നിർണായക ഉത്തരവുമായി ഹൈക്കോടതി; നിയമപരിരക്ഷയില്ല, സുരക്ഷയില്ല, വാക്വം ലിഫ്റ്റുകളുടെ പ്രവര്ത്തനം തടയണമെന്ന് വിധി
Synopsis
സുരക്ഷിതത്വവും സാങ്കേതിക അനുമതികളുമില്ലാതെ പ്രവര്ത്തിക്കുന്ന അനധികൃത വാക്വം ലിഫ്റ്റുകളുടെ പ്രവര്ത്തനം തടയണമെന്ന് ഹൈക്കോടതി ഉത്തരവ്. കേരള എലിവേറ്റര് മാനുഫാക്ചറേഴ്സ് അസോസിയേഷന് നല്കിയ ഹര്ജിയിലാണ് വിധി. ഈ ലിഫ്റ്റുകള്ക്ക് നിയമപരമായ പരിരക്ഷയോ ഇന്ഷുറന്സ് പരിരക്ഷയോ ഇല്ലെന്നും ഇത് ജനങ്ങളുടെ ജീവന് ഭീഷണിയാണെന്നും ഹര്ജിയില് പറയുന്നു.
കൊച്ചി: സുരക്ഷിതത്വവും സാങ്കേതിക അനുമതിയുമില്ലാതെ പ്രവര്ത്തിക്കുന്ന അനധികൃത വാക്വം ലിഫ്റ്റുകളുടെ പ്രവര്ത്തനം തടയണമെന്ന് ഹൈക്കോടതി. ജനങ്ങളെ തെറ്റിദ്ധരിപ്പിച്ച് സുരക്ഷിതമല്ലാത്ത വാക്വം ലിഫ്റ്റുകള് പ്രവര്ത്തിക്കുന്നതിനേതിരെ കേരള എലിവേറ്റര് മാനുഫാക്ചറേഴ്സ് അസോസിയേഷന് നല്കിയ ഹര്ജിയിലാണ് ജസ്റ്റിസ് ബെച്ചു കുര്യന് തോമസിന്റെ വിധി. ഇത്തരം ലിഫ്റ്റുകളുടെ പ്രവര്ത്തനം സംബന്ധിച്ച് പരിശോധിച്ച് നടപടി സ്വീകരിക്കാന് ഇലക്ട്രിക്കല് ഇന്സ്പെക്ടറേറ്റിന് 2024ല് ഹൈക്കോടതി നല്കിയ നിര്ദ്ദേശം നടപ്പാക്കാത്തതിനേതുടര്ന്ന് നല്കിയ ഹര്ജിയിലാണ് വിധി.
സാങ്കേതികമായി രാജ്യത്ത് നിലവിലുള്ള നിയമങ്ങള് അനുസരിച്ചല്ല ഇത്തരം ലിഫ്റ്റുകളുടെ പ്രവര്ത്തനമെന്ന് കേരളാ എലിവേറ്റേര് മാനുഫാക്ചറേഴ്സ് അസോസിയേഷന് (കീമ) ഭാരവാഹികള് പ്രതികരിച്ചു. സാധാരണ ലിഫ്റ്റുകളെ പോലെ അടിയന്തര സാഹചര്യങ്ങളെ നേരിടാനുള്ള അനുബന്ധ സംവിധാനങ്ങളില്ല. പിറ്റിന്റെ ആഴം, ഓവര്ഹൈഡ് ഉയരം, ലാന്ഡിംഗ് തുടങ്ങിയവ സംബന്ധിച്ച മാനദണ്ഡങ്ങളും വാക്വം ലിഫ്റ്റുകള് പാലിക്കുന്നില്ല. ലിഫ്റ്റുകള്ക്ക് രാജ്യത്ത് പ്രവര്ത്തനാനുമതി നല്കുന്ന ബ്യൂറോ ഓഫ് ഇന്ത്യന് സ്റ്റാന്ഡേര്ഡിന്റെയോ ഇലക്ട്രിക്കല് ഇന്സ്പടറേറ്റിന്റെയോ യാതൊരു അനുമതിയുമില്ലാതെയാണ് ഇവ പ്രവര്ത്തിക്കുന്നതെന്നും കീമ ഭാരവാഹികള് ചൂണ്ടിക്കാട്ടി.
സമൂഹ മാധ്യമങ്ങളിലൂടെ ഗുണഭോക്താക്കളെ തെറ്റിദ്ധരിപ്പിച്ചുകൊണ്ടാണ് അനധികൃത ഇടപാട് നടത്തുന്നത്. സാങ്കേതിക തകരാറു മൂലം പല തവണ അപകടങ്ങള് നടന്നിട്ടുണ്ടെങ്കിലും നിയമപരമായ യാതൊരു പരിരക്ഷയും ലഭിക്കാത്തതുകൊണ്ട് മൂടിവയ്ക്കപ്പെടുകയാണ്. ചെന്നൈ ആസ്ഥാനമായി പ്രവര്ത്തിക്കുന്ന ഒരേ ഒരു കമ്പനിയാണ് നിര്മാണവും വില്പ്പനയും നടത്തുന്നത്. കോടതിയെയും നിയമസംവിധാനങ്ങളെയും വെല്ലുവിളിച്ചുകൊണ്ട് കൊച്ചിയില് ഇവരുടെ ഓഫീസ് പ്രവര്ത്തിക്കുന്നുണ്ടെന്നും കീമ ഭാരവാഹികള് പറഞ്ഞു. രാജ്യത്ത് നിലവിലുള്ള നിയമപ്രകാരം, ലിഫ്റ്റുകളില് യാത്ര ചെയ്യുന്നവര്ക്ക് ഇന്ഷുറന്സ് പരിരക്ഷ ഉറപ്പാക്കണമെന്നുണ്ട്. ഒന്നര മീറ്ററിലേറെ ഉയരത്തിലേയ്ക്ക് ആളുകളെ വഹിച്ചു കൊണ്ടുപോകുന്ന എല്ലാ ഉപകരണങ്ങള്ക്കും ലൈസന്സും ആവശ്യമാണ്. എന്നാല് ഇത്തരം അനുമതികള് ഇല്ലാത്തതിനാല് വാക്വം ലിഫ്റ്റുകള്ക്ക് ഇന്ഷുറന്സ് സാധാരണയായി ഇന്ഷുറന്സ് സംരക്ഷണവും ഉണ്ടാകാറില്ല. അതുകൊണ്ടു തന്നെ ഇത്തരം അനധികൃത ലിഫ്റ്റുകളില് ഉണ്ടാകുന്ന അപായങ്ങള്ക്ക് യാതൊരു പരിരക്ഷയും ലഭിക്കില്ല. ജനങ്ങളുടെ ജീവനുതന്നെ ഭീഷണിയായ ഇത്തരം അനധികൃത ലിഫ്റ്റുകളുടെ പ്രവര്ത്തനം നിര്ത്തലാക്കാന് ഇലക്ട്രിക്കല് ഇന്സ്പെക്ടറേറ്റ് നടപടി സ്വീകരിക്കണമെന്നും കീമ ഭാരവാഹികള് ആവശ്യപ്പെട്ടു.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam