ഇവിടെ കൂമ്പിലല്ല, നടുവിലാണ് കുല; കൗതുകമായി ജോസഫിൻ്റെ ഏത്തവാഴ

ആലപ്പുഴയിൽ വാഴയുടെ നടുവിൽനിന്ന് കുല വന്നത് കൗതുകമായി. പുന്നപ്ര തെക്ക് സ്വദേശി പി പി ജോസഫിൻ്റെ കൃഷിയിടത്തിലെ വാഴ കൗതുകമായത്. വാഴയുടെ നടുവിൽ നിന്നാണ് കുല വന്നിരിക്കുന്നത്.

അമ്പലപ്പുഴ: പുന്നപ്ര തെക്ക് പഞ്ചായത്ത് രണ്ടാം വാർഡ് പുത്തൻപുരയ്ക്കൽ പി പി ജോസഫ് - മിനി ദമ്പതികൾ വീടിനു സമീപം നട്ടുവളർത്തിയ ഏത്തവാഴകളിൽ ഒന്നിൽ നടുവിൽനിന്ന് കുല വന്നത് കൗതുകമാകുന്നു. കഞ്ഞിപ്പാടത്തെ ഭാര്യയുടെ വീട്ടിൽനിന്ന് കൊണ്ടുവന്നു നട്ട വാഴയാണിത്. മറ്റു വാഴകൾ സാധാരണപോലെ കൂമ്പിൽനിന്ന് കുലച്ചപ്പോഴാണ് ഇതിൽ ഈ വ്യത്യസ്തത കണ്ടത്.

കെഎസ്ആർടിസി ആലപ്പുഴ ഡിപ്പോയിലെ കണ്ടക്ടറായ പി പി ജോസഫിന്റെ അവധി ദിവസങ്ങളിലെ പ്രധാന വിനോദം കൃഷിയാണ്. കപ്പ മുതൽ കാന്താരി വരെ ഇവരുടെ വീട്ടുമുറ്റത്തുണ്ട്. ഭാര്യ മിനിയും മക്കളും കൃഷിയിൽ ജോസഫിനെ സഹായിക്കുന്നു.