തിരുവനന്തപുരത്ത് സുഹൃത്തിനൊപ്പം ജംഗ്ഷനിൽ നിന്ന യുവാവിനെ കത്തിക്കാൻ ശ്രമം, 32കാരൻ അറസ്റ്റിൽ

സുഹൃത്തിനോടൊപ്പം പള്ളിത്തുറ ജംഗ്ഷനിൽ നിന്ന യുവാവിനെ യാതൊരു പ്രകോപനവും ഇല്ലാതെയാണ് 32കാരൻ കൊലപ്പെടുത്താൻ ശ്രമിച്ചത്. 

തിരുവനന്തപുരം: യുവാവിനെ പെട്രൊൾ ഒഴിച്ച് കത്തിക്കാൻ ശ്രമിച്ച കേസിലെ പ്രതി പിടിയിൽ. തുമ്പ സ്റ്റേഷനിലെ റൗഡി ലിസ്റ്റിൽപ്പെട്ട പള്ളിത്തുറ പുതുവൽ പുരയിടം വീട്ടിൽ ഡാനി റെച്ചൻസി(32)നെ ആണ് പൊലീസ് അറസ്റ്റ് ചെയ്തത്. സ്റ്റേഷൻകടവ് സ്വദേശിയായ ഷാജിയെ പള്ളിത്തുറ ജംഗ്ഷനിൽ വച്ച് തിങ്കളാഴ്ച വൈകുന്നേരം 6.40 ഓടെ പെട്രോൾ ഒഴിച്ച് കൊലപ്പെടുത്താനാണ് ഡാനി ശ്രമിച്ചത്. സുഹൃത്തിനോടൊപ്പം പള്ളിത്തുറ ജംഗ്ഷനിൽ നിന്ന ഷാജിയെ യാതൊരു പ്രകോപനവും ഇല്ലാതെയാണ് 32കാരൻ കൊലപ്പെടുത്താൻ ശ്രമിച്ചത്. 

കന്നാസിൽ കരുതിയിരുന്ന പെട്രോൾ മുഴുവൻ ഡാനി യുവാവിന്റെ ദേഹത്ത് ഒഴിക്കുകയായിരുന്നു. ഡാനിയുടെ കൈയ്യിലുണ്ടായിരുന്ന തീപ്പെട്ടി ഷാജിയുടെ സുഹൃത്ത് പിടിച്ച് വാങ്ങിയതിനാൽ വലിയ അപായം ഒഴിവാകുകയായിരുന്നു. സംഭവം ആള് മാറി ചെയ്തതെന്നാണ് ഡാനി പൊലീസിനോട് പറഞ്ഞത്. സംഭവത്തിന് പിന്നാലെ ഷാജി തുമ്പ പൊലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്ത തുമ്പ പൊലിസ് പ്രതിയെ അറസ്റ്റു ചെയ്യുകയായിരുന്നു. കോടതിയിൽ ഹാജരാക്കിയ പ്രതിയെ റിമാന്റ് ചെയ്തു. പ്രതിക്കെതിരെ കാപ്പ നിയമപ്രകാരം കേസെടുക്കാനുള്ള നടപടികൾ ആരംഭിച്ചതായാണ് തുമ്പ ഇൻസ്പെക്ടർ ആർ.ബിനു വിശദമാക്കുന്നത്.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം