വാർത്താകോളങ്ങളിൽ ഇവ മധുരവും കയ്പും നിറഞ്ഞ വിഭവങ്ങളായി

സംഭവബഹുലമായിട്ടാണ്​ 2017 വിടവാങ്ങുന്നത്​. ഇന്ത്യയെ സംബന്ധിച്ചിടത്തോളം പിൻവാങ്ങുന്ന വർഷം വ്യക്​തികൾക്കു മാത്രമല്ല സംഭവബഹുലമായത്​. നമ്മുടെ തനത്​ ഭക്ഷണങ്ങളിൽ ചിലത്​ വാർത്താകോളങ്ങളിൽ നിറഞ്ഞുനിന്ന വർഷം കൂടിയാണ്​ കടന്നുപോകുന്നത്​.

നമ്മുടെ അടുക്കളകളിൽ നിന്ന്​ പ്രയാണം ആരംഭിച്ച ആ രുചിക്കൂട്ടുകൾ നല്ലതോ മോശപ്പെട്ടതോ ആയകാരണങ്ങളാൽ ദേശീയ, അന്തർദേശീയ ശ്രദ്ധനേടുകയും ചെയ്​തു.  അത്തരത്തിൽ ശ്രദ്ധ നേടിയ അഞ്ച്​ വിഭവങ്ങളെ പരിചയപ്പെടാം: 

ഇന്ത്യക്കാർക്ക്​ മലയാളികൾക്ക്​ കിച്ചടി ഇഷ്​ട വിഭവം ആണ്​. കിച്ചടി പാചകത്തിലൂടെ ഇൗ വർഷം ഇന്ത്യക്കാരനായ പാചക വിദഗ്​ദൻ പുതിയ റൊക്കോർഡിട്ടു. സെലിബ്രിറ്റി ഷെഫ്​ ആയ സഞ്​ജീവ്​ കപൂർ 50 വളണ്ടിയർമാരുടെ സഹായത്തിൽ 918 കിലോ കിച്ചടിയാണ്​ ഒന്നിച്ച്​ പാചകം ചെയ്​തത്​. പരമ്പരാഗത രീതിയിലുള്ള ചട്ടി ഒരുക്കിയാണ്​ റൊക്കോർഡ്​ കിച്ചടി പാചകം ചെയ്തത്​. വേൾഡ്​ ഫുഡ്​ ഇന്ത്യ 2017ൽ ജനക്കൂട്ടത്തിന്​ മുന്നിൽവെച്ചായിരുന്നു തൽസമയപാചകം.  ആയിരം ലിറ്റർ ശേഷിയും ഏഴ്​ അടി വ്യാസവുമുള്ള ചട്ടിയിലായിരുന്നു പാചകം. മൂന്ന്​ മാസത്തെ ആസൂത്രണത്തിന്​ ശേഷമായിരുന്നു ഇത്​ നടത്തിയത്​. കിച്ചടി ദേശീയ വിഭവം ആക്കണമെന്ന ആവശ്യവും ഇൗ ഘട്ടത്തിൽ ഉയർത്തി. 

രസഗുള ആരുടെ വിഭവം എന്ന തർക്കത്തിലായിരുന്നു പശ്​ചിമ ബംഗാളും ഒറീസയും. രണ്ട്​ സംസ്​ഥാനങ്ങളും ഇൗ വിഭവം തങ്ങളുടെ സംസ്​കാരത്തിന്‍റെ ഭാഗമാണെന്ന നിലപാടിൽ ആയിരുന്നു. രസഗുളക്ക്​ ബംഗാളിന്​ ജി.​ഐ ടാഗ്​ ലഭിച്ചുവെന്ന്​ നവംബർ 13ന്​ ബംഗാൾ മുഖ്യമന്ത്രി മമതാ ബാനർജി ട്വീറ്റ്​ ചെയ്​തതോടെ വിവാദം കൊഴുത്തു. എന്നാൽ ബംഗാൾ രസഗുളക്കായിരുന്നു ജി.​െഎ ടാഗെന്നും മൊത്തം രസഗുളക്കല്ലെന്നും പിന്നീട്​ വ്യക്​തമായി. ഒഡീഷയാക​ട്ടെ അവരുടെ രസഗുളക്ക്​ ജി.​ഐ ടാഗിനായി ശ്രമവും തുടങ്ങി. ഇതിന്​ ജഗന്നാഥ്​ രസഗുള എന്ന പേരും നൽകി. 

ഇന്ത്യൻ വിഭവങ്ങളായ ‘ചന’യും ചന ദാലും ഒാക്​സ്​ഫോഡ്​ ഇംഗ്ലീഷ്​ ഡിക്ഷണറിയിൽ ഇടംപിടിച്ചതും 2017ൽ ആയിരുന്നു. വെള്ളക്കടല എന്നറിയപ്പെടുന്ന ചനയും അതി​ന്‍റെ പരിപ്പായ ചന ദാലും ഒാക്​സ്​ഫോഡ്​ ഡിക്ഷണറിയിൽ പുതിയ 600 വാക്കുകൾക്കൊപ്പം ഇടംപിടിക്കുകയായിരുന്നു.  

അമേരിക്ക ആസ്​ഥാനമായി പ്രവർത്തിക്കുന്ന പ്രമുഖ ഷെഫ്​ ഗോർഡോൺ റാംസെ മേദുവടക്കെതിരെ നടത്തിയ പരാമർശം സാമൂഹിക മാധ്യമങ്ങളിൽ വൻ അലയൊലികൾ ഉയർത്തി. കഴിഞ്ഞ ഏപ്രിലിൽ ഇദ്ദേഹം മേദു വട ജയിൽ വാസികളുടെ ഭക്ഷണമാണെന്ന്​ നടത്തിയ പരാമർശമാണ്​ വിവാദമായത്​. അദ്ദേഹത്തി​ന്‍റെ ആരാധകർ പോലും സാമൂഹിക മാധ്യമങ്ങളിൽ ​ട്രോളാൻ കാരണമായി. മേദു വട ആരാധകരിൽ നിന്ന്​ വൻ ​പ്രതികരണമാണ്​ നിരുത്തരവാദിത്ത പരാമർശത്തിനെതിരെ ഉയർന്നത്​. 

സമൂസ ഇഷ്​ടപ്പെടാത്തവർ കുറവായിരിക്കും. എന്നാൽ ഇത്തവണ വലിപ്പത്തിൽ ഭീമനായ സമൂസയൊരുക്കിയാണ്​ ചിലർ വാർത്തകളിൽ ഇടംപിടിച്ചത്​. കിഴക്കൻ ലണ്ടനിലെ പള്ളിയിലെ  ഒരു സംഘം ആളുകൾ ചേർന്ന്​ ഒരുക്കിയ 153 കിലോ സമൂസ റൊക്കോർഡ്​ ഭേദിക്കുന്നതായിരുന്നു.