ജലദോഷം തടയാൻ ഇവയുണ്ടെങ്കിൽ ആന്‍റി ബയോട്ടിക്കുകൾ വേണ്ട

ജലദോഷം പലപ്പോഴും അസഹ്യവും അലോസരപ്പെടുത്തുന്നതുമാകാറുണ്ട്​. കാലാവസ്​ഥാ മാറ്റമോ പനിയോ ജലദോഷത്തിന്​ കാരണമാകാം. മറ്റ്​ കാരണങ്ങളാലും ജലദോഷമുണ്ടാകാം. അമിതമായ തുമ്മൽ, ചുമ, തൊണ്ടയിലുണ്ടാകുന്ന അസ്വസ്​ഥതകൾ, നേരിയ തലവേദന ഉൾപ്പെടെയുള്ളവയാണ്​ ഇതി​ന്‍റെ ലക്ഷണങ്ങൾ. ഇതിനെ മറികടക്കാൻ ഉയർന്ന അളവിലുള്ള ആൻറിബയോട്ടിക്കുകളെ ആശ്രയിക്കുകയാണ്​ പലരും.

എന്നാൽ  ജല​ദോഷത്തെ നിയന്ത്രിക്കാൻ സ്വാഭാവികമായ വഴികളുണ്ട്​. അഞ്ച്​ ഭക്ഷണ പദാർഥങ്ങൾ ഇതിന്​ നിങ്ങളെ സഹായിക്കും. 

ആന്‍റി ഇൻഫ്ലമേറ്ററി ഘടകങ്ങൾ അടങ്ങിയ ഫ്ലവനോയിഡ്​ ധാരാളമായി ഗ്രീൻ ടീയിൽ അടങ്ങിയിട്ടുണ്ട്​. ഇത്​ മികച്ച രോഗപ്രതിരോധ ശേഷിക്കും അതുവഴി മികച്ച ശാരീരിക അവസ്​ഥക്കും സഹായകം. ജലദോഷത്തിന്​ കാര്യമായ മാറ്റമുണ്ടാക്കാൻ ഗ്രീൻ ടീക്ക്​ സാധിക്കും.

വിറ്റാമിൻ സി കൂടുതലായുള്ള ഭക്ഷണം കഴിക്കുന്നത്​ നിങ്ങളുടെ പ്രതിരോധ ശേഷിയെ ഉയർത്തും. പപ്പായ, ഒാറഞ്ച്​, സ്​ട്രോബറി, മത്തങ്ങ തുടങ്ങിയവ വിറ്റാമിൻ സിയുടെ സാന്നിധ്യം കൂടുതലുള്ളവയാണ്​. 

ബാക്​ടീരിയയെ തടയാൻ കഴിവുള്ള തേൻ ഒട്ടേറെ രോഗങ്ങൾക്ക്​ പ്രതിരോധവും തീർക്കുന്നു. തിളപ്പിച്ചാറിയ പാലിലോ ഇളം ചൂടുള്ള വെള്ളത്തിലോ  തേൻ ചേർത്തു കഴിക്കുന്നത്​ ജലദോഷത്തിൽ നിന്ന്​ ആശ്വാസം നൽകാൻ സഹായിക്കും.  

ആന്‍റി ഒാക്​സിഡന്‍റ്​ ഘടകങ്ങൾ ധാരാളമായുള്ള ബ്ലൂബെറി പഴങ്ങൾ കഴിക്കുന്നത്​ രോഗപ്രതിരോധ ശേഷി ഉയർത്തും. പ്രഭാത ഭക്ഷണത്തി​നൊപ്പമോ തനിച്ചോ ഇവ കഴിക്കാം. 

വെളുത്തുള്ളിയിലും സവാളയിലുമുള്ള ആൻറിബാക്​ടീരിയൽ ഘടകങ്ങൾ പനിയുടെ ലക്ഷണങ്ങളെ പ്രതിരോധിക്കാൻ ശേഷിയുള്ളവയാണ്​. ആരോഗ്യദായകമായ സൂപ്പ്​ രീതിയിൽ ഇവ കഴിക്കാം.