ബന്ധുവിനൊപ്പം കുളിക്കാനിറങ്ങി, കുളത്തിലെ ഗുഹയില് കുടുങ്ങിയ പത്താം ക്ലാസ് വിദ്യാര്ത്ഥിക്ക് ദാരുണാന്ത്യം
Synopsis
വീടിനടുത്തുള്ള കുളത്തില് കുളിക്കുന്നതിനിടെ പത്താം ക്ലാസ് വിദ്യാര്ത്ഥി മുങ്ങിമരിച്ചു
മലപ്പുറം: വീടിനടുത്തുള്ള കുളത്തില് കുളിക്കുന്നതിനിടെ പത്താം ക്ലാസ് വിദ്യാര്ത്ഥി മുങ്ങിമരിച്ചു. തിരൂര് തൃപ്പങ്ങോട് പൊയിലിശ്ശേരി സ്വദേശി നസീം-റൗളാബി ദമ്പതികളുടെ മകന് നിബിന് ഷാന് (15) ആണ് ദാരുണമായി മരണപ്പെട്ടത്. വീട്ടില് നിന്ന് ബന്ധുവിന്റെ മകനോടൊപ്പം പൊയിലിശ്ശേരി പള്ളിക്ക് സമീപമുള്ള കുളത്തിലേക്ക് കുളിക്കാന് പോയതായിരുന്നു നിബിന്. വൈകുന്നേരമായിട്ടും കുട്ടിയെ കാണാത്തതിനെ തുടര്ന്ന് ബന്ധുക്കളും നാട്ടുകാരും നടത്തിയ തിരച്ചിലിലാണ് കുളത്തില് നിന്ന് മൃതദേഹം കണ്ടെത്തിയത്.
കുളത്തിനകത്തെ ഗുഹയില് കുടുങ്ങിപ്പോയ നിലയിലായിരുന്നു. ഉടനെ ആലത്തിയൂരിലെ സ്വകാര്യ ആശുപത്രിയില് എത്തിച്ചെങ്കിലും രക്ഷിക്കാനായില്ല. തിരൂര് ബോയ്സ് ഹയര് സെക്കന്ഡറി സ്കൂളിലെ പത്താം ക്ലാസ് വിദ്യാര്ത്ഥിയാണ്. മൃതദേഹം തിരൂര് ജില്ലാ ആശുപത്രിയിലെ പോസ്റ്റ്മോര്ട്ടം നടപടികള്ക്ക് ശേഷം ഇന്ന് തിരൂര് ആലത്തിയൂര് ജുമാമസ്ജിദ് ഖബര്സ്ഥാനില് ഖബറടക്കി. സഹോദരങ്ങള്: മുഹമ്മദ് അദ്നാന്, മുഹമ്മദ് അര്ഷാന്, ആയിശ ആലിയ.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam