ഇറച്ചിയോട് അകലം പാലിക്കൂ; കാൻസറി​ന്‍റെ വഴിതടയൂ

സംസ്​ക്കരിച്ച ഭക്ഷണ ഇനങ്ങളും മാംസവും കാൻസറിനുള്ള സാധ്യത പതിൻമടങ്ങ്​ വർധിപ്പിക്കുന്നുവെന്ന്​ ഇതിനകം ഗവേഷണങ്ങളിൽ നിസംശയം തെളിഞ്ഞതാണ്​. എന്നിട്ടും ഇത്തരം വിഭവങ്ങൾ ഇപ്പോഴും നമ്മുടെ തീൻ മേശയിലെ പ്രധാന ഇനങ്ങളായി നിലനിൽക്കുകയും ചെയ്യുന്നു. ഭക്ഷണ ക്രമത്തിൽ അടിമുടി മാറ്റം വരുത്തിയില്ലെങ്കിൽ മാരക രോഗം നിങ്ങളെ തേടിയെത്തുമെന്നതിൽ സംശയമില്ല.

മാർക്കറ്റിൽ പോയി വിവിധ മാംസങ്ങൾ വാങ്ങു​മ്പോള്‍ ഇവ ആരോഗ്യത്തെ എങ്ങനെ ബാധിക്കുന്നുവെന്ന്​ ചിന്തിക്കാൻ ആരും മുതിരാറില്ല. വാങ്ങുന്ന മാംസം ഭക്ഷ്യയോഗ്യമാണെന്ന്​ ഉറപ്പുവരുത്താൻ എത്ര പേർ ശ്രദ്ധിക്കാറുണ്ട്​. റെഡ്​ മീറ്റ്​ ഇനത്തിൽപെടുന്ന മാംസം ആണ്​ ഭക്ഷണങ്ങളുടെ കൂട്ടത്തിൽ നമ്മുടെ ആരോഗ്യത്തി​ന്‍റെ പ്രധാന ശത്രു.

ബ്രിട്ടനിലെ കാൻസർ റിസർച്ച്​ സെന്‍ററിലെ വിദഗ്​ദർ കൃത്യമായ മുന്നറിയിപ്പാണ്​ ഇതിൽ നൽകുന്നത്​. മാംസമാക്കുന്ന മൃഗങ്ങൾക്കുണ്ടാകുന്ന രോഗങ്ങൾ അത്​ ഭക്ഷിക്കുന്ന മനുഷ്യനെയും പ്രതികൂലമായി ബാധിക്കുന്നു. ട്യൂമർ പോലുള്ള ഗുരുതര രോഗങ്ങളുള്ള മൃഗങ്ങളെ ഇറച്ചിക്കായി ഉപയോഗിക്കുന്നത്​ ഭക്ഷിക്കുന്നവർക്ക്​ വൻ അപകടം വരുത്തുന്നതാണ്​. കശാപ്പിന്​ മുമ്പ്​ മൃഗങ്ങളുടെ ആരോഗ്യ സ്​ഥിതി പരിശോധിക്കാൻ നമ്മുടെ നാട്ടിൽ സംവിധാനങ്ങൾ ഇല്ലെന്നതും ഭീഷണിയാണ്​.

മലാശയ അർബുദം ആണ്​ ഇതുവഴി പ്രധാനമായും ബാധിക്കാൻ സാധ്യത. ഉപ്പിട്ടുണക്കിയ പോലുള്ള സംസ്​ക്കരിച്ച മാംസ വിഭവങ്ങളും വൻ ആരോഗ്യ ഭീഷണി ഉയർത്തുന്നവയാണ്​. അന്താരാഷ്​ട്ര കാൻസർ റിസർച്ച്​ ഏജൻസിയും ഇത്​ ശരിവെക്കുന്നു. സൂപ്പർമാർക്കറ്റുകളിൽ നിന്ന്​ തെരഞ്ഞെടുക്കുന്ന മാംസാഹരങ്ങളുടെ പായ്​ക്കറ്റുകൾ നന്നായി പരിശോധിച്ച​ശേഷം മാ​ത്രമേ എടുക്കാവൂ. ഇവയുടെ ഗുണനിലവാരം, സംസ്​ക്കരണം, പായ്​ക്കിങ്​ എന്നിവ പരിശോധിക്കണം. ഭക്ഷ്യസുരക്ഷയുടെ കാര്യത്തിൽ ഇ​പ്പോഴും നമ്മൾ പിന്നിലായതിനാൽ അപകടം വരുത്തുന്ന ഇത്തരം റെഡ്​മീറ്റുകളോട്​ അകലം പാലിക്കുന്നത്​ തന്നെയാണ്​ അത്യുത്തമം.