മഴ പെയ്യുന്നത്

കണ്ണൂരിൽ വെള്ളക്കെട്ടിൽ വീണ് ഒരാള്‍ മരിച്ചു. പേരളശ്ശേരി വാവോട് സ്വദേശി ഇഖ്ബാൽ (39) ആണ് മരിച്ചത് . 

 നാൽപ്പതോളം നായ്ക്കളെ സംരക്ഷിക്കാനായി, ക്യാമ്പിലേക്ക് പോകാതെ വീട്ടിൽ കൂട്ടിരിക്കുകയാണ് തൃശൂർ തളിക്കുളം സ്വദേശികളായ സിന്‍റോയും സുനിതയും. പ്രദേശത്ത് വെള്ളം കയറിയതോടെ അയൽക്കാർ എല്ലാം ക്യാമ്പിലേക്ക് മാറിയെങ്കിലും നായ്‍ക്കള്‍ ഉള്ളതിനാല്‍ വീട്ടില്‍ തന്നെ തുടരുകയാണ് ഇവര്‍. 

 കുട്ടനാട്ടിൽ വീണ്ടും മടവീഴ്ച. കൈനകരി പഞ്ചായത്തിലെ ആറുപങ്ക് പാടശേഖരത്തിലാണ് മടവീണത്.