മാഹിയിലെ കൊവിഡ് രോഗി ട്രെയിനിലും ഓട്ടോയിലും സ‍ഞ്ചരിച്ചു; വിശദമായ റൂട്ട് മാപ്പ് പ്രസിദ്ധീകരിച്ചു

ഇവര്‍ ഓട്ടോയിലും ട്രെയിനിലും സഞ്ചരിച്ചതായി സ്ഥിരീകരിച്ചിട്ടുണ്ട്. ഈ സ്ഥലങ്ങളിൽ ഈ തിയ്യതികളിൽ പ്രസ്‍തുത സമയത്ത് ഉണ്ടായിരുന്നവർ കൺട്രോൾ റൂമുമായി ബന്ധപ്പെടണം. 

കോഴിക്കോട്: മാഹിയിലെ കൊവിഡ് രോഗിയുടെ റൂട്ട് മാപ്പ് പ്രസിദ്ധീകരിച്ചു. രോഗി ട്രെയിനിലും ഓട്ടോയിലും സ‍ഞ്ചരിച്ചിട്ടുണ്ട്. രോഗിയുമായി ഇടപഴകിയവരെ കണ്ടെത്താനുള്ള ശ്രമത്തിലാണ് അധികൃതര്‍. ഇക്കഴിഞ്ഞ വെള്ളിയാഴ്‍ച രാവിലെയാണ് മാഹി സ്വദേശി അടക്കമുള്ള 28 അംഗ സംഘം ഉംറ കഴിഞ്ഞ് കോഴിക്കോട് വിമാനമിറങ്ങിയത്. ഇവര്‍ ഓട്ടോയിലും ട്രെയിനിലും സഞ്ചരിച്ചതായി സ്ഥിരീകരിച്ചിട്ടുണ്ട്. ഈ സ്ഥലങ്ങളിൽ ഈ തിയ്യതികളിൽ പ്രസ്‍തുത സമയത്ത് ഉണ്ടായിരുന്നവർ കൺട്രോൾ റൂമുമായി ബന്ധപ്പെടണം. 

രോഗി എത്തിയ കോഴിക്കോട് ബീച്ചില്‍ സന്ദര്‍ശകരെ വിലക്കിയിരിക്കുകയാണ്.  ഇനിയൊരു അറിയിപ്പുണ്ടാകുന്നത് വരെ ഇത് തുടരുമെന്ന് സൂപ്രണ്ട് ഉമ്മർ ഫാറൂഖ് അറിയിച്ചിട്ടുണ്ട്. അതേസമയം മാഹി സ്വദേശിയായ 68കാരി കോഴിക്കോട് ബീച്ച് ആശുപത്രിയില്‍ നിന്നും മടങ്ങിപ്പോയ സംഭവത്തില്‍ ആരോഗ്യവകുപ്പ് അന്വേഷണം തുടങ്ങി. സംഭവത്തില്‍ ബീച്ച് ആശുപത്രി അധികൃതരുടെ ഭാഗത്ത് വീഴ്ചയുണ്ടെന്നാണ് പ്രാഥമിക നിഗമനം. മാഹിയില്‍ നിന്ന് ആംബുലന്‍സില്‍ എത്തിയ ഇവരെ അഡ്മിറ്റ് ചെയ്തെങ്കിലും ഇവര്‍ സ്വമേധയാ മടങ്ങുകയായിരുന്നു.