ഒന്നല്ല,രണ്ടല്ല,പത്തല്ല,മുപ്പത്! 'ഞങ്ങൾ ഫാമിലിയായി ഒന്ന് കറങ്ങാനിറങ്ങിയതാ', മലമ്പുഴയിൽ കാട്ടാനക്കൂട്ടമിറങ്ങി

സ്കൂൾ കുട്ടികൾ ഉൾപ്പെടെ നൂറുകണക്കിന് സഞ്ചാരികൾ ഉദ്യാനത്തിനകത്തുള്ളപ്പോഴായിരുന്നു സംഭവം

പാലക്കാട്:പാലക്കാട് മലമ്പുഴ ഉദ്യാനത്തിൽ വീണ്ടും കാട്ടാനക്കൂട്ടമിറങ്ങി.​ഉദ്യാനത്തിലെ ​ഗവർണർ സീറ്റിന് സമീപത്താണ് വൈകിട്ടോടെ ആനയിറങ്ങിയത്.സ്കൂൾ കുട്ടികൾ ഉൾപ്പെടെ നൂറുകണക്കിന് സഞ്ചാരികൾ ഉദ്യാനത്തിനകത്തുള്ളപ്പോഴായിരുന്നു സംഭവം.കുട്ടിയാനകളടക്കം 30 ആനകൾ അടങ്ങുന്ന കൂട്ടമാണ് ഇറങ്ങിയത്.ഏറെ നേരം ഇവിടെ തമ്പടിച്ച ആന രാത്രി വൈകിയാണ് കാടുകയറിയത്. ജലസേചന വകുപ്പ് ജീവനക്കാരും വനം ഉദ്യോ​ഗസ്ഥരും ചേർന്നാണ് കാട്ടിലേക്ക് തുരത്തിയത്. ഒരാഴ്ചക്കിടെ ഇത് മൂന്നാം തവണയാണ് ​ഗവർണർ സീറ്റിന് താഴെയുള്ള മാം​ഗോ ​ഗാർഡനിൽ കാട്ടാനയെത്തുന്നത്. കവ, തെക്കേ മലമ്പുഴ മേഖലയിൽ ദിവസങ്ങളായി കാട്ടാന ശല്യം രൂക്ഷമാണ്. കഴിഞ്ഞ ദിവസം ആനകൾ ഈ ഭാ​ഗത്ത് അണക്കെട്ടിന് മുകളിൽ കയറിയിരുന്നു. ആനക്കൂട്ടം തമ്പടിച്ചതോടെ പ്രദേശവാസികളും ഭീതിയിലാണ്.