മിക്സി വൃത്തിയാക്കാം എളുപ്പത്തിൽ; ഇത്രയും ചെയ്താൽ മതി 

അടുക്കളയിൽ ഒഴിവാക്കാൻ സാധിക്കാത്ത ഒന്നാണ് മിക്സി. എന്തുവേണമെങ്കിലും മിക്സി ഉപയോഗിച്ച് പൊടിക്കാനും അരക്കാനുമൊക്കെ സാധിക്കും. മിക്സിയിൽ കൂർത്ത ബ്ലെയിഡുകൾ ഉള്ളതുകൊണ്ട് തന്നെ ഭക്ഷണ സാധനങ്ങൾ അതിൽ പറ്റിയിരിക്കാനും സാധ്യത വളരെ കൂടുതലാണ്

അടുക്കള ഉപകരണങ്ങൾ നിർമ്മിച്ചിരിക്കുന്നത് വീട്ടിലെ പണികൾ എളുപ്പമാക്കാനാണ്. അതിനാൽ തന്നെ ഇന്ന് എന്തും എളുപ്പത്തിൽ പാകം ചെയ്യാനും സാധിക്കും. അത്തരത്തിൽ അടുക്കളയിൽ ഒഴിവാക്കാൻ സാധിക്കാത്ത ഒന്നാണ് മിക്സി. എന്തുവേണമെങ്കിലും മിക്സി ഉപയോഗിച്ച് പൊടിക്കാനും അരക്കാനുമൊക്കെ സാധിക്കും. മിക്സിയിൽ കൂർത്ത ബ്ലെയിഡുകൾ ഉള്ളതുകൊണ്ട് തന്നെ ഭക്ഷണ സാധനങ്ങൾ അതിൽ പറ്റിയിരിക്കാനും സാധ്യത വളരെ കൂടുതലാണ്. ഇത് പിന്നീട് കറയായി മാറുകയും ചെയ്യും. മിക്സി വൃത്തിയാക്കാൻ ഇതാ ചില പൊടിക്കൈകൾ. 

ലിക്വിഡ് വാഷ് 

എളുപ്പത്തിൽ മിക്സി വൃത്തിയാക്കാൻ ലിക്വിഡ് വാഷ് മതി. അതിനുവേണ്ടി ഇത്രയേ നിങ്ങൾ ചെയ്യേണ്ടതുള്ളൂ. സോപ്പ് പൊടി മിക്സിയിലേക്ക് ഇട്ടതിന് ശേഷം കുറച്ച് വെള്ളംകൂടെ ഒഴിച്ചുകൊടുക്കാം. ശേഷം മിക്സി നന്നായി കഴുകാം. ഏത് കറയും പമ്പകടക്കും.

ബേക്കിംഗ് സോഡ 

എന്തും നന്നായി വൃത്തിയാക്കാൻ സഹായിക്കുന്ന ഒന്നാണ് ബേക്കിംഗ് സോഡ. മിക്സിയിലേക്ക് ഒരേ അളവിൽ ബേക്കിംഗ് സോഡയും വെള്ളവും ചേർത്തതിന് ശേഷം കുറച്ച് നേരം മിക്സി കുലുക്കി കഴുകണം. എന്നിട്ടും കറകൾ പോയില്ലെങ്കിൽ തുണി ഉപയോഗിച്ചോ ചൂടുവെള്ളം ഉപയോഗിച്ചോ വൃത്തിയാക്കാവുന്നതാണ്.

വിനാഗിരി 

വിനാഗിരിയിൽ വലിയ അളവിലുള്ള ആസിഡ് പ്രോപ്പർട്ടി അടങ്ങിയിട്ടുണ്ട്. രണ്ട് ടേബിൾ സ്പൂൺ വിനാഗിരിയും ഒരു കപ്പ് വെള്ളവും ചേർത്ത് മിക്സിയിലേക്ക് ഇട്ടുകൊടുക്കാം. കുറച്ച് നേരം അങ്ങനെ വെച്ചതിന് ശേഷം കഴുകിയെടുക്കാവുന്നതാണ്. 

നാരങ്ങ തോട് 

നാരങ്ങയിൽ അടങ്ങിയിട്ടുള്ള സിട്രിക് ആസിഡ് കറകളെ എളുപ്പത്തിൽ നീക്കം ചെയ്യുന്നു. മുറിച്ച നാരങ്ങയുടെ തോട് എടുത്തതിന് ശേഷം അത് ഉപയോഗിച്ച് മിക്സി ഉരച്ച് വൃത്തിയാക്കാവുന്നതാണ്. 20 മിനിറ്റ് അങ്ങനെ തന്നെ വെച്ചതിന് ശേഷം ചൂടുവെള്ളത്തിൽ മിക്സി കഴുകിയെടുക്കാം. ഇത് കറയെ മാത്രമല്ല ദുർഗന്ധത്തേയും വലിച്ചെടുക്കുന്നു.