തൊഴിലെടുക്കാൻ മടിയുള്ള അഹങ്കാരികളല്ല, ജെൻ സി ക്ഷീണിതർ മാത്രം - അറിയണം ഇക്കാര്യങ്ങൾ

ജെൻ സി തലമുറയിലെ ജീവനക്കാർ തൊഴിലിടങ്ങളിൽ അധിക ജോലി ചെയ്യാൻ വിസമ്മതിക്കുന്നതും അതിർവരമ്പുകൾ നിശ്ചയിക്കുന്നതും 'അഹങ്കാരം' കൊണ്ടല്ല, മറിച്ച് കടുത്ത മാനസിക സമ്മർദ്ദവും ക്ഷീണവും കൊണ്ട്…

"പഴയ തലമുറയ്ക്ക് ഇല്ലാത്ത എന്താണ് ഈ ജെൻ സി-ക്ക് ഉള്ളത്?" തൊഴിലിടങ്ങളിൽ ജെൻ സി ജീവനക്കാർ അധിക ജോലി ചെയ്യാൻ വിസമ്മതിക്കുമ്പോഴും, ജോലിക്ക് കൃത്യമായ അതിർവരമ്പുകൾ നിശ്ചയിക്കുമ്പോഴും ഉയരുന്ന ഒരു സ്ഥിരം ചോദ്യമാണിത്. എന്നാൽ, ഇവരെ മടിയന്മാരായി മുദ്രകുത്തുന്നതിന് മുൻപ്, ഈ യുവതലമുറ നേരിടുന്ന കടുത്ത മാനസിക സമ്മർദ്ദത്തിന്റെയും, ക്ഷീണത്തിന്റെയും യാഥാർത്ഥ്യങ്ങൾ സമൂഹം തിരിച്ചറിയേണ്ടതുണ്ടെന്ന് വിദഗ്ധർ മുന്നറിയിപ്പ് നൽകുന്നു.

അമിതാധ്വാനം ഹോബിയല്ല

മുൻ തലമുറയ്ക്ക്, ജോലി ജീവിതമായിരുന്നു. സ്ഥാനക്കയറ്റങ്ങൾക്കും ഉയർന്ന ശമ്പളത്തിനും വേണ്ടി വ്യക്തിപരമായ ജീവിതം ഹോമിക്കുന്നത് ഒരു സാധാരണ രീതിയായിരുന്നു. എന്നാൽ ജെൻ സികളെ സംബന്ധിച്ച്, വർക്ക് ലൈഫ് ബാലൻസ് എന്നത് ഒരു ഓപ്ഷനല്ല, മറിച്ച് അടിസ്ഥാന ആവശ്യമാണ്. അധികനേരം ജോലി ചെയുന്നതിന് അധിക പ്രതിഫലം ചോദിക്കുന്നതിനെയോ, വൈകുന്നേരം 5 മണിക്ക് ശേഷം ഓഫീസ് മെയിലുകൾ തുറക്കാതിരിക്കുന്നതിനെയോ അവർ അഹങ്കാരമായി കാണുന്നില്ല. അത് അവരുടെ അവകാശമായി കണക്കാക്കുന്നു. 'ക്വയറ്റ് ക്വിറ്റിംഗ്' പോലുള്ള പുതിയ തൊഴിൽ ശൈലികൾ ഉയർന്നുവരുന്നതിന്റെ പ്രധാന കാരണം, തുടർച്ചയായ സമ്മർദ്ദത്തിൽ നിന്നുള്ള മോചനം മാത്രമാണ്. തങ്ങളുടെ മാനസികാരോഗ്യത്തെയും വ്യക്തിപരമായ സമയത്തെയും സംരക്ഷിക്കാനുള്ള ഒരു അതിർവരമ്പാണിത്.

ക്ഷീണം വർദ്ധിപ്പിക്കുന്ന ഘടകങ്ങൾ:

ജെൻ സി-കൾ ക്ഷീണിതരാക്കുന്ന അവസ്ഥയ്ക്ക് പിന്നിൽ ശക്തമായ സാമൂഹിക, സാമ്പത്തിക കാരണങ്ങളുണ്ട്:

• സോഷ്യൽ മീഡിയയുടെ ലോകത്ത് ജീവിക്കുന്ന ആദ്യ തലമുറയാണിത്. 24 മണിക്കൂറും ഓൺലൈനിൽ പ്രദർശനത്തിന് വെക്കപ്പെടുന്ന ജീവിതം, നിരന്തരമായ താരതമ്യത്തിനും ഉത്കണ്ഠയ്ക്കും കാരണമാകുന്നു. ഇതിനിടയിൽ, ജോലിക്ക് വേണ്ടിയുള്ള 24/7 കണക്റ്റിവിറ്റി കൂടി വരുമ്പോൾ വിശ്രമം പൂർണ്ണമായും ഇല്ലാതാകുന്നു.
• മുൻ തലമുറയ്ക്ക് ലഭിച്ച സാമ്പത്തിക സ്ഥിരത ഇവർക്ക് ലഭിക്കുന്നില്ല. ഉയർന്ന വിദ്യാഭ്യാസമുള്ളവരായിട്ടും, കുതിച്ചുയരുന്ന ജീവിതച്ചെലവും ഭവനവായ്പകളും അവരെ വരിഞ്ഞുമുറുക്കുന്നു. അമിതാധ്വാനം ചെയ്തിട്ടും സാമ്പത്തിക സുരക്ഷിതത്വം ലഭിക്കാതെ വരുമ്പോൾ, ജോലിയിൽ മാത്രം മുഴുകേണ്ടതില്ലെന്ന തിരിച്ചറിവ് അവരിൽ ഉണ്ടാകുന്നു.
• മാനസികാരോഗ്യത്തെക്കുറിച്ച് തുറന്നു സംസാരിക്കാൻ ധൈര്യം കാണിക്കുന്ന തലമുറയാണ് ജെൻ സി. 'നല്ല ശമ്പളം കിട്ടിയാൽ മതി, ബാക്കിയെല്ലാം സഹിക്കാം' എന്ന പഴയ കാഴ്ചപ്പാടിന് പകരം, മാനസിക സന്തോഷമാണ് ഇവർക്ക് വലുത്.

മാറ്റം അനിവാര്യം

ജെൻ സികളുടെ ആവശ്യങ്ങളെ 'അഹങ്കാരം' എന്ന് ലേബൽ ചെയ്ത് തള്ളിക്കളയുന്നത് തൊഴിലിടങ്ങളിൽ കൂടുതൽ പ്രതിസന്ധികൾ ഉണ്ടാക്കും. ഈ യുവതലമുറയെ നിലനിർത്താനും അവരുടെ കഴിവുകൾ പരമാവധി പ്രയോജനപ്പെടുത്താനും തൊഴിലുടമകൾ തയ്യാറാകണം. കൂടുതൽ ഫ്ലെക്സിബിളായ തൊഴിൽ സമയം, പിന്തുണ തുടങ്ങിയ മാറ്റങ്ങൾ വരുത്തിയാൽ മാത്രമേ ആരോഗ്യകരമായ ഒരു തൊഴിൽ സംസ്കാരം കെട്ടിപ്പടുക്കാനും ഈ ക്ഷീണിതരായ തലമുറയെ പ്രചോദിപ്പിക്കാനും സാധിക്കുകയുള്ളൂ.