തലസ്ഥാനത്ത് നഗരത്തിലും പരിസരങ്ങളിലുമായി ഓട്ടോ ഓടിക്കും; സോക്സിനുള്ളിൽ നിന്ന് കിട്ടിയത് എംഡിഎംഎ, അറസ്റ്റ്

തിരുവനന്തപുരത്ത് ഓട്ടോ ഡ്രൈവർ ഉൾപ്പെടെ സംസ്ഥാനത്തിന്റെ വിവിധ ഭാഗങ്ങളിൽ നടന്ന ലഹരിവേട്ടയിൽ നിരവധി പേർ അറസ്റ്റിലായി. പ്രതികളെ പോലീസ് കസ്റ്റഡിയിലെടുത്ത് തുടർനടപടികൾ സ്വീകരിച്ചു.

തിരുവനന്തപുരം: എംഡിഎംഎയുമായി ഓട്ടോഡ്രൈവർ അറസ്റ്റിൽ. 27 ഗ്രാം എംഡിഎംഎയുമായി എറണാകുളം പള്ളുരുത്തി സ്വദേശി ഫൈസൽ ( 55) ആണ് അറസ്റ്റിലായത്. ഡാൻസാഫ് സംഘത്തിന് കിട്ടിയ രഹസ്യ വിവരത്തിന്‍റെ അടിസ്ഥാനത്തിൽ പാപ്പനംകോട് ഇൻഡസ്ട്രിയൽ എസ്റ്റേറ്റ് റോഡിൽ ഓട്ടോയിൽ പോകവേയാണ് ഇയാളെ പിടി കൂടിയത്.

സിറ്റിയിലും പരിസരത്തും ഓട്ടോ ഓടിച്ചിരുന്ന ഇയാൾ ധരിച്ചിരുന്ന സോക്സിനുള്ളിൽ ഒളിപ്പിച്ച നിലയിലായിരുന്നു എംഡിഎംഎ കണ്ടെത്തിയത്. ഇയാളുടെ ഓട്ടോയും പൊലീസ് കസ്റ്റഡിയിൽ എടുത്തു. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. അതേസമയം, തൃപ്രയാർ തളിക്കുളത്തെ ഫ്ലാറ്റിൽ വിൽപ്പനയ്ക്കായി സൂക്ഷിച്ചിരുന്ന 33.5ഗ്രാം എംഡിഎംഎയുമായി യുവാവും യുവതിയും അറസ്റ്റിലായിരുന്നു. എടത്തിരുത്തി സ്വദേശി കൊല്ലാറ വീട്ടിൽ അഖിൽ (31), പെരിഞ്ഞനം സ്വദേശി വലിയകത്ത് വീട്ടിൽ ഫസീല (33) എന്നിവരെയാണ് പിടികൂടിയത്. ഓപ്പറേഷൻ ഡി ഹണ്ടിന്റെ ഭാഗമായി തൃശ്ശൂർ റൂറൽ ജില്ലാ പൊലീസ് മേധാവിക്ക് ലഭിച്ച രഹസ്യ വിവരത്തെ തുടർന്ന് ഡാൻസാഫ് ടീം നടത്തിയ പരിശോധനയിലാണ് ഇരുവരും പിടിയിലായത്.

അഖിൽ കാട്ടൂർ, മതിലകം പൊലീസ് സ്റ്റേഷൻ പരിധികളിലായി രണ്ട് വധശ്രമക്കേസിലും മദ്യലഹരിയിൽ മനുഷ്യജീവന് അപകടം വരത്തക്ക വിധം വാഹനമോടിച്ച കേസിലും പ്രതിയാണ്. തൃശ്ശൂർ ജില്ലാ പൊലിസ് മേധാവി ബി.കൃഷ്ണകുമാറിന്റെ നേതൃത്വത്തിൽ കൊടുങ്ങല്ലൂർ ഡിവൈഎസ്പി വി.കെ. രാജു, വാടാനപ്പിള്ളി പോലീസ് സ്റ്റേഷൻ എസ്എച്ച്ഒ എൻ.ബി ഷൈജു, വലപ്പാട് എസ്ഐ സി.എൻ. എബിൻ, ജിഎസ്ഐ പി.യു.ഉണ്ണി, തൃശ്ശൂർ റൂറൽ ജില്ലാ ഡാൻസാഫ് അംഗങ്ങളായ എസ്ഐ സി.ആർ. പ്രദീപ് , എഎസ് ഐ ലിജു ഇയ്യാനീ, എസ് സിപിഒ സി.കെ.ബിജു, സിപിഒ സുർജിത് സാഗർ, വലപ്പാട് ജിഎസ് സിപിഒ അനൂപ്, സിപിഒ സിജി എന്നിവരാണ് അന്വേഷണ സംഘത്തിലുണ്ടായിരുന്നത്.

വാളയാർ ചെക്ക് പോസ്റ്റിലും ലഹരിവേട്ട

അതേസമയം വാളയാർ എക്സൈസ് ചെക്ക്‌പോസ്റ്റിൽ കഴിഞ്ഞ ദിവസം നടത്തിയ വാഹന പരിശോധനയിൽ കെഎസ്ആർടിസി ബസിലെ യാത്രക്കാരനിൽ നിന്നും 211.4 ഗ്രാം മെത്താംഫിറ്റമിൻ പിടിച്ചെടുത്തു. തൃശ്ശൂർ മണത്തല സ്വദേശി ഷമീർ.പി.എസ് എന്നയാളാണ് മയക്കുമരുന്നുമായി പിടിയിലായത്. എക്സൈസ് ഇൻസ്പെക്ടർ എൻ.പ്രേമാനന്ദകുമാറിന്റെ നേതൃത്വത്തിൽ നടത്തിയ പരിശോധനയിൽ അസിസ്റ്റന്റ് എക്സൈസ് ഇൻസ്പെക്ടർ(ഗ്രേഡ്) സി.വി.രാജേഷ് കുമാർ, ശ്രീജി. ബി.ജെ, പ്രിവന്റീവ് ഓഫീസർ(ഗ്രേഡ്) സജീഷ്. കെ.എം, സിവിൽ എക്സൈസ് ഓഫീസർമാരായ അശ്വന്ത്, സുബിൻ രാജ്.എസ് എന്നിവരും പങ്കെടുത്തു.